کراچی: نیو کراچی انڈسٹریل ایریا میں قائم ایک بڑی تین منزلہ گارمنٹس فیکٹری خوفناک آتشزدگی کے بعد زمین بوس ہوگئی ہے۔

بو ل نیوز کے مطابق نیو کراچی انڈسٹریل ایریا میں قائم ایک بڑی گارمنٹس فیکٹری میں علی الصبح آگ بھڑک اٹھی جس نے دیکھتے ہی دیکھتے عمارت کے متعدد حصوں کو اپنی لپیٹ میں لے لیا۔

فائربریگیڈ حکام کے مطابق آگ کا آغاز گراؤنڈ فلور سے ہوا، جس کے بعد تین منزلہ عمارت کی پہلی منزل بھی شعلوں کی زد میں آگئی۔

دھواں زیادہ ہونے کی وجہ سے ریسکیو آپریشن میں مشکلات پیش آرہی ہیں جبکہ آگ کو مزید پھیلنے سے روکنے کی کوششیں جاری ہیں۔ چیف فائر آفیسر کے مطابق درجنوں فائر ٹینڈر آگ بجھانے کے عمل میں مصروف ہیں۔

فائربریگیڈ اور ریسکیو 1122 نے واٹر کارپوریشن سے ہنگامی مدد طلب کی جس پر سی ای او واٹر کارپوریشن کی ہدایت پر سخی ہائیڈرنٹ اور حسن ہائیڈرنٹ پر ایمرجنسی نافذ کردی گئی اور نیپا ہائیڈرنٹ پر بھی واٹر ٹینکرز کو اسٹینڈ بائی کردیا گیا۔

ترجمان واٹر بورڈ کا کہنا ہے کہ جائے وقوعہ پر فوری طور پر واٹر ٹینکرز روانہ کردیے گئے ہیں اور انچارج ہائیڈرنٹس سیل مسلسل فائربریگیڈ و ریسکیو حکام سے رابطے میں ہیں۔ فوکل پرسن ایم ڈی برائے ہائیڈرنٹس سیل خود آپریشن کی نگرانی کررہے ہیں تاکہ فائربریگیڈ کو بلا تعطل پانی کی فراہمی یقینی بنائی جا سکے۔

واٹر بورڈ حکام نے کہا ہے کہ آگ پر مکمل قابو پانے تک فائر بریگیڈ کو واٹر ٹینکرز فراہم کیے جاتے رہیں گے۔