2023ء میں پاکستان کے سیاسی، معاشی حالات مایوس کن نظر آتے ہیں

نئے سال میں بھی پاکستان کے مجموعی سیاسی اور معاشی حالات مایوس کن اور حوصلہ شکن نظر آتے ہیں۔ پاکستان مسلم لیگ (ن) کی زیر قیادت مخلوط حکومت کی غیر مقبول سیاسی ساکھ اور حزب اختلاف کی واحد جماعت پاکستان تحریک انصاف (پی ٹی آئی) کے ساتھ محاذ آرائی نے ملک میں سیاسی اور معاشی بحران میں مزید اضافہ کردیا۔

اگرچہ وزیر اعظم شہباز شریف اور وزیر خزانہ اسحاق ڈار نے بارہا یہ دعویٰ کیا کہ ملک دیوالیہ نہیں ہو گا، لیکن تمام اسٹیک ہولڈرز اور ماہرین ایک تاریک منظرنامہ پیش کر رہے ہیں۔

ختم ہونے والا سال ملک کے لیے کسی حد تک ڈراؤنا خواب تھا۔ سیاسی بحران، بگڑتے ہوئے اقتصادی حالات اور دہشت گردی کی واپسی نے عام آدمی کی زندگی اجیرن کر دی ہے۔

سیاسی قوتوں کے درمیان مستقل تصادم کی کیفیت اور ریاستی اداروں کے حقیقی معنوں میں خاتمے نے ملک کو انارکی کے قریب دھکیل دیا ہے۔ قرضوں کی قسط کی عدم ادائیگی کا امکان یقینی نظر آرہا ہے، معیشت کے حوالے سے یہ نقطہ نظر انتہائی سنگین لگتا ہے۔

پاکستان کو مستقبل قریب میں خوفناک اندرونی اور بیرونی چیلنجز کا سامنا ہے اور کیا ہم ان موجودہ بحرانوں پر قابو پانے کے لیے لچک دکھا سکتے ہیں، بحیثیت قوم ہمارے لیے ایک بڑا مسئلہ ہے۔

بزنس مین گروپ کے چیئرمین اور ملک کے معروف صنعت کار زبیر موتی والا نے اس حوالے سے کہا کہ حکومت سیاسی اور معاشی بحرانوں پر قابو پانے کے لیے کوئی کوشش نہیں کر رہی۔

حکمران بغیر کسی مقصد کے ٹال مٹول سے کام لے رہے ہیں۔ انہوں نے مزید کہا کہ اگرچہ ملک کو ماضی میں بھی متعدد معاشی بحرانوں کا سامنا کرنا پڑا، لیکن اس بار توانائی کی بلند قیمتوں، ادائیگیوں کے توازن کا بحران، بین الاقوامی مالیاتی فنڈ (آئی ایم ایف) کے حالات اور سب سے اہم سیلاب کی تباہی نے ملکی مارکیٹ کو تہس نہس کر دیا ہے۔ انہوں نے کہا کہ ہر کوئی برآمدات کی بات کرتا ہے لیکن یہ ہماری جی ڈی پی کا صرف 8 فیصد ہے، جب کہ ملک میں پیدا ہونے والی بقیہ 92 فیصد اشیا مقامی مارکیٹ استعمال کر رہی ہیں، جو اپنی قوت خرید کا تقریباً 50 فیصد کھو چکی ہے۔

زبیر موتی والا کے مطابق سیلاب نے تقریبا 50 فیصد زرعی پیداوار کو نقصان پہنچایا ہے، جس سے نہ صرف کسان روزگار سے محروم ہوگئے ہیں بلکہ غربت میں بھی اضافہ ہوا اور مہنگائی بھی آسمان کو چھو رہی ہے۔انہوں نے کہا کہ منقسم اتحادی حکومت ملک کو مشکلات سے نکالنے کی صلاحیت نہیں رکھتی۔ معقول فیصلے کرنے میں اس کی ناکامی نے معاشی بحران کو مزید گہرا کر دیا ہے۔اندرونی کشمکش نے بھی اس کی بہتری کی صلاحیت کو کمزور کر دیا ہے۔حکومت کا زر مبادلہ کی شرح پر کوئی کنٹرول نہیں ہے۔ درآمد کنندگان اور اب برآمد کنندگان کو اپنے لیٹر آف کریڈٹ (LCs) کھولنے میں بہت زیادہ مشکلات کا سامنا ہے اور برآمدات میں کمی کی ایک بڑی وجہ خام مال کی کمی ہے۔

زبیر موتی والا نے کہا کہ وہ اس کمیٹی کا حصہ تھے، جو مرکزی بینک نے درآمد کنندگان کو درپیش مسائل کے حل کے لیے بنائی تھی، لیکن ان کی سفارشات پر کبھی عمل نہیں کیا گیا۔ وزارت خزانہ نے اسٹیٹ بینک آف پاکستان کو واضح طور پر ہدایت کی ہے کہ وہ اپنے زرمبادلہ کے ذخائر کو 7 ارب ڈالر پر برقرار رکھے اور اسے کسی بھی قیمت پر اس سطح سے نیچے نہیں جانا چاہیے۔

ان کا کہنا تھا کہ مجھے نہیں لگتا کہ یہ صورتحال مزید طول پکڑے گی اور میں ٹیکنو کریٹس پر مشتمل ایک عبوری قومی حکومت کی پیش گوئی کر رہا ہوں اور شاید اس معاشی افراتفری کو ختم کرنے کے لیے سیاسی جماعتوں کے ایک یا دو نمائندےاس میں شامل کیے جائیں۔

زبیر موتی والا کے خیال میں موجودہ صورت حال میں پرامن، آزادانہ اور منصفانہ انتخابات کا انعقاد ممکن نہیں۔ ملک میں سیاسی اور معاشی استحکام لانے کے لیے اس عبوری سیٹ اپ کو کم از کم ایک سال لگ سکتا ہے۔

تاہم، 2023ء کی پہلی سہ ماہی میں برآمدات میں تیزی آئے گی، جو توانائی کی بین الاقوامی قیمتوں میں کمی کی وجہ سے شرح مبادلہ پردباؤ کو کم کرے گی۔انہوں نے اپنی رائے کا اظہار کیا کہ ایک امیدپرست اور معاشی بنیادی اصولوں پر پختہ یقین رکھنے والے شخص کے ناطے میں جانتا ہوں کہ ہم موجودہ صورتحال سے باہر نکل آئیں گے اور معیشت کو بحال کرنے کے لیے لچک کا مظاہرہ کریں گے جیسا کہ ہم نے ماضی میں کیا تھا۔

سینئر ماہر اقتصادیات اور سسٹین ایبل ڈیویلپمنٹ پالیسی انسٹی ٹیوٹ (SDPI) کے ایگزیکٹو ڈائریکٹر ڈاکٹر عابد قیوم سلہری نے کہا کہ قبل از وقت انتخابات کے ذریعے سیاسی استحکام موجودہ معاشی بحران پر قابو پانے کی کلید ہو سکتا ہے۔انہوں نے کہا کہ اس کے بعد ہی آئی ایم ایف پروگرام پر پیش رفت کے علاوہ موسمیاتی تبدیلی اور خارجہ پالیسی ملک کی معاشی تقدیر کا فیصلہ ہوگا۔

انہوں نے مزید کہا کہ وسیع پیمانے پر سیلاب نے ملک میں اشیائے خوردونوش کی شدید قلت پیدا کر دی ہے۔ اگر ملک میں کوئی غیر متوقع ہیٹ ویو یا سیلاب دوبارہ آتا ہے، تو یہ ہمارے غذائی تحفظ کے لیے سنگین خطرہ پیدا کر سکتا ہے۔

ڈاکٹر عابد قیوم سلہری نے کہا کہ جغرافیائی سیاسی صورتحال اور حکومت کی خارجہ پالیسی بھی ملک کی معاشی سمت متعین کرنے میں کلیدی کردار ادا کرتی ہے۔

انہوں نے کہا کہ روس اور یوکرین کی جنگ کے بعد عالمی محاذ پر نئی صف بندی ہوئی ہے، جیسا کہ روس، چین اور سعودی عرب ایک نئے بلاک کے قیام کے قریب آ رہے ہیں، جب کہ امریکہ اور یورپی یونین پہلے ہی متحد تھے۔ اب، پاکستان ایک مشکل صورتحال کا سامنا کر رہا ہے اور وہ زیادہ دیر تک غیر جانب دار نہیں رہ سکتا۔

انہوں نے مزید کہا کہ آئی ایم ایف پروگرام کی قسمت اور عالمی بینک جیسی کثیر الجہتی ایجنسیوں سے ملنے والی فنڈنگ کا انحصار امریکہ اور اس کے اتحادیوں کے ساتھ ہمارے تعلقات پر ہے کیونکہ ان اداروں کی ڈور ان کے پاس ہے۔تاہم، خطے میں استحکام روس اور چین کے ساتھ تعلقات پر منحصر ہے۔ روس پاکستان کی توانائی کی ضروریات پوری کر سکتا ہے لیکن اس میں کچھ وقت لگے گا۔

چائنا پاکستان اکنامک کوریڈور (سی پیک) کے بارے میں ڈاکٹر عابد قیوم سلہری نے کہا کہ بدقسمتی سے یہ غیر مؤثر ثابت ہوا ہے اور اس سے اب تک شاید ہی کوئی معاشی ترقی ہوئی ہے اور نہ ہی بڑی تعداد میں ملازمتیں پیدا ہوئی ہیں۔

انہوں نے مزید کہا کہ روس اور یوکرین کے اس تنازع نے ہم جیسی ترقی پذیر معیشتوں کو پہلے ہی نقصان پہنچایا ہے لیکن اگر یہ طول پکڑتا ہے اور خدا نہ کرے، روس سراسر مایوسی کے عالم میں اپنے جوہری آپشن کو استعمال کرے، تو ہم کیا کریں گے، کیونکہ اقوام متحدہ کی کسی بھی قرارداد سے گریز کرنا کوئی آپشن نہیں ہو گا۔ اس لیے ضروری ہے کہ ہم اپنی خارجہ پالیسی کے پیرامیٹرز کا تعین کچھ اصولوں پر کریں۔

آل پاکستان ٹیکسٹائل ملز ایسوسی ایشن (آپٹما) کے چیئرمین آصف انعام نے کہا کہ دو سال کی مضبوط ترقی کے بعد کپاس کی گانٹھوں کی قلت اور توانائی کی بلند قیمتوں کی وجہ سے ٹیکسٹائل کا شعبہ تباہ کن دور سے گزر رہا ہے۔انہوں نے کہا کہ ہمیں 14 ملین گانٹھوں کی ضرورت ہے لیکن سیلاب کی وجہ سے کپاس کی کل پیداوار محض 50 لاکھ گانٹھیں ہیں۔ حکومت ہماری مدد کرنے کی بجائے ٹیکسٹائل ایکسپورٹرز کو کپاس اور دیگر خام مال کے لیے ایل سی کھولنے کے لیے ڈالر فراہم نہ کر کے مسائل پیدا کر رہی ہے۔انہوں نے مزید کہا کہ 500 ارب روپے سے زائد کے سیلز ٹیکس ریفنڈز بھی فیڈرل بورڈ آف ریونیو (ایف بی آر) کے پاس پھنسے ہوئے ہیں اور اسی وجہ سے آپٹما زیرو ریٹنگ نظام کا مطالبہ کر رہا ہے تاکہ برآمد کنندگان کو ورکنگ کیپیٹل کی کمی نہ ہو۔

انہوں نے کہا کہ حکومت کی بے حسی اور غیر سنجیدہ رویے کی وجہ سے ملک کے تقریباً 60 فیصد ٹیکسٹائل یونٹس نے اپنا کام معطل کر دیا ہے، انہوں نے خبردار کیا کہ اگر جلد از جلد اس صورتحال کے تدارک کے لیے اقدامات نہ کیے گئے تو جنوری کے بعد ٹیکسٹائل کی برآمدات متاثر ہو جائیں گی۔ ماہانہ بنیادوں پر 1 ارب ڈالر کی کمی ہو سکتی ہے اور موجودہ مالی سال کا اختتام 23 سے 24 ارب ڈالر پر ہو سکتا ہے، جو گزشتہ سال کے حاصل کردہ 10 ارب ڈالر سے کم ہو گا۔ صرف دسمبر کے ابتدائی 16 روز میں ٹیکسٹائل کی برآمدات میں 30 فیصد کمی واقع ہوئی۔

آصف انعام کے مطابق ٹیکسٹائل سیکٹر کی اپ گریڈیشن میں 6 ارب ڈالر سے زائد کی بھاری سرمایہ کاری کی وجہ سے جلد برآمدی آرڈر آنے کا امکان ہے، جیسا کہ بنگلہ دیش سے ٹیکسٹائل کی برآمدات میں بھی تیزی آ رہی ہے جو کہ ایک اچھا شگون ہے۔

انہوں نے کہا کہ موجودہ مالیاتی ٹیم کے تحت حالیہ دنوں میں پاکستان کے بدترین معاشی بحران سے نکلنے کی تھوڑی سی امید ہے۔ جوہری ہتھیاروں سے لیس ریاست کا اندرونی استحکام اور قومی سلامتی داؤ پر لگی ہوئی ہے۔ آنے والے سال میں معیشت کا استحکام ملک کے لیے سب سے بڑا چیلنج ہونے والا ہے۔

انہوں نے مزید کہا کہ اگرچہ قبل از وقت انتخابات کے امکانات بہت کم ہیں، لیکن موجودہ قومی اسمبلی کی مدت اگست 2023ء میں ختم ہو جائے گی۔ انتخابات میں تقریباً آٹھ ماہ باقی ہیں، تاہم، سیاسی قوتوں کے درمیان مسلسل محاذ آرائی سے آزادانہ اور منصفانہ انتخابات کا انعقاد انتہائی مشکل ہو جائے گا۔ پنجاب میں جاری سیاسی لڑائی نے بھی ماحول کو بگاڑ دیا ہے۔ پنجاب اور خیبرپختونخوا اسمبلیوں کی تحلیل سے بھی صورتحال غیر مستحکم ہو سکتی ہے اور وفاقی حکومت پر دباؤ بڑھ سکتا ہے۔انہوں نے مزید کہا کہ بڑھتے ہوئے سیاسی عدم استحکام اور معاشی بحران کے دوران دہشت گردی کی تازہ لہر نے سیکیورٹی چیلنجز میں مزید اضافہ کر دیا ہے۔ دہشت گردی کی تازہ ترین لہر نے اسلام آباد کو اپنی لپیٹ میں لے لیا ہے، جس نے سرحد پار سے کارروائی کرنے والے کالعدم عسکریت پسندوں کے نیٹ ورکس کے دوبارہ سر اٹھانے کو نمایاں کیا ہے۔ اسلام آباد میں گزشتہ ہفتے ہونے والا خودکش بم حملہ، جس کی ذمہ داری تحریک طالبان پاکستان (ٹی ٹی پی) نے قبول کی تھی، ملک کے اقتدار کے مرکز تک پھیلتے ہوئے دہشت گردی کے خطرے کی ایک سنگین علامت ہے۔

انہوں نے کہا کہ اسلام آباد میں سکیورٹی ہائی الرٹ ہے۔ بڑھتے ہوئے سیاسی عدم استحکام کے تناظر میں یہ ملک کے لیے ایک ڈراؤنا خواب ہے۔ ہم ملکی اور بیرونی محاذوں پر ان متعدد چیلنجوں کا کس طرح مقابلہ کرتے ہیں، یہ ملک کے مستقبل کے لیے اہم ہوگا، کیونکہ امکانات زیادہ امید افزا نظر نہیں آتے۔