ابوظبی: ایشیا کپ ٹی ٹوئنٹی 2025 کے 11 ویں میچ میں سری لنکا نے افغانستان کو 6 وکٹوں سے شکست دے کر سپرفور مرحلے کیلئے کوالیفائی کرلیا اور ساتھ ہی افغان ٹیم کا ایونٹ میں سفر ختم ہوگیا۔

سری لنکا نے افغانستان کا 170 رنز کا ہدف با آسانی  19 ویں اوور میں 4 وکٹوں کے نقصان پر حاصل کرلیا۔کوشل مینڈس 74 اور کمندو مینڈس 26 رنز بناکر ناقابل شکست رہے۔

اس کے علاوہ کوشل پریرا 28 اور اسالنکا نے 17 رنز بنائے۔

اس شکست کے بعد افغانستان کا ایشیا کپ 2025 میں سفر ختم ہوگیا جبکہ گروپ بی سے سری لنکا اور بنگلادیش نے سپر فور مرحلے کیلئے کوالیفائی کرلیا۔

اس سے قبل ایشیا کپ 2025 کے  11 ویں میچ میں افغانستان نے سری لنکا کو جیت کے لیے 170 رنز کا ہدف دے دیا ہے۔

ابوظبی کے میدان میں ٹاس جیت کر بیٹنگ کا فیصلہ کرنے والی افغان ٹیم نے 20 اوورز میں 8 وکٹوں کے نقصان پر 169 رنز اسکور کیے۔

میچ کا سب سے جاندار مظاہرہ محمد نبی کی جانب سے دیکھنے میں آیا، جنہوں نے صرف 22 گیندوں پر 60 رنز کی دھواں دھار اننگز کھیلی۔

ان کی اننگز میں 6 چھکے اور 3 چوکے شامل تھے۔ خاص طور پر آخری اوور میں دُنیتھ ویلالگے کو لگاتار 5 چھکے مار کر انہوں نے افغانستان کی پوزیشن کو مستحکم کر دیا۔

دیگر بلے بازوں میں ابراہیم زادران اور راشد خان نے بالترتیب 24، 24 رنز بنائے، جبکہ صدیق اللہ اتل نے 18 اور رحمان اللہ گربز نے 14 رنز کا حصہ ڈالا۔ نور احمد 6 رنز کے ساتھ ناٹ آؤٹ رہے۔

میچ ابوظبی کے شیخ زید اسٹیڈیم میں کھیلا جا رہا ہے، جہاں دونوں ٹیموں کے درمیان اہم مقابلہ متوقع ہے۔

افغانستان کے کپتان راشد خان نے ٹاس کے بعد گفتگو کرتے ہوئے کہا کہ ہم جانتے ہیں کہ یہ میچ جیتنا ہمارے لیے بہت ضروری ہے۔ کوشش کریں گے کہ بنیادی چیزوں کو درست رکھیں اور جیت کی راہ ہموار کریں۔

انہوں نے مزید کہا کہ پچ نئی ہے اور بیٹنگ کے لیے سازگار دکھائی دے رہی ہے، اسی لیے 170 رنز کا ہدف سیٹ کرنے کی کوشش کریں گے۔

دوسری جانب سری لنکن کپتان چریتھ اسالنکا نے کہا کہ اگر ٹاس جیتتے تو وہ بھی پہلے بیٹنگ کا ہی فیصلہ کرتے، کیونکہ پچ بعد میں سست ہو سکتی ہے۔

یہ میچ دونوں ٹیموں کے لیے نہایت اہمیت کا حامل ہے، کیونکہ گروپ اسٹیج کے اختتام سے قبل پوائنٹس ٹیبل پر پوزیشن مضبوط کرنے کے لیے فتح ناگزیر ہے۔ افغانستان اپنی جارحانہ اسپن بولنگ جبکہ سری لنکا متوازن بیٹنگ لائن کے ساتھ میدان میں اُتری ہے۔