بھارتی میڈیا کی جانب سے ایک بار پھر پاکستان مخالف فالس فلیگ آپریشن کا پرانا ہتھکنڈہ بے نقاب ہو گیا۔

 ذرائع کے مطابق بھارتی میڈیا نے آج صبح سے ہی پاکستان کے خلاف جھوٹ، بے بنیاد الزامات اور پروپیگنڈے کی نئی لہر شروع کر دی جس کا مقصد عوامی توجہ کو بھارت کے اندرونی بحرانوں سے ہٹانا ہے۔

ذرائع کا کہنا ہے کہ بھارتی گودی میڈیا نے اترپردیش اور حیدرآباد کے مقامی دہشت گردوں کو پاکستان سے منسلک کرنے کی ناکام کوشش کی تاہم ابتدائی تحقیقات میں واضح ہو گیا کہ گرفتار افراد بھارت کے اپنے شہری ہیں۔

ذرائع کے مطابق لال قلعہ میٹرو اسٹیشن کے قریب دھماکے کے بعد بھارتی پولیس کا ابتدائی مؤقف سلنڈر دھماکے کا تھا مگر چند ہی گھنٹوں بعد بھارتی میڈیا نے اچانک بیانیہ تبدیل کر کے پاکستان مخالف مہم شروع کر دی۔

بھارتی چینلز نے پاکستانی اسلحے، کیمیکل اٹیک اور درآمدی دھماکہ خیز مواد جیسے بے بنیاد دعوے نشر کیے۔ اس دوران بیسیوں جعلی کہانیاں اور نامعلوم ذرائع کے حوالے سے گمراہ کن رپورٹس بھی نشر کی گئیں۔

ذرائع کے مطابق بھارتی حکومت اور میڈیا مل کر اپنے داخلی سیاسی و معاشی بحران سے عوام کی توجہ ہٹانے کے لیے اس قسم کے فالس فلیگ آپریشنز کو بطور ہتھیار استعمال کر رہے ہیں۔

ماہرین کا کہنا ہے کہ بھارتی میڈیا کا کردار ہمیشہ کی طرح مشکوک اور غیر ذمہ دارانہ رہا ہے، جو غیر مصدقہ خبروں اور جھوٹے الزامات کے ذریعے عوام کو گمراہ کرنے کی کوشش کرتا ہے۔

ذرائع کے مطابق پاکستان نے ہمیشہ ہر سطح پر دہشت گردی کی مذمت کی ہے اور بین الاقوامی برادری کو بھارتی پروپیگنڈے کے حقیقی عزائم سے آگاہ کرتا رہا ہے۔

پاکستانی حکام کا کہنا ہے کہ بھارت اپنے عوام کو فریب میں رکھ کر داخلی ناکامیوں کا ملبہ پاکستان پر ڈالنے کی پالیسی پر گامزن ہے۔

ذرائع نے کہا کہ بھارتی میڈیا کے جھوٹے بیانیے ایک بار پھر حقائق اور زمینی حقیقتوں کے سامنے دم توڑ گئے ہیں۔