ایڈیشنل انسپکٹر جنرل کاؤنٹر ٹیررازم ڈیپارٹمنٹ (سی ٹی ڈی) شوکت عباس نے دہشتگردی سے متاثرہ پولیس ٹریننگ اسکول ڈیرہ اسماعیل خان کا دورہ کیا۔

اُن کے ہمراہ ڈسٹرکٹ پولیس آفیسر ڈیرہ اسماعیل خان صاحبزادہ سجاد، ایس پی سی ٹی ڈی ڈیرہ افتخار علی شاہ اور ایس پی سی ٹی ڈی بنوں فضل واحد خان بھی موجود تھے۔

ایڈیشنل آئی جی نے مختلف حصوں کا تفصیلی جائزہ لیا اور واقعے میں ملوث ممکنہ سہولتکاروں کو جلد از جلد گرفتار کرنے کی ہدایت جاری کی۔ تفتیشی ٹیمز نے اب تک ہونے والی پیشرفت پر ایڈیشنل آئی جی کو بریفنگ دی جس پر اُنہوں نے اطمینان کا اظہار کیا۔

ایڈیشنل آئی جی شوکت عباس نے کہا کہ نہتے ریکروٹس پر حملہ کرنے والے خوارج کسی بھی قسم کے رحم کے مستحق نہیں۔ ایسے عناصر کے سہولتکاروں اور پس پردہ کرداروں کو انصاف کے کٹہرے میں لایا جائے گا۔

اُنہوں نے مزید کہا کہ تفتیشی رپورٹس کی روشنی میں تمام پولیس تنصیبات کی سیکیورٹی کو مزید مؤثر بنایا جائے گا تاکہ آئندہ کسی قسم کا سانحہ رونما نہ ہو۔

ایڈیشنل آئی جی نے گزشتہ روز کے حملے کے فوری اور مؤثر جواب پر ایلیٹ کمانڈوز، ایس ایس جی اور سی ٹی ڈی کی خصوصی ٹیمز کے کردار کو قابل تحسین قرار دیا اور کہا کہ ان فورسز کی بروقت کارروائی کی بدولت حملہ آوروں کو ان کے منطقی انجام تک پہنچایا گیا۔