ایشیا کپ سپر فور مرحلے کے اہم میچ میں پاکستان نے کم ہدف کا شاندار دفاع کرتے ہوئے بنگلا دیش کو 11 رنز سے شکست دے کر فائنل میں جگہ بنا لی۔

بنگلا دیش کی ٹیم پاکستان کے 135 رنز کے ہدف کے تعاقب میں مقررہ 20 اوورز میں 9 وکٹوں کے نقصان پر 124 رنز بنا سکی۔

بنگلا دیش کی جانب سے سیف حسن نے 22، مہدی حسن 11، نورالحسن 16، شمیم حسین 30، تنظیم حسن ثاقب 10 اور رشاد حسین 16 رنز بنا کر ناٹ آؤٹ رہے۔

پاکستان کی جانب سے حارث رؤف اور شاہین شاہ آفریدی نے 3،3 وکٹیں حاصل کیں، جبکہ صائم ایوب نے 2 اور محمد نواز نے 1 کھلاڑی کو آؤٹ کیا۔

  دبئی کرکٹ اسٹیڈیم میں ہونے والے اس اہم ترین میچ میں بنگلا دیش نے ٹاس جیت کر پہلے فیلڈنگ کا فیصلہ کیا، پاکستان نے مایوس کن کھیل پیش کرتے ہوئے 20 اوورز میں 8 وکٹوں کے نقصان پر 135 رنز ہی بنائے۔

پاکستان کے مایہ ناز بیٹرز اس اہم میچ میں بنگلا دیش کے خلاف بڑا ہدف دینے میں ناکام رہے اور ایک کے بعد ایک بیٹسمین تو چل میں آیا کی مصداق پویلین واپس لوٹتے رہے۔

سعید انور کی جھلک اور نو لک شاٹ کے تخلیق کار صائم ایوب اس ایونٹ میں چوتھی مرتبہ صفر کی ہزیمت سے دوچار ہوئے۔

صاحبزادہ فرحان 4، فخر زمان 13، کپتان سلمان آغا 19 پر ڈھیر ہو گئے، ایک میچ کی پرفارمنس پر میڈیا میں اسٹار کی طرح چھانے والے حسین طلعت کو بنگلا دیشی باؤلر کسی خاطر میں نہ لائے اور 3 رنز پر انہیں میدان بدر کر دیا۔

محمد حارث کے 31، شاہین شاہ آفریدی کے 19 اور محمد نواز کی 25 رنز کی مزاحمتی اننگز کی بدولت پاکستان نے 100 رنز کا ہندسہ بڑی مشکل سے عبور کیا جو ایک موقع پر ناممکن نظر آ رہا تھا۔

فہیم اشرف نے اپنی خداداد صلاحیتوں کے بل بوتے پر پوری توانائی صرف کرتے ہوئے 14 قیمتی رنز کی اننگ کھیلی۔

بنگال ٹائیگرز کی جانب سے تسکین احمد نے 3، مہدی حسن اور رشاد حسین نے 2،2 جبکہ مستفیض الرحمان نے ایک وکٹ حاصل کی۔

ایشیا کپ سپر فور مرحلے کے اہم میچ میں بنگلا دیش نے پاکستان کے خلاف ٹاس جیت کر پہلے فیلڈنگ کا فیصلہ کیا ہے۔

ٹاس کے بعد گفتگو کرتے ہوئے بنگلا دیشی کپتان ذاکر علی کا کہنا تھا کہ لگتا ہے پہلے فیلڈنگ کرنے سے فائدہ ہو گا، ٹیم میں 3 تبدیلیاں کی گئی ہیں۔

ذاکر علی کا کہنا تھا کہ بولرز اچھا پرفارم کر رہے ہیں کوشش کریں گے بیٹنگ بھی اچھی کریں اور میچ جیت کر فائنل میں جانے کی کوشش کریں گے۔

قومی کرکٹ ٹیم کے کپتان سلمان علی آغا نے کہا کہ ہم پہلے بیٹنگ ہی کرنا چاہتے تھے، ٹیم میں کوئی تبدیلی نہیں کی گئی اور پوری توجہ میچ جیتنے پر ہے۔

سلمان علی آغا نے کہا کہ ہمارے بولرز ایشیا کپ میں بہترین پرفارم کر رہے ہیں، کوشش یہی ہو گی کہ میچ میں اپنی بہترین پرفارمنس دیں۔

یہ پہلا موقع ہے کہ جب ایشیا کپ کے فائنل میں روایتی حریف پاکستان اور بھارت مد مقابل ہوں گے، دونوں کے درمیان یہ ہائی وولٹیج فائنل میچ اتوار کو کھیلا جائے گا۔

اسکواڈز:

پاکستان: سلمان آغا (کپتان)، ابرار احمد، فہیم اشرف، فخر زمان، حارث رؤف، حسن علی، حسن نواز، حسین طلعت، خوشدل شاہ، محمد حارث، محمد نواز، محمد وسیم، صاحبزادہ فرحان، صائم ایوب، سلمان مرزا، شاہین شاہ آفریدی، سفیان مقیم

بنگلا دیش: لٹن داس (کپتان)، جاکر علی، مہدی حسن، محمد سیف الدین، مستفیض الرحمان، نسوم احمد، نورالحسن، پرویز حسین ایمان، رشاد حسین، سیف حسن، شمیم حسین، شرف الاسلام، تنزید حسن، تنظیم حسن ثاقب، تسکین احمد، توحید ہردوائے