کراچی : شہر قائد میں ٹریفک حادثات کی تعداد تشویشناک حد تک بڑھ گئی ہے، جہاں رواں سال کے صرف 290 دنوں میں 10 ہزار سے زائد حادثات رپورٹ ہوئے ہیں۔

ان حادثات کے نتیجے میں 680 افراد جان کی بازی ہار چکے ہیں جن میں خواتین، بچے اور نوجوان شامل ہیں، جبکہ زخمیوں کی تعداد 10,200 سے تجاوز کر گئی ہے۔

ریسکیو اور پولیس حکام کے مطابق ٹریفک حادثات میں جانبحق ہونے والوں میں 527 مرد، 71 خواتین اور 82 بچے شامل ہیں۔ شہر میں رات گئے پیش آنے والے دو بڑے حادثات میں لیاقت آباد اور ماڈل کالونی میں مزید دو افراد جان سے ہاتھ دھو بیٹھے ہیں۔

لیاقت آباد کے حادثے میں جانبحق ہونے والا شخص آٹھ بہنوں کا اکلوتا بھائی اور جڑواں بچوں کا باپ تھا، جس کی موت نے اہلِ خانہ کو غم میں مبتلا کر دیا۔

اعداد و شمار کے مطابق قاتل ہیوی ٹریفک سے ہونے والی اموات میں 201 افراد جانبحق ہو چکے ہیں۔ ٹریفک حادثات میں جان گنوانے والوں میں سب سے زیادہ تعداد موٹر سائیکل سواروں کی ہے، جبکہ پیدل چلنے والے دوسرے اور دیگر گاڑیوں کے سوار تیسرے نمبر پر ہیں۔

اس کے علاوہ بسوں سے 25 افراد کی زندگیوں کے چراغ گل ہوئے، منی بسوں سے 11 افراد، کوچز سے 6، ٹرک اور مزدا سے 18، ٹریلرز سے 78، ڈمپرز سے 36 ، واٹر ٹینکرز سے 45 اور آئل ٹینکرز سے حادثات میں 6 افراد لقمہ اجل بنے ہیں۔

شہری حلقوں اور ماہرین کا کہنا ہے کہ کراچی میں ٹریفک کا ناقص نظام، ہیوی ٹریفک کی بلا روک ٹوک آمدورفت، ٹریفک قوانین کی خلاف ورزی اور ناکافی نفاذ ان حادثات کی بڑی وجوہات ہیں۔

پولیس اور ٹریفک حکام کا کہنا ہے کہ ٹریفک نظم و ضبط کو بہتر بنانے اور ہیوی ٹریفک پر قابو پانے کے لیے فوری اقدامات ناگزیر ہیں، بصورتِ دیگر شہریوں کی زندگیاں اسی طرح سڑکوں پر برباد ہوتی رہیں گی۔