اومیگا 3 فیٹی ایسڈزایسی صحت مند چکنائیاں ہیں جو امراض قلب، ڈیمنشیا اور کئی دائمی امراض کے خطرے میں کمی لانے میں معاون ثابت ہوتی ہیں، لیکن حال ہی میں کی جانے والی ایک تحقیق میں اس کا اور اہم فائدہ سامنے آیا ہے۔

اومیگا 3 فیٹی ایسڈز کے طبی فوائد کی ایک طویل فہرست ہے تاہم ایک نئی تحقیق کے مطابق اب یہ بچوں میں قریب کی نظر کی کمزوری سے بھی بچاسکتا ہے جسے مایوپیا کہا جاتا ہے۔

یہ بھی پڑھیں: قریب کی بینائی درست کرنے والی انقلابی دوا تیار

چینی یونیورسٹی آف ہانگ کانگ کے ماہر چشم اور تحقیق کے مرکزی مصنف ڈاکٹر جیسن یم نے کہا کہ تحقیق کے نتائج یہ بات سامنے آئی ہے کہ اومیگا تھری فیٹی ایسڈزقریب کی کم نظری کے خلاف ایک ممکنہ تحفظ فراہم کرنے والی غذا ثابت ہوسکتی ہے، جبکہ دوسری جانب مکھن، پام آئل اور سرخ گوشت میں موجود سچورٹیڈ فیٹس اس طرح بینائی کی کمزوری  کے خطرے کو بڑھا سکتی ہیں۔

اس تحقیق میں 1,000 سے زائد ایسے چینی بچوں کو شامل کیا گیا جن کی عمریں 6 سے 8 سال کے درمیان تھی،  ان تمام بچوں کی غذائی عادات سوالناموں کے ذریعے جائزہ لیا گیا، اور تحقیق سے پہلے کیے جانے والے آنکھوں کے معائنہ کا موازنہ نتائج سے کیا گیا۔

تحقیق کے نتائج کے مطابق تقریباً ایسے بچے جن کی غذا میں اومیگا تھری فٹی ایسڈ کی مقدار کم تھی ان میں 28 فیصد نظر کی کمزوری پائی گئی بہ نسبت ان بچوں کے جو اومیگا تھری فیٹی ایسڈ کی بہتر مقدار لے رہے تھے، تاہم کسی اور غذائی اجزاء کا قریب کی نظر کی کمزور (مایوپیا) سے تعلق نہیں سامنے آیا۔

ماہرین کا خیال ہے کہ اومیگا تھری آنکھوں میں خون کے بہاؤ کو بہتر بنا کر آنکھوں کی صحت مند نشوونما میں مدد دیتا ہے جس سے قریب کی نظر بہتر رہتی ہے۔