منیلا: فلپائن کے وسطی علاقے سیبو آئس لینڈ کے قریب آنے والے طاقتور زلزلے سے ہلاکتوں کی تعداد بڑھ کر 69 ہوگئی ہے جبکہ لگ بھگ 150 افراد زخمی ہوئے ہیں۔

حکام کے مطابق صورتحال اب بھی غیر یقینی ہے اور مزید ہلاکتوں کا خدشہ ہے۔

امریکی جیولوجیکل سروے (USGS) کے مطابق 6.9 شدت کا یہ زلزلہ منگل کی رات 9 بج کر 59 منٹ پر شمالی سیبو کے شہر بوگو کے قریب آیا۔ زلزلے کے بعد کم از کم چار طاقتور جھٹکے محسوس کیے گئے جن کی شدت 5 یا اس سے زیادہ ریکارڈ کی گئی۔

فلپائن کے آفس آف سول ڈیفنس کے ڈپٹی ایڈمنسٹریٹر رافائیلیتو الیخاندرو نے منیلا میں بریفنگ کے دوران بتایا کہ “ہمیں مزید ہلاکتوں کی اطلاعات موصول ہو رہی ہیں، صورتحال ابھی تک بہت خطرناک ہے۔ اب تک 69 افراد کے جاں بحق ہونے کی تصدیق ہوچکی ہے۔”

زلزلے سے سیبو کے متاثرہ علاقوں میں ایمرجنسی نافذ کر دی گئی ہے۔ کئی عمارتیں گر گئیں، گھروں اور ایک اسپتال کو نقصان پہنچا جبکہ بجلی کی فراہمی بھی معطل رہی۔ مقامی میڈیا نے ایسی فوٹیج نشر کی جس میں ایک پل زوردار جھٹکوں کے باعث ہل رہا تھا اور موٹرسائیکل سوار جان بچانے کے لیے ریلنگ پکڑنے پر مجبور ہوگئے۔

ریسکیو ٹیمیں امدادی کارروائیوں میں مصروف ہیں اور ملبے تلے دبے افراد کو نکالنے کی کوشش کی جا رہی ہے۔ فلپائن انسٹی ٹیوٹ آف وولکینالوجی اینڈ سیزمولوجی (PHIVOLCS) نے سیبو، لیٹے اور بیلیران صوبوں میں ممکنہ سمندری لہروں سے خبردار کرتے ہوئے شہریوں کو ساحلی علاقوں سے دور رہنے کی ہدایت دی ہے۔

واضح رہے کہ فلپائن بحرالکاہل کے “رِنگ آف فائر” پر واقع ہے جہاں زلزلے اور آتش فشانی سرگرمیاں عام ہیں۔