لندن: وزیرِ دفاع خواجہ آصف نے بول نیوز سے خصوصی گفتگو میں کہا کہ اکتوبر کے آخر میں پاکستان سے مانچسٹر کے لئے پروازیں شروع ہوجائیں گی۔

وزیرِ دفاع خواجہ آصف کا کہنا ہے کہ پاکستان کی بہادر افواج نے بھارت کو شکست دے کر اپنی صلاحیت اور بہادری کا لوہا منوایا ہے۔ پاکستان نے اپنے سے کئی گنا بڑے دشمن کو شکست دی جس پر پوری قوم کو اللہ کا شکر ادا کرنا چاہیے۔

خواجہ آصف نے کہا کہ میرا موقف وہی ہے جو 25 کروڑ عوام کا ہے، قوم کی عزت اور وقار میں اضافہ ہوا ہے اور اگر ہم متحد ہوں تو ایسے ہی مثبت نتائج سامنے آتے ہیں۔

سعودی عرب سے دفاعی معاہدہ انتہائی اہم ہے

وزیرِ دفاع نے سعودی عرب کے ساتھ حالیہ دفاعی معاہدے کو تاریخی قرار دیتے ہوئے کہا کہ اس میں وزیراعظم شہباز شریف اور آرمی چیف کا کلیدی کردار ہے۔ نواز شریف بھی اس معاہدے سے بہت خوش ہیں اور انہوں نے موجودہ حکومت کے لیے خصوصی دعائیں دی ہیں۔

ان کا کہنا تھا کہ اختلافات کا بھی ایک لیول ہونا چاہیے لیکن بدقسمتی سے پاکستان میں اختلافات کی جو روایت پڑ گئی ہے وہ چند ہفتوں میں ختم ہوجائے گی۔ قوم کو مشکلات کے وقت متحد ہونا چاہیے، خاص طور پر جب ملک میں سیلاب سے کروڑوں لوگ متاثر ہوئے ہیں۔

بھارت اور مودی پر کڑی تنقید

اپنے بیان میں خواجہ آصف نے کہا کہ بھارتی وزیراعظم مودی نہ صرف اپنے ملک میں بلکہ دنیا بھر میں رسوا ہوچکے ہیں۔ پاکستان کی کامیابیاں قوم کے اتحاد کا ثبوت ہیں۔

وزیرِ دفاع نے بتایا کہ ان کی نواز شریف سے جنیوا میں ملاقات ہوئی ہے، جہاں نواز شریف نے حکومت کے لیے نیک خواہشات اور دعائیں کیں۔ مزید برآں انہوں نے اعلان کیا کہ اکتوبر کے آخر میں پاکستان سے مانچسٹر کے لیے پروازیں بحال ہوجائیں گی۔