وزارتِ انفارمیشن ٹیکنالوجی نے ڈیجیٹل پاکستان ویژن کے تحت ایک بڑی پیش رفت کرتے ہوئے “نیشنل سپر ایپ” اور ویب پورٹل لانچ کرنے کا فیصلہ کیا ہے، جس کے ذریعے شہریوں اور کاروباری افراد کو سرکاری خدمات تک ایک ہی پلیٹ فارم پر 24/7 رسائی حاصل ہو سکے گی۔

 یہ منصوبہ ورلڈ بینک کی معاونت سے ڈیجیٹل اکانومی انہانسمنٹ پراجیکٹ کے تحت شروع کیا گیا ہے اور اسے پاکستان ڈیجیٹل گورنمنٹ انٹرپرائز آرکیٹیکچر کے فریم ورک میں ڈیزائن کیا جا رہا ہے۔

سرکاری دستاویزات کے مطابق، یہ سپر ایپ اور ویب پورٹل نادرا کے نیشنل ڈیجیٹل آئی ڈی سسٹم کے ساتھ منسلک ہوگا، جہاں بائیو میٹرک تصدیق کے ذریعے محفوظ رسائی فراہم کی جائے گی۔

 سپر ایپ وفاقی اور صوبائی سطح پر متعدد سرکاری محکموں کو ایک پلیٹ فارم پر اکٹھا کرے گی، تاکہ صارفین مختلف اداروں سے متعلق خدمات باآسانی حاصل کر سکیں۔

یہ پلیٹ فارم لائسنس کی تجدید، ٹیکس جمع کرانے، پرمٹ حاصل کرنے، این او سی، سرکاری فیسوں کی ادائیگی اور دیگر کئی اہم سرکاری سروسز کو مکمل طور پر آن لائن لے آئے گا۔

 شہری اور کاروباری حضرات اپنے موبائل یا ویب کے ذریعے ان خدمات تک بغیر کسی رکاوٹ کے رسائی حاصل کر سکیں گے۔

وزارت کے مطابق، یہ نظام ورک فلو کو خودکار بنائے گا، جس سے وقت اور اخراجات دونوں میں نمایاں کمی آئے گی، جبکہ اداروں کی شفافیت اور کارکردگی میں بہتری آئے گی۔

خاص طور پر زیرو ٹرسٹ سیکیورٹی ماڈل اور اینڈ ٹو اینڈ انکرپشن جیسے جدید حفاظتی فیچرز کو شامل کیا گیا ہے، تاکہ صارفین کا ڈیٹا مکمل طور پر محفوظ رہے۔

منصوبے کی دستاویزات میں انکشاف کیا گیا ہے کہ پلیٹ فارم مستقبل میں تھرڈ پارٹی سروسز، سبسکرپشن ماڈلز، پریمیم فیچرز اور ان ایپ ایڈورٹائزنگ کی صلاحیت بھی رکھتا ہے، جس سے اس کی افادیت اور پائیداری میں مزید اضافہ ہوگا۔

وزارت آئی ٹی نے سپر ایپ کی ڈیزائننگ اور انفراسٹرکچر کی تیاری کے لیے ایک بین الاقوامی کنسلٹنسی فرم ہائر کرنے کا عمل بھی شروع کر دیا ہے، تاکہ عالمی معیار کے مطابق ایپ کی ترقی ممکن بنائی جا سکے۔

حکام کا کہنا ہے کہ نیشنل سپر ایپ اور ویب پورٹل حکومت اور عوام کے درمیان روابط کو ایک نئی ڈیجیٹل جہت میں لے جائیں گے، جہاں سہولت، شفافیت اور ٹیکنالوجی ایک ساتھ مل کر ڈیجیٹل پاکستان کے خواب کو حقیقت میں بدلیں گے۔