کراچی: سندھ حکومت نے صوبے بھر میں ٹائر جلانے اور پائرو لائسز پلانٹس کے آپریشن پر مکمل پابندی عائد کردی ہے۔

یہ اہم فیصلہ وزیراعلیٰ سندھ کی زیرِ صدارت صوبائی کابینہ کے اجلاس میں کیا گیا۔

سیکریٹری ماحولیات زبیر چنہ کے مطابق ٹائر جلانے اور ناقص پائرو لائسز پلانٹس سے فضا، مٹی اور پانی بری طرح متاثر ہو رہے ہیں، جبکہ ان سرگرمیوں کے باعث سانس، دل اور اعصابی امراض میں خطرناک حد تک اضافہ دیکھنے میں آیا ہے۔

انہوں نے کہا کہ کراچی سمیت صوبے کے مختلف علاقوں میں فضائی آلودگی خطرناک سطح تک پہنچ چکی ہے۔

زبیر چنہ نے بتایا کہ عوامی صحت کے تحفظ کے لیے سندھ حکومت نے ایسے تمام پلانٹس فوری طور پر بند کرنے کا فیصلہ کیا ہے۔

صوبائی محکمہ ماحولیات نے سندھ ماحولیاتی تحفظ ایجنسی (سب اسٹینڈرڈ فیول/ٹائرز کے استعمال کی ممانعت) رولز 2025 کے نام سے نئے قواعد کا مسودہ تیار کرلیا ہے، جس کے تحت سب اسٹینڈرڈ فیولز، ٹائر آئل اور غیرمحفوظ ایندھن کے استعمال، تیاری اور فروخت پر مکمل پابندی عائد ہوگی۔

ان قواعد کے مطابق تمام پلانٹس کے لیے لائسنسنگ، ماحولیاتی کنٹرول سسٹم اور اخراج کی حد کے تقاضے لازمی قرار دیے جائیں گے، جبکہ خلاف ورزی پر پلانٹس کی ضبطی، بھاری جرمانہ اور بندش کی سزائیں تجویز کی گئی ہیں۔

زبیر چنہ کے مطابق یہ اقدام ’سندھ ماحولیاتی تحفظ ایکٹ 2014‘ کے تحت کیا گیا ہے اور صوبے میں پائیدار ترقی، صاف فضا اور محفوظ ماحولیاتی نظام کی جانب ایک عملی پیش رفت ہے۔