نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسی آپریشن سینٹر نے موسمِ سرما کے آغاز پر ملک بھر میں خشک اور سرد موسم برقرار رہنے کی پیش گوئی کی ہے۔

 ادارے کے مطابق مغربی ہواؤں کا نیا سلسلہ ملک کے بالائی حصوں میں داخل ہو رہا ہے، جس کے باعث چترال، دیر، مالاکنڈ، ایبٹ آباد، مانسہرہ، گلگت بلتستان اور آزاد کشمیر کے کچھ علاقوں میں ہلکی بارش اور برفباری متوقع ہے۔

این ڈی ایم اے کی جاری کردہ رپورٹ کے مطابق پنجاب میں 3 سے 8 نومبر تک موسم خشک رہے گا، جبکہ دھند اور اسموگ کے بڑھنے کا امکان ہے۔

بلوچستان میں بھی انہی تاریخوں کے دوران موسم خشک رہے گا، تاہم 6 نومبر کو بالائی علاقوں میں مطلع ابرآلود رہ سکتا ہے۔

سندھ میں 3 سے 8 نومبر کے دوران مکمل طور پر خشک موسم متوقع ہے۔

خیبرپختونخوا میں مجموعی طور پر خشک اور سرد موسم رہے گا، تاہم 3 اور 4 نومبر کو چترال، دیر، مالاکنڈ، ایبٹ آباد اور مانسہرہ کے پہاڑی علاقوں میں ہلکی بارش اور برفباری کا امکان ظاہر کیا گیا ہے۔

گلگت بلتستان اور آزاد کشمیر میں 3 سے 6 نومبر کے دوران مطلع ابرآلود اور سرد رہنے کی پیش گوئی کی گئی ہے، جہاں استور، سکردو، ہنزہ، باغ، نیلم ویلی اور مظفرآباد کے پہاڑی علاقوں میں بارش یا ہلکی برفباری متوقع ہے۔

این ڈی ایم اے نے کہا ہے کہ تمام متعلقہ صوبائی و ضلعی اداروں کو ممکنہ موسمی صورتحال اور خطرات سے متعلق بروقت آگاہ کیا جا رہا ہے تاکہ کسی بھی ہنگامی صورتِ حال سے مؤثر طور پر نمٹا جا سکے۔