جنوری کے آخری ہفتے میں پشاور کے علاقے پولیس لائنز میں ایک مسجد میں ہونے والے بم دھماکے میں 100 سے زائد افراد شہید اور متعدد زخمی ہو گئے۔ اس افسوسناک واقعے کے ردعمل میں پاکستان کے معروف فنکاروں اور مشہور شخصیات جیسے کرکٹر بابراعظم، شاہین شاہ آفریدی، محمد حفیظ اور افتخار احمد کے علاوہ اداکار فیصل قریشی، عدنان صدیقی، احمد علی بٹ اور صبا قمر نے متاثرین کے لیے دعائے مغفرت کی اور شہداء کے اہل خانہ سے گہرے دکھ کا اظہار کیا۔

اداکار عدنان صدیقی نے اپنے پیغام میں ان مجرموں سے شدید نفرت کا اظہار کیا جنہوں نے بے گناہ لوگوں پر حملہ کیا اور وہ بھی مسجد جیسی مقدس جگہ پر۔ ٹی وی اور فلم کی اداکارہ صبا قمر نے متاثرین کے لیے دعا کی اور اپنے سوشل میڈیا ہینڈل پر ٹوٹے دل والا ایموجی پوسٹ کیا۔

پاکستان کے مایہ ناز فاسٹ بولر شاہین شاہ آفریدی نے ایسے واقعات کو روکنے کا مطالبہ کرتے ہوئے اپنے ٹوئٹر اکاؤنٹ میں لکھا کہ اُن کا دل رو رہا ہے۔ شاہین شاہ آفریدی کے مطابق، “میرا دل اپنے ملک کے لوگوں کو تکلیف میں دیکھ کر روتا ہے، تمام متاثرین کی جلد صحت یابی کے لیے دعاگو ہوں اور میری ہمدردیاں متاثرہ خاندانوں کے ساتھ ہیں۔ یہ سلسلہ رکنا چاہیے!”۔

پاکستان کے نمبر ایک بلے باز اور کپتان بابر اعظم نے ٹویٹ کیا، ’’پشاور سے تباہ کن خبر‘‘۔ جاں بحق ہونے والوں کے اہل خانہ سے میری دلی تعزیت اور زخمیوں کی جلد صحت یابی کی دعا۔ اللہ پاک ہمارے پیارے ملک پر رحم فرمائے”۔

کرکٹر محمد حفیظ نے شہداء اور متاثرہ خاندانوں کے لیے دعا کی۔ پاکستان کے ٹی ٹوئنٹی کھلاڑی افتخار احمد نے متعلقہ حکام سے قصورواروں کے خلاف فوری کارروائی کرنے اور اس گھناؤنے فعل میں شامل افراد کو سزا دینے کی درخواست کی۔

اپنے تعزیتی پیغام میں اداکار فیصل قریشی نے ملک کی سلامتی کے لیے دعا کی اور لوگوں کو یاد دلایا کہ قصورواروں کو آخرت میں سزا ملے گی۔ اداکار احمد علی بٹ کے مطابق پشاور بم دھماکا “پرانے، خوفناک پاکستان” میں واپسی کا خیرمقدم تھا۔