مکئی جسے بھٹا بھی کہا جاتا ہے ایک ایسا صحت بخش اناج ہے جسے کسی بھی طرح سے استعمال کیا جائے یہ آپ کی صحت کو بڑھانے میں اہم کردار ادا کرتا ہے۔

کارن کے نام سے مشہور یہ اناج دنیا بھرمیں سب سے زیادہ کھائی اور اگائی جانے والی ایک اہم ترین غذا ہے۔ اس کی کئی اقسام ہیں جبکہ یہ مختلف رنگوں میں پیدا ہوتا ہے۔

چونکہ مکئی قدرتی طور پر گلوٹین سے پاک ہوتا ہے، اس لیے اسے گندم کی جگہ استعمال کرنا اچھا انتخاب ہے۔ یہ اہم وٹامنز، معدنیات اور اینٹی آکسیڈنٹس سے بھرپور ہوتا ہے جو آپ کے لیے کئی طرح سے فائدہ مند ثابت ہوتا ہے۔

تاہم سردیوں میں اس کا استعمال آپ کی قوت مدافعت کو بڑھا کر موسمی بیماریوں سے بچا کر صحت مند رکھتا ہے۔

خشک کارن کو پیس کر اس کا آٹا تیار کیاجاتا ہے جسے کارن فلور کہاجاتا ہے یہ عموماً سوپ کو گاڑھا کرنے کے لیے استعمال کیاجاتا ہے ساتھ ہی بیکری کی مصنوعات میں اس کا کثرت سے استعمال کیاجاتا ہے۔

موسم سرما کی خاص سوغات مکئی کی روٹی اور سرسوں کا ساگ تو سب ہی نے کھایا ہوگا تاہم یہاں پر مکئی کے آٹے کی سرد موسم کے حوالے سے 5 فائدے پیش کیے جارہے ہیں۔

غذائیت سے بھرپور

مکئی کے آٹے سے تیار لذیذ روٹی نہ صرف آپ کے ذائقے کو بڑھاتی ہے بلکہ بہترین غذائیت بھی فراہم کرتی ہے اس میں فائبر، کاربوہائیڈریٹس، وٹامنز اور آئر کی کثیر مقدار پائی جاتی ہے اس طرح مکئی کا آٹا آپ کی خوراک میں ایک بہترین اضافہ ہے۔

قوت مدافعت بڑھائے

سردیوں کاٹھنڈا لمس اکثر قوت مدافعت کو کمزور کر دیتا ہے جس سے آپ نزلہ و زکام اور کھانسی جیسی موسمی بیماریوں میں مبتلا ہوجاتے ہیں۔

مکئی کے آٹے کو غذا میں شامل کر کے ونٹر بلیوز سے نمٹ سکتے ہیں، وٹامنز اور زنک سے بھرپور، یہ سنہری اناج مدافعتی نظام کو مضبوط بناتا ہے، جس سے آپ کو صحت مند رہنے میں مدد ملتی ہے۔

 توانائی کا مؤثر ذریعہ

مکئی کا آٹا صرف ایک اعلیٰ ذائقہ ہی فراہم نہیں کرتا بلکہ یہ فوری توانائی کے حصول ایک ذریعہ بھی ہے۔ یہ کاربوہائیڈریٹس بھرپور صحت بخش توانائی فراہم کرتا ہے، جس سے آپ کو سرد موسم  سے نمٹنے میں مددملتی ہے۔

جسم گرم رکھنے کی صلاحیت

جب سردیوں کا آغاز ہوتا ہے تو لوگوں کی بڑی تعداد گرم تاثیر رکھنے والے کھانوں کی طرف راغب  ہوجاتی ہے تاکہ ان مزیدار کھانوں کے ذائقوں سے لطف اندوز ہونے کے ساتھ جسم کو بھی گرم رکھا جاسکے۔مکئی کے آٹے کا مزاج گرم ہوتا ہے اس لیے سردموسم میں اس کا استعمال جسم کو گرم رکھتا ہے۔

صحت مند ہاضمہ

سرد موسم میں اکثر ہاضمے کے مسائل جنم لینے لگتے ہیں، مکئی کے آٹا فائبر سے بھرپور ہونے کی بنا پر قبض کو دور کرتا ہے، آنتوں کی حرکت کو یقینی بناتا ہے، اور مجموعی طور پر ہاضمہ کی صحت کو فروغ دیتا ہے مزید یہ کہ اس میں فائبر کی اعلیٰ سطح  بھوک کو کم کرنے اور کم کیلوریز کی مقدار کو فروغ دے کر وزن کم کرنے میں مدد دیتی ہے ۔