میکسیکو: ہیروسِلو (Hermosillo) میں ایک سپر اسٹور میں خوفناک دھماکے کے بعد شدید آگ بھڑک اٹھی، جس کے نتیجے میں کم از کم 23 افراد ہلاک اور متعدد زخمی ہو گئے۔

غیر ملکی میڈیا کے مطابق میکسیکو کے شمال مغربی شہر ہیروسِلو (Hermosillo) میں ہفتے کی رات ایک سپر اسٹور میں خوفناک دھماکے کے بعد شدید آگ بھڑک اٹھی، جس کے نتیجے میں کم از کم 23 افراد ہلاک اور متعدد زخمی ہو گئے۔

میڈیا رپورٹس کے مطابق دھماکہ مقامی “Waldo’s” نامی ڈسکاؤنٹ اسٹور میں ہوا، جہاں درجنوں خریدار اور ملازمین موجود تھے۔ دھماکے کے فوری بعد پورا اسٹور آگ کی لپیٹ میں آ گیا۔ فائر بریگیڈ نے کئی گھنٹے کی جدوجہد کے بعد آگ پر قابو پایا۔

سونوڑا ریاست کے گورنر الفانسو دورازو (Alfonso Durazo) نے بتایا کہ مرنے والوں میں بچے بھی شامل ہیں۔ ابتدائی اطلاعات کے مطابق ہلاکتوں کی بڑی وجہ دھوئیں اور زہریلی گیسوں کا سانس میں داخل ہونا تھی۔

حکام کا کہنا ہے کہ دھماکے کی اصل وجوہات کا ابھی تعین نہیں ہو سکا، تاہم شبہ ظاہر کیا جا رہا ہے کہ واقعہ گیس لیکیج یا اسٹور کے اندر موجود آتش گیر مواد کے باعث پیش آیا۔

واقعے کے بعد ریسکیو ٹیموں اور طبی عملے نے فوری طور پر زخمیوں کو قریبی اسپتال منتقل کیا، جہاں بعض کی حالت تشویشناک بتائی گئی ہے۔ حکام نے متاثرہ علاقے کو گھیرے میں لے کر تحقیقات شروع کر دی ہیں۔