بنگلہ دیش کے دارالحکومت ڈھاکا کے مصروف صنعتی علاقے میرپور میں واقع ایک گارمنٹس فیکٹری میں خوفناک آگ بھڑک اٹھی، جو قریبی کیمیکل ویئرہاؤس تک پھیل گئی۔

 افسوسناک واقعے میں کم از کم 16 افراد جاں بحق ہو گئے، جب کہ ہلاکتوں میں اضافے کا خدشہ ظاہر کیا جا رہا ہے۔

بنگلہ دیش فائر سروس کے میڈیا سیل نے واقعے کی تصدیق کرتے ہوئے کہا کہ 12 فائر بریگیڈ یونٹس نے موقع پر پہنچ کر آگ پر قابو پانے کی کوشش کی۔

 اگرچہ مرکزی آگ بجھا دی گئی ہے، تاہم کیمیکل ویئرہاؤس میں اب بھی آگ سلگ رہی ہے، اور ریسکیو آپریشن تاحال جاری ہے۔

حکام کے مطابق جاں بحق افراد کی لاشیں گارمنٹس فیکٹری سے نکال کر باہر منتقل کی گئی ہیں، جنہیں قانونی کارروائی کے لیے پولیس کے حوالے کیا جائے گا۔

ابتدائی معلومات کے مطابق، فیکٹری کے ساتھ موجود کیمیکل گودام میں بلیچنگ پاؤڈر، پلاسٹک اور ہائیڈروجن پر آکسائیڈ جیسے خطرناک کیمیکلز موجود تھے، جن سے زہریلی گیسیں خارج ہوئیں اور اموات کا سبب بنیں۔

فائر سروس اینڈ سول ڈیفنس کے ڈائریکٹر جنرل لیفٹیننٹ کرنل محمد تاج الاسلام چودھری نے میڈیا کو بتایا کہ کیمیکل ویئرہاؤس کے مالکان، عملہ یا کوئی ذمے دار شخص تاحال غائب ہے، اور بظاہر یہ گودام بغیر لائسنس یا اجازت کے چل رہا تھا۔ حتمی تفصیلات تحقیقات کے بعد جاری کی جائیں گی۔