ترجمان دفتر خارجہ کے مطابق وزیراعظم شہباز شریف مصری صدر عبدالفتاح السیسی اور امریکی صدر ڈونلڈ ٹرمپ کی خصوصی دعوت پر پیر 13 اکتوبر کو مصر کے شہر شرم الشیخ کا اہم دورہ کریں گے، جہاں وہ غزہ امن معاہدے پر دستخطوں کی تقریب اور شرم الشیخ امن سربراہی اجلاس میں پاکستان کی نمائندگی کریں گے۔

وزیراعظم کے ہمراہ نائب وزیراعظم سمیت اہم وزراء اور اعلیٰ حکام پر مشتمل وفد بھی شریک ہوگا۔

یہ اجلاس اقوام متحدہ کی جنرل اسمبلی کے 80ویں اجلاس کے موقع پر جاری سفارتی کوششوں کا نتیجہ ہے، جس میں خطے میں امن و استحکام کے لیے ایک نئی راہ ہموار ہونے کی امید کی جا رہی ہے۔

واضح رہے کہ 23 ستمبر 2025 کو وزیراعظم شہباز شریف نے 7 عرب و اسلامی ممالک مصر، اردن، قطر، سعودی عرب، متحدہ عرب امارات، انڈونیشیا اور ترکیہ کے سربراہان کے ہمراہ امریکی صدر سے مشترکہ ملاقات میں شرکت کی تھی، جس کا مقصد امریکہ پلس 8 فارمیٹ کے تحت غزہ میں قیامِ امن کے امکانات کا جائزہ لینا تھا۔

شرم الشیخ اجلاس میں عالمی رہنما فلسطین-اسرائیل جنگ بندی کے بعد کی صورتحال، تعمیر نو، اور انسانی امداد کی راہ میں رکاوٹیں دور کرنے سے متعلق عملی حکمت عملی پر تبادلہ خیال کریں گے۔

ترجمان دفتر خارجہ کے مطابق وزیراعظم کا یہ دورہ پاکستان کے دیرینہ اصولی مؤقف فلسطینی عوام کے حقِ خودارادیت اور مشرقِ وسطیٰ میں پائیدار امن کی حمایت کی توثیق اور عالمی سطح پر سفارتی قیادت کے مؤثر اظہار کی علامت ہے۔