کراچی میں ہیوی ٹریفک کی نقل و حرکت پر دو ماہ کے لیے مکمل پابندی عائد کر دی گئی ہے۔

 ٹریفک کے بڑھتے ہوئے مسائل اور شہری زندگی میں خلل کو مدنظر رکھتے ہوئے انتظامیہ نے دفعہ 144 سی آر پی سی کے تحت یہ فیصلہ نافذ کیا ہے، جو 18 اکتوبر سے 17 دسمبر 2025 تک مؤثر رہے گا۔

پابندی کا اطلاق رات 10 بجے سے صبح 6 بجے تک ہوگا، جس دوران تعمیراتی سامان لے جانے والے ڈمپرز اور دیگر ہیوی گاڑیوں کی شہر میں آمد و رفت پر مکمل پابندی عائد ہو گی۔

 صرف اشیائے ضروریہ کی ترسیل کرنے والی گاڑیوں کو اس پابندی سے استثنیٰ حاصل ہوگا۔

تعمیراتی سامان سے لدے ڈمپرز کو عام اجازت نہیں دی جائے گی، البتہ وہ ڈمپرز جن میں منظور شدہ ٹریکر نصب ہوں اور جن کا ڈیٹا کراچی ٹریفک پولیس کے مانیٹرنگ سسٹم سے منسلک ہو، انہیں صرف صنعتی علاقوں کے اندر نقل و حرکت کی مشروط اجازت دی جائے گی۔

انتظامیہ نے ہیوی ٹریفک کے لیے تین مخصوص روٹس کی اجازت دی ہے، تاہم یہ اجازت ڈمپرز پر لاگو نہیں ہوگی۔

سپر ہائی وے سے نیو کراچی انڈسٹریل ایریا جانے کی اجازت ہوگی۔

نیشنل ہائی وے سے گودام چورنگی بزریعہ منزل پیٹرول پمپ یونس چورنگی، داؤد چورنگی سے 8000 روڈ جام صادق برج جا سکتے ہیں۔

نادرن بائی پاس، پراچہ چوک، اسٹیٹ ایوینیو روڈ،  سیمن چورنگی، سے گلبائی ماڑی پور روڈ جناح برج جانب کراچی پورٹ جانے کی اجازت ہوگی۔

مزید برآں، کراچی پورٹ سے ویسٹ ہارف اور مائی کلاچی روڈ کے ذریعے بھی مخصوص اوقات میں ہیوی گاڑیاں جا سکیں گی۔

کراچی ٹریفک پولیس نے شہریوں اور ٹرانسپورٹرز سے اپیل کی ہے کہ وہ اس فیصلے پر مکمل عمل درآمد کریں تاکہ شہر میں ٹریفک کے بہاؤ کو بہتر بنایا جا سکے اور عوام کو درپیش مشکلات میں کمی لائی جا سکے۔