ڈھاکا: پاکستان اور بنگلہ دیش کے تعلقات میں 20 سال بعد بڑی پیشرفت ہوئی ہے، جس میں شپنگ کارپوریشنزکےدرمیان تعاون بڑھانے پر اتفاق کیا گیا ہے۔

بول نیوز کے مطابق پاکستان اور بنگلہ دیش کے درمیان دو دہائیوں بعد نویں مشترکہ اقتصادی کمیشن (جے ای سی) کا اجلاس ڈھاکا میں منعقد ہوا، جسے دونوں ممالک کے اقتصادی و ترقیاتی تعلقات میں اہم سنگِ میل قرار دیا جا رہا ہے۔

اجلاس کی مشترکہ صدارت وفاقی وزیرِ پٹرولیم علی پرویز ملک اور بنگلہ دیش کے مشیرِ خزانہ نے کی۔

اجلاس میں پاکستان نے بنگلہ دیش کو کراچی پورٹ ٹرسٹ کے استعمال کی پیشکش کی تاکہ ڈھاکا کراچی کے راستے چین اور وسطی ایشیائی ممالک کے ساتھ تجارت کرسکے۔

اعلامیے کے مطابق دونوں ممالک نے قومی شپنگ کارپوریشنز کے درمیان تعاون بڑھانے پر زور دیا۔

پاکستان اور بنگلہ دیش نے براہِ راست پروازیں شروع کرنے کے لیے کام تیز کرنے، حلال فوڈ اتھارٹی اور بنگلہ دیشی اسٹینڈرڈز اینڈ ٹیسٹنگ انسٹیٹیوٹ کے درمیان مفاہمتی یادداشت (ایم او یو) پر دستخط، اور حلال مصنوعات کے معیار و سرٹیفکیشن میں تعاون بڑھانے پر اتفاق کیا۔

اعلامیے میں “پاک بنگلہ دیش نالج کوریڈور” کے قیام اور بنگلہ دیشی طلبا کے لیے پاکستان میں 500 نئی، مکمل فنڈڈ اسکالرشپس کی تجویز دی گئی۔

اس کے علاوہ دونوں ممالک نے طبی اور مذہبی سیاحت کے شعبوں میں اشتراکِ عمل بڑھانے پر بھی اتفاق کیا۔ اجلاس کے اختتام پر دونوں فریقین نے مشترکہ اقتصادی کمیشن کے اعلامیے پر دستخط کیے۔