جنوبی وزیرستان کے علاقے وانا میں دہشت گردوں کی جانب سے کیڈٹ کالج پر حملے کی کوشش کو سیکیورٹی فورسز نے ناکام بنا دیا۔

پاک فوج کے شعبہ تعلقاتِ عامہ (آئی ایس پی آر) کے مطابق حملہ بھارتی پراکسی فتنہ الخوارج سے منسلک دہشت گردوں نے کیا، جو کیڈٹ کالج کی بیرونی دیوار پار کرنے کی کوشش میں تھے۔

ترجمان آئی ایس پی آر کے مطابق چوکس سیکیورٹی فورسز نے فوری اور مؤثر کارروائی کرتے ہوئے دہشت گردوں کی پیش قدمی کو روک دیا۔

 ناکامی پر دہشت گردوں نے بارود سے بھری گاڑی کو کالج کے مرکزی دروازے سے ٹکرا دیا، جس سے مرکزی گیٹ منہدم ہو گیا اور ملحقہ انفراسٹرکچر کو جزوی نقصان پہنچا۔

آئی ایس پی آر کے مطابق سیکیورٹی فورسز کی بہادرانہ کارروائی میں دو دہشت گرد ہلاک ہو گئے، جب کہ تین دہشت گرد کالج کے ایڈمن بلاک میں محصور ہیں۔ علاقے میں کلیئرنس آپریشن جاری ہے تاکہ تمام خطرات کا مکمل خاتمہ کیا جا سکے۔

فوج کے ترجمان نے بتایا کہ دہشت گرد افغانستان میں موجود اپنے آقاؤں سے رابطے میں تھے، اور یہ حملہ آرمی پبلک اسکول پشاور کے سانحے کو دہرانے کی مذموم کوشش تھی۔ ان کا مقصد سابقہ قبائلی علاقوں کے نوجوانوں میں خوف و ہراس پھیلانا تھا۔

آئی ایس پی آر نے کہا کہ افغانستان میں دہشت گردوں کی مسلسل موجودگی طالبان حکومت کے دعووں کی نفی کرتی ہے۔ پاکستان کو افغان سرزمین پر موجود دہشت گردوں اور ان کی قیادت کے خلاف کارروائی کا مکمل حق حاصل ہے۔

ترجمان نے واضح کیا کہ آپریشن عزمِ استحکام کے تحت دہشت گردی کے مکمل خاتمے تک کارروائیاں جاری رہیں گی۔ سیکیورٹی فورسز اور قانون نافذ کرنے والے ادارے پاکستان سے دہشت گردی کی جڑیں اکھاڑنے کے لیے پرعزم ہیں۔

آئی ایس پی آر کے مطابق پاکستانی عوام اور سیکیورٹی فورسز متحد ہیں اور دہشت گردوں کے مذموم عزائم کو کبھی کامیاب نہیں ہونے دیں گے۔