وفاقی حکومت کی پالیسی کے تحت افغان باشندوں کی وطن واپسی کے فیصلے پر عمل درآمد جاری ہے، جس کے تحت کراچی کے مختلف علاقوں خصوصاً افغان بستی میں غیر قانونی رہائش پذیر افراد کے خلاف آپریشن کیا جا رہا ہے۔ پولیس اور دیگر ادارے مربوط کارروائی میں مصروف ہیں۔

ڈی ایس پی سرجانی اشتیاق غوری کے مطابق آج فی الحال کسی قسم کا آپریشن نہیں کیا جا رہا کیونکہ پولیو مہم اور دیگر انتظامی مصروفیات کے باعث نفری محدود ہے۔

تاہم گزشتہ ہفتے مسلسل چار روز تک آپریشن جاری رہا، جس کے دوران 1,200 سے زائد پکے مکانات، دکانیں اور دیگر تعمیرات کو مسمار کیا گیا۔

پولیس حکام کے مطابق اب تک 50 ایکڑ سے زائد رقبہ غیر قانونی طور پر مقیم افراد سے خالی کرایا جا چکا ہے، جبکہ افغان بستی میں تاحال تقریباً 1,000 کے قریب خاندان موجود ہیں، جو انفرادی طور پر اپنی جگہیں خالی کر رہے ہیں۔ پولیس ان عمل میں مکمل تعاون فراہم کر رہی ہے۔

حکام کے مطابق، مجموعی طور پر ملیر ڈیولپمنٹ اتھارٹی (MDA) کی 200 ایکڑ سے زائد اراضی کو واگزار کرانا ہدف ہے، جس کے لیے پولیس، رینجرز، ریونیو، ایم ڈی اے، اینٹی انکروچمنٹ فورس سمیت دیگر متعلقہ ادارے بھرپور طریقے سے کام کر رہے ہیں۔

پولیس حکام نے واضح کیا کہ وفاقی حکومت کی افغان باشندوں کی ملک بدری کی پالیسی پر من و عن عمل درآمد کیا جا رہا ہے اور اس حوالے سے تمام اداروں کے درمیان قریبی رابطہ اور تعاون جاری ہے۔