دن کا آغاز ایک بھر پور ناشتے سے ہونا چاہئے، کیونکہ یہ دن کا سب سے اہم کھانا ہوتا ہے اور اسی پر باقی دن کی توانائی کا دارومدارہوتا ہے اسی لیے کہاجاتا ہے کہ ناشتہ بادشاہ کی طرح کرنا چاہئے۔ تاہم لوگوں کی بڑی تعداد ناشتہ کرتے وقت کچھ عام سی غلطیاں کرنے لگتی ہیں جو ان کی صحت کو متاثر کرتی ہیں۔

یہاں پر ان پانچ بڑی غلطیوں کا ذکر کیا جارہا ہے جن سے بچ کر آپ اپنے دن کی شروعات کو بہتر بنا سکتے ہیں۔

ناشتہ نہ کرنا

بہت سے لوگ صبح کا ناشتہ نہیں کرتے، خاص طور پر اپنی مصروفیت کی وجہ سے۔ تاہم حال ہی میں کی جانے والی تحقیق سے یہ بات سامنے آئی ہے کہ ناشتہ چھوڑنا جسمانی صحت کو بری طرح متاثر کرتا ہے، جو لوگ باقاعدگی سے ناشتہ کرتے ہیں، ان میں امراض قلب اور ذیابیطس کا خطرہ کم ہوتا ہے۔ ناشتہ کرنا میٹابولزم کو بہتر بناتا ہے اور دن بھر توانائی فراہم کرتا ہے۔

زیادہ شکر والے ناشتے

بہت سے لوگ صبح کے وقت شکر سے بھرپور اشیاء جیسے ڈونٹس یا پین کیکس کا انتخاب کرتے ہیں۔ ناشتے میں ان کا استعمال فوری توانائی کا باعث بنتا ہے، لیکن یہ خون میں شکر کی سطح کو بھی تیزی سے بڑھاتے ہیں، جو بعد میں تھکاوٹ کا سبب بن سکتا ہے۔ ایک تحقیق سے پتہ چلا ہے کہ کم شکر والے ناشتے، جیسے دلیہ یا پھل، زیادہ دیر تک توانائی برقرار رکھتے ہیں۔

پروٹین کی کمی

ناشتے میں پروٹین کی کمی بھی ایک عام غلطی ہے۔ ناشتہ میں مناسب مقدار میں پروٹین شامل کرنے سے آپ کو بھوک کم لگتی ہے اور دن بھر آپ کی توانائی برقرار رہتی ہے۔ تحقیق نے ثابت کیا ہے کہ پروٹین کا استعمال وزن کم کرنے اور عضلات کی صحت کے لیے بھی مفید ہے۔ ایک مثالی ناشتہ میں انڈے، دہی یا نٹس شامل کیے جا سکتے ہیں۔

نشاستے کی زیادتی

بہت سے لوگ ناشتہ میں زیادہ نشاستے والے کھانے، جیسے روٹی یا سیریلز، کا انتخاب کرتے ہیں۔ یہ کھانے اگرچہ مزیدار ہوتے ہیں، مگر ان میں غذائیت کم ہوتی ہے۔ تازہ تحقیق کے مطابق، سبزیوں، پھلوں، اور صحت مند چکنائیوں کا اضافہ ناشتہ کی غذائیت میں اضافہ کرتا ہے اور صحت کو بہتر بناتا ہے۔

ہائیڈریشن کی کمی

بہت سے لوگ صبح کے وقت پانی پینا بھول جاتے ہیں، حالانکہ ہائیڈریشن بہت اہم ہے۔ پانی پینا میٹابولزم کو بہتر بناتا ہے اور جسم کو دن بھر تروتازہ رکھتا ہے۔ تازہ تحقیق میں یہ بھی دیکھا گیا ہے کہ مناسب ہائیڈریشن دماغی کارکردگی کو بہتر بناتی ہے، جس سے آپ کی توجہ اور یادداشت میں بہتری آتی ہے۔