چاہے آپ ذیابیطس کے مریض ہیں یا نہیں، صحت بخش غذا ہمیشہ ہی آپ کے لیے بہترین ثابت ہوتی ہے۔ تاہم  ذیابیطس کے مریضوں کو بلڈ شوگر کی سطح کو توازن میں رکھنے کے لیے زیادہ خیال رکھنا پڑتا ہے۔

ذیابیطس کے مریض کی خوراک میں پھل، سبزیاں، مکمل اناج اور کم چکنائی والی ڈیری مصنوعات شامل  ہونی چاہئے جبکہ مٹھائیاں اور سرخ گوشت سے پرہیز ضروری ہے۔

ماہرین کے مطابق چند مشروبات ایسے ہیں جنہیں ذیابیطس کے مریض اگر صبح خالی پیٹ استعمال کریں تو یہ دن بھر ان کے بلڈ شوگر کو توازن میں رکھنے میں مددگار ثابت ہوسکتے ہیں۔

ذیابیطس کے مریضوں کے لیے صبح کے بہترین مشروبات

اگر آپ ذیابیطس کے مریض ہیں تو آپ اپنے دن کی شروعات کچھ بہترین مشروبات سے کر سکتے ہیں۔ لیکن بہتر ہو گا کہ انہیں اپنی روزمرہ کی خوراک میں شامل کرنے سے پہلے اپنے ماہر صحت یا معالج  سے ضرور مشورہ کریں۔

لیموں کے ساتھ گرم پانی

ماہرین کے مطابق ایک گلا س نیم گرم پانی میں لیموں کی کچھ مقدار کو شامل کر کے پینا  ڈی ٹاکسی فیکیشن اور وزن کو کنٹرول کرنے میں مدد فراہم کرتا ہے، جو ذیابیطس کے مریضوں کے لیے انتہائی ضروری ہے۔

دار چینی کی چائے

دار چینی انسولین کی حساسیت کو بہتر بنانے کے لیے جانی جاتی ہے، لہٰذا چائے میں دار چینی ڈال کر پینے سے خون میں شوگر کی سطح کنٹرول میں رہتی ہے۔

 کریلے کا رس

کریلا ایک انتہائی صحت بخش سبزی ہے اس میں ایسے اجزاء پائے جاتے ہیں جو جسم میں انسولین کی طرح کا ردعمل پیش کرتے ہیں، اس طرح خون میں شکر کی سطح کو کم کرنے میں معان ثابت ہوتے ہیں۔ یہی وجہ ہے کہ ماہرین صبح کے وقت اس کا استعمال خاص طور پر موثر قرار دیتے ہیں۔

 میتھی دانے کا پانی

میتھی کے بیج حل پذیر فائبر سے بھرپور ہوتے ہیں جو کہ بلڈ شوگر کو کنٹرول کرنے میں اہم کردار ادا کرتے ہیں۔ میتھی کے بیجوں کو رات بھر پانی میں بھگو کر صبح نہار منہ اس پانی کو استعمال کریں۔

آملہ کا رس

آملہ، جسے گوزبیری بھی کہا جاتا ہے، وٹامن سی سے بھرپور ہوتا ہے یہ بلڈ شوگر کو کنٹرول کرنے اور مدافعتی نظام کو مضبوط بنانے میں مددگار ثابت ہوتا ہے، جو ذیابیطس کے مریضوں کے لیے بہت ضروری ہے۔

ایلو ویرا جیل 

ایلوویرا کی افادیت سے کون واقف نہیں یہ ایک ایسا شفابخش جیل ہے جسے جلد پر لگایا جائے یا غذا میں شامل کیا جائے فائدہ مند ثابت ہوتا ہے، ساتھ ہی اس میں ہائپوگلیسیمک اثرات بھی ہوتے ہیں، اس لیے خالی پیٹ ایلو ویرا کا جوس تھوڑی مقدار میں پینا بلڈ شوگر کو کنٹرول کرنے میں مددگار ثابت ہوتا ہے۔

ان مشروبات کو خالی پیٹ لینے کا مشورہ اس لیے دیا جاتا ہے کہ خالی پیٹ ان مشروبات کی تاثیر بڑھ جاتی ہے کیونکہ صبح کے وقت معدہ خالی ہوتا ہے اور اس میں کوئی دوسری غذائیں نہیں ہوتی جو ان کے جذب میں رکاوٹ بنیں، اس طرح ان مشروبات کو خالی پیٹ لینے سے ان کی افادیت کئی گنا بڑھ جاتی ہے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں