موسم گرما اپنے ساتھ کئی مزیدار پھلوں کی سوغات لے کر آتا ہے ان میں آڑو بھی شامل ہے۔ آڑو نہایت میٹھا اور رسیلا پھل ہے اور انتہائی صحت بخش پھل ہے جو ٹھنڈی تاثیر رکھنے اور پانی سے بھرپور ہونے کی بنا پر گرمی کو دور کرنے میں اپنی مثال نہیں رکھتا۔

ایک کپ کٹے ہوئےآڑو میں جن صحت بخش اجزاء کا تناسب پایا جاتا ہے ان میں 65 کیلوریز، 1.53 پروٹین، 16 گرام کاربوہائیڈریٹ، 14 گرام چینی، 2.52 گرام فائبراور 11 گرام وٹامن سی شامل ہیں۔

یہاں پر آڑو کے 10 فوائد پیش کیے جارہے ہیں جنہیں جان کر آپ اسےکھانے پر مجبور ہوجائیں گے۔

اینٹی آکسیڈنٹس سے بھرپور

آڑو میں موجود اینٹی آکسیڈنٹس جسم کو فری ریڈیکلز سے بچانے میں مدد دیتے ہیں، جس سے دل کی صحت بہتر ہوتی ہے اور کینسر کا خطرہ کم ہوتا ہے۔

دل کی صحت کے لیے مفید

آڑو میں موجود پوٹاشیم اور فائبر دل کو مضبوط رکھنے میں مددگار ثابت ہوتے ہیں۔ یہ بلڈ پریشر کو توازن میں رکھنے کے ساتھ امراض قلب سے تحفظ فراہم کرتت ہیں۔

جلد کی خوبصورتی میں اضافہ

آڑو میں موجود وٹامن اے اور وٹامن سی جلد کو قدرتی چمک فراہم کرنے کے ساتھ عمر رسیدگی کے اثرات  کو کم کرتے ہیں۔

بینائی کے لیے مفید

آڑو میں موجود وٹامن اے اور بیٹا کیروٹین آنکھوں کی صحت بڑھاتے ہیں۔ یہ بینائی کو بہتر بنانے اور آنکھوں کی بیماریوں سے بچانے میں مددگار ہیں۔

بہتر نظام ہاضمہ
آڑو میں فائبر کی وافر مقدار موجود ہوتی ہے جو نظام ہاضمہ کو بہتر بنانے میں اہم کردار ادا کرتی ہے۔ یہ قبض سے نجات دلانے میں بھی معاون ہے۔

جسمانی سوزش کم کرے

آڑو میں سوزش کم کرنے والی خصوصیات پائی جاتی ہیں جو جوڑوں کے درد اور جسمانی سوزش کو کم کرنے میں مدد دیتی ہے۔

قوت مدافعت بڑھائے

آڑو میں موجود وٹامن سی جسم کے مدافعتی نظام کو تقویت بخشتا ہے، جس سے مختلف بیماریوں سے بچاؤ میں مدد ملتی ہے۔

وزن کم کرنے میں مددگار
آڑو کیلوریز میں کم اور فائبر میں زیادہ ہوتا ہے، جو وزن کم کرنے کے خواہشمند افراد کے لیے بہترین پھل ثابت ہوسکتا ہے۔

ہڈیوں کی مضبوطی
آڑو میں کیلشیم اور فاسفورس پایا جاتا ہے جو ہڈیوں کو مضبوط بناتا ہے اور ہڈیوں کی بیماریوں سے بچاتا ہے۔

ذہنی دباؤ کو کم کرے
آڑو میں موجود میگنیشیم ذہنی دباؤ اور پریشانی کو کم کرنے میں مدد دیتا ہے، جس سے ذہنی سکون حاصل ہوتا ہے۔