ورزش آپ کے قلب سمیت مجموعی صحت کے لیے انتہائی ضروری ہے، تاہم اگر آپ بڑھتی عمر میں بلڈ پریشر سے بچنا چاہتے ہیں ورزش کا آغاز نوجوانی سے کریں، یہ بات حال ہی میں کی جانے والی ایک تحقیق میں سامنے آئی ہے۔

اس نئی تحقیق میں امریکہ کے چار شہروں سے 5,100 سے زیادہ افراد کو شامل کیا گیا، اور ان کی صحت کا تین دہائیوں تک جائزہ لیا گیا۔ جبکہ ان کی جسمانی حالت، ورزش کے عادات، تمباکو نوشی اور شراب نوشی کے بارے میں سوالات کیے گئے۔

اس تحقیق کے نتائج کے مطابق ایسے تمام افراد جنہوں نے نوعمری اور ابتدائی بیس برس کی عمر میں جسمانی سرگرمیوں کو زیادہ وقت تک برقرار رکھا یعنی وہ ہفتے میں پانچ دن تک ورزش کیا کرتے تھے اور اسے طویل عرصے تک برقرار رکھا ان میں عمر بڑھنے پر بلڈ پریشر کا خطرہ کم تھا بہ نسبت ایسے افراد کے جنہوں نے اپنی ابتدائی عمر میں تو ورزش کی تاہم وقت کے ساتھ مصروفیات کی وجہ سے اسے جاری نہ رکھ سکے یا اس کا دورانیہ کم کردیا۔

ہائی بلڈ پریشر، جسے ہائپر ٹینشن بھی کہا جاتا ہے، صحت کا ایک سنجیدہ مسئلہ ہے جو دنیا بھر میں اربوں لوگوں کو متاثر کرتا ہے۔ یہ دل کے دورے اور فالج کا سبب بن سکتا ہے، اور بعد کی زندگی میں ڈیمینشیا کے خطرے کو بھی بڑھا سکتا ہے۔

عالمی صحت کی تنظیم کے مطابق، ہر چار مرد حضرات میں سے ایک اور تقریباً ہر پانچ خواتین میں ایک خاتون کو ہائی بلڈ پریشر ہے۔ مگر زیادہ تر لوگوں کو اس کا علم نہیں ہوتا، اسی لیے اسے “خاموش قاتل” کہا جاتا ہے۔

محققین کا کہنا ہے کہ جوانی کا دور ہائی بلڈ پریشر سے بچنے کے لیے بہت اہم ہے، اور  صحت کے فروغ کے لیے ایسے پروگراموں کی ضرورت ہے جو ورزش کو بڑھا سکیں۔

محققین نے کہا کہ موجودہ بالغوں کے لیے کم از کم ورزش کی ہدایات سے دوگنا ورزش کرنا ہائی بلڈ پریشر کی روک تھام کے لیے زیادہ فائدہ مند ثابت ہو سکتا ہے۔