پاکستان کے خلاف جھوٹ اور پروپیگنڈے کی نئی مہم میں بھارتی میڈیا ایک بار پھر بے نقاب ہو گیا۔ وزارتِ اطلاعات و نشریات پاکستان نے بھارتی جریدے فرسٹ پوسٹ کی گمراہ کن خبر کا سختی سے نوٹس لیتے ہوئے اسے پاکستان دشمنی پر مبنی من گھڑت رپورٹ قرار دیا ہے۔

بھارتی جریدے نے جھوٹا دعویٰ کیا کہ پاکستان کی عسکری قیادت نے امریکی خفیہ ایجنسی سی آئی اے اور اسرائیلی ایجنسی موساد کے ساتھ مبینہ معاہدہ کیا ہے، جس کے تحت 20 ہزار پاکستانی فوجی غزہ بھیجے جائیں گے۔

وزارتِ اطلاعات و نشریات نے واضح کیا کہ پاکستان نے نہ کبھی اسرائیل کو تسلیم کیا ہے اور نہ کسی قسم کی فوجی تعیناتی پر کوئی بات چیت ہوئی ہے۔

پاک فوج کے شعبہ تعلقات عامہ (آئی ایس پی آر) اور دفترِ خارجہ دونوں نے اس نوعیت کے کسی فوجی مشن کی تائید یا اعلان کی سختی سے تردید کی ہے۔

ترجمان وزارتِ اطلاعات نے کہا کہ فرسٹ پوسٹ نے صحافتی اصولوں کو پامال کرتے ہوئے ایک نجی اخبار کے جملے سیاق و سباق سے ہٹا کر پیش کیے۔

بھارتی رپورٹ میں شامل نام نہاد انٹیلی جنس لیکس اور دعوے مکمل طور پر جھوٹے، بے بنیاد اور گمراہ کن ہیں۔

وزارت نے کہا کہ رپورٹ میں CNN-News18 جیسے ذرائع کا حوالہ دیا گیا ہے، جو ماضی میں بھی غیر مصدقہ اور فیک اطلاعات پھیلانے میں بدنام ہے۔

ترجمان نے مزید کہا کہ پاکستان کا مؤقف ہمیشہ سے واضح اور اصولی رہا ہے کہ فلسطینی عوام کے حقِ خود ارادیت اور آزادی کی غیر متزلزل حمایت۔

سرکاری بیان میں کہا گیا کہ سفاک مودی کے اشاروں پر ناچنے والا گودی میڈیا جھوٹے بیانیے گھڑ کر پاکستان کے خلاف نفرت پھیلانے کی ناکام کوشش کر رہا ہے، لیکن سچ ہمیشہ سامنے آ کر ان کی سازشوں کو بے نقاب کر دیتا ہے۔