بسیارخوری یا زیادہ کھانا موٹاپے کی سب سے اہم وجہ ہے دیکھا گیا ہے کہ صحت مند موٹے افراد وقت بے وقت کھاتے رہتے ہیں اس عمل کو روکنے کے لیے آپ اپنا ہاتھ تو نہیں روک سکتے لیکن سائنسدانوں نے ایک ایسا تھرتھراتا ہوا کیپسول بنایاہے جسے کھانے سے آدھے گھنٹے پہلے کھالیا جائے تو اس کے بعد بھوک کم لگتی ہے۔

اس کیپسول کی سب سے خاص بات یہ ہے کہ اسے لینے کے بعد صرف چالیس یا پچاس فیصد کھانا کھانے پر انسان خود کو سیر محسوس کرنے لگے گا۔

اگرچہ اس کیپسول کے انسانوں پر تجربات نہیں کیے گئے ہیں لیکن بعض خنزیروں پر اس کی آزمائش کی گئی ہے جس کے نہایت حوصلہ افزاء نتائج سامنے آئے ہیں۔ جب ان کیپسول نما گولی کوخنزیروں پر آزمایا گیا اور ان کو یہ کیپسول دیئے گیے توان میں اکثریت نے معمول سے چالیس فیصد کم کھانا کھایا کیونکہ ان کو پیٹ بھرنے کا احساس ہوچکا تھا۔

اس ایجاد کو وائبریٹنگ انجسٹیبل بائیو الیکٹرونک اسٹیمیولیٹریا وائبس کانام دیا گیا ہے۔

یہ کیپسول نما گولی معدے میں جاکر تھرتھراہٹ پیدا کرتی ہے اس تھرتھراہٹ سے جانوروں کو اور ممکنہ طور پر انسانوں کو بھی یہ محسوس ہوسکے گا کہ ان کا پیٹ بھر چکا ہے اوروہ شکم سیر ہوچکے ہیں یہی وجہ ہے کہ خنزیروں پر اس کی آزمائش انتہائی کامیاب رہی ہے۔

دیکھنے میں یہ ملٹی وٹامن کی ایک بڑی سی گولی کی طرح لگتی ہے جسے ایم آئی ٹی کے پروفیسر جیوانی ٹریورسو اور ان کے ساتھیوں نے بنایا ہے۔

ان کا کہنا ہے کہ اگر خالی پیٹ اس گولی کو لے لیا جائے یعنی کھانے کے بیس سے تیس منٹ پہلے تو یہ اپنا کام شروع کر دیتی ہے اور جب آپ کھانا کھانے لگتے ہیں تو یہ آپ کو فوری طور پر ایک پلیٹ کھانے کے یا نصف کھانے کے بعد احساس ہونے لگے گا کہ آپ کا پیٹ بھر چکا ہے تو اس طرح آپ کھانے سے اپنا ہاتھ کھینچ لیں گے۔ چونکہ آپ کھانا کم کھائیں گے تو جسم کے اندر لحمیات اور چکنائی کم جمع ہوگی اور یوں وزن بڑھنے کو روکا جاسکے گا۔

دلچسپ بات یہ ہے کہ امریکا میں وزن گھٹانے اور موٹاپا کم کرنے لیے ادویات بنانے والی انڈسٹری کا اربوں ڈالر کا کروبار ہے یہی وجہ ہے کہ اس تھرتھراتی گولی کے لیے بہت ساری طبی کمپنیاں اور میڈیکل فارماسوٹیکل کمپنیوں نے بھی دلچسپی کا اظہار کیا ہے، تاہم یہ انسانوں کے اوپر کتنی افادیت ثابت کر سکے گی یہ کہنا قبل از وقت ہے ۔