اسلام آباد: ملک میں پیٹرولیم مصنوعات کی قیمتوں میں حالیہ اضافے کی وجوہات کی تفصیلات سامنے آگئی ہیں۔

دستاویزات کے مطابق پیٹرول اور ڈیزل پر فریٹ مارجن اور کسٹم ڈیوٹی بڑھا دی گئی ہے, پیٹرول پر فی لیٹر فریٹ مارجن 2 روپے 4 پیسے بڑھایا گیا جس کے بعد یہ 6 روپے 65 پیسے سے بڑھ کر 8 روپے 69 پیسے ہوگیا ہے۔

بول نیوز کے مطابق پیٹرول پر کسٹم ڈیوٹی میں بھی 1 روپے 35 پیسے کا اضافہ کیا گیا ہے۔ تاہم پیٹرول پر کاربن لیوی 2 روپے 50 پیسے اور پیٹرولیم لیوی 78 روپے 02 پیسے فی لیٹر برقرار رکھی گئی ہے۔ اسی طرح پیٹرول پر ڈسٹری بیوشن مارجن 7 روپے 87 پیسے اور ڈیلر مارجن 8 روپے 64 پیسے بھی برقرار ہیں۔

دستاویز کے مطابق ڈیزل پر بھی فریٹ مارجن میں 2 روپے 9 پیسے اضافہ کیا گیا ہے، جو 4 روپے 10 پیسے سے بڑھ کر 6 روپے 19 پیسے فی لیٹر ہوگیا ہے۔ ڈیزل پر کسٹم ڈیوٹی 2 روپے 75 پیسے بڑھائی گئی جبکہ ایکسچینج ریٹ کے فرق میں 1 روپے 12 پیسے کمی ہوئی ہے۔ اس کے علاوہ ڈیزل پر 32 پیسے ایکسٹرا مارجن بھی عائد کیا گیا ہے۔

تاہم ڈیزل پر کاربن لیوی، ڈسٹری بیوشن مارجن اور ڈیلر مارجن کی شرح برقرار رکھی گئی ہے۔

 ماہرین کے مطابق پیٹرولیم مصنوعات کی قیمتوں میں یہ اضافہ براہ راست عوام پر مہنگائی کا مزید بوجھ ڈالے گا۔