توقعات کے عین مطابق، حکومت کی جانب سے بین الاقوامی مالیاتی فنڈ (آئی ایم ایف) کی شرائط کو پورا کرنے کے عزم کے بعد، جمعرات کو ایک ہی دن میں روپیہ کی قدر 24 اعشاریہ 54 گر کر انٹربینک مارکیٹ میں 255 اعشاریہ 43 روپے کی تاریخی کم ترین سطح کو چھو گیا۔

پاکستان تحریک انصاف (پی ٹی آئی) کے ترجمان معیشت و خزانہ مزمل اسلم نے کہا کہ وزیر خزانہ اسحاق ڈار کے دعووں کے باوجود روپیہ ریکارڈ کم ترین سطح پر آگیا اور یہ صرف آغاز ہے۔

انہوں نے مزید کہا، ’’اس کے نتیجے میں افراط زر کا ایک واضح دباؤ ہوگا۔ وزیر خزانہ نے شرح مبادلہ کی حد بندی کر کے بہت بڑا معاشی نقصان اٹھایا ہے۔‘‘

اسماعیل اقبال سیکیورٹیز کے ریسرچ کے سربراہ فہد رؤف نے ایک دن کے نقصان کو ستم ظریفی قرار دیتے ہوئے کہا کہ مقامی کرنسی کی قدر میں کمی 2000ء کے بعد دیکھی گئی۔

ان کے مطابق وزیر خزانہ نے شرح مبادلہ کو کنٹرول میں رکھنے میں چار ماہ ضائع کر دیئے۔

ڈالر کے مقابلے روپے کی قدر میں کمی حکومت کے حالیہ بیان کا نتیجہ ہے جس میں توسیعی فنڈ سہولت کے تحت قرض پروگرام کی بحالی کے لیے بین الاقوامی مالیاتی فنڈ (آئی ایم ایف) کی تمام شرائط کو پورا کیا گیا ہے۔ اطلاعات کے مطابق، آئی ایم ایف نے حکام سے کہا ہے کہ وہ مارکیٹ کو شرح مبادلہ کا تعین کرنے دیں۔

اس سے قبل، 28 جولائی 2022ء کو انٹربینک مارکیٹ میں روپیہ 239 روپے 94 پیسے کی تاریخی کم ترین سطح تک گر گیا تھا۔

مزید برآں، چینی بینکوں کو ادائیگی کے بعد ملک کے سرکاری زرمبادلہ کے ذخائر میں مزید 500 ملین ڈالر کی کمی ہو سکتی ہے اس کے بعد ملکی زرمبادلہ کے ذخائر اس سطح پر آجائیں گے جو صرف آدھے ماہ کا درآمدی کور فراہم کر سکے۔

ٹاپ لائن سیکیورٹیز کے چیف ایگزیکٹیو آفیسر (سی ای او) محمد سہیل نے کہا کہ روپیہ ایڈجسٹمنٹ کا بہت انتظار آج (جمعرات) کو بینکوں کو مارکیٹ کی طلب اور رسد کی بنیاد پر شرح بتانے کی اجازت دے کر کیا گیا۔انہوں نے مزید کہا کہ یہ معاملہ ستمبر 2022ء تک تھا بعد میں بینک ریٹ کو ایک محدود حد میں رکھا گیا جس نے بلیک مارکیٹ کو جنم دیا۔

اب بلیک مارکیٹ ریٹ انٹربینک ریٹ کے قریب آجائے گا جس سے بینکنگ چینلز کے ذریعے برآمدات اور اندرون ملک ترسیلات کو بڑھانے میں مدد ملے گی۔ انہوں نے مزید کہا کہ اس سے تاخیر کا شکار 9 ویں جائزہ اور دوست ممالک سے انفلوزکو بحال کرنے میں بھی مدد مل سکتی ہے۔انہوں نے مزید کہا کہ 28 ستمبر 2022ء کو اسحاق ڈار کی بطور وزیر خزانہ تقرری کے بعد سے انٹربینک مارکیٹ میں روپیہ محدود حد میں آگے بڑھ رہا ہے اور استحکام کے آثار ظاہر کرنے میں کامیاب ہو رہا ہے۔

’’درحقیقت، ڈار کی تقرری سے قبل مقامی کرنسی 240 روپے کی کم ترین سطح کو چھونے کے بعد بہتر ہوئی، کیونکہ ان کا خیال تھا کہ روپے کی قدر کم ہے۔‘‘

سہیل نے کہا کہ تاہم، اسٹیٹ بینک آف پاکستان (ایس بی پی) کے زرمبادلہ کے ذخائر میں تیزی سے کمی کے باعث انٹربینک اور اوپن مارکیٹ ریٹ کے درمیان پھیلاؤ میں اضافہ ہوا اور کم رسد کی وجہ سے بلیک مارکیٹ ریٹ میں بھی اضافہ ہوا۔

13 جنوری 2023ء کو ختم ہونے والے ہفتے تک ملک کے زرمبادلہ کے ذخائر 10 اعشاریہ 444 ارب ڈالر تھے۔

ملک کے زرمبادلہ کے ذخائر 27 اگست 2021ء کو 27 اعشاریہ 228 ارب ڈالر کی بلند ترین سطح پر پہنچے۔ تب سے اب تک ان میں 16 اعشاریہ 784 ارب ڈالر کی کمی واقع ہوئی ہے۔

اسی طرح مرکزی بینک کے سرکاری زرمبادلہ کے ذخائر 13 جنوری 2022ء کو ختم ہونے والے ہفتے تک 4 اعشاریہ 601 ارب ڈالر تھے۔

سرکاری زرمبادلہ کے ذخائر کی موجودہ سطح ایک ماہ کے درآمدی کور کی سطح سے نیچے آگئی۔

عام طور پر، مرکزی بینک کے بینچ مارک غیر ملکی زرمبادلہ کے ذخائر تین ماہ کے درآمدی کور فراہم کرنے کے لیے اس سطح پر ہونے چاہئیں۔

مرکزی بینک کے پاس موجود زرمبادلہ کے ذخائر 27 اگست 2021ء کو ختم ہونے والے ہفتے تک 20 اعشاریہ 146 ارب ڈالر کی بلند ترین سطح پر پہنچ گئے۔ تب سے، اسٹیٹ بینک کے سرکاری ذخائر میں 15 اعشاریہ 545 ارب ڈالر کی کمی واقع ہوئی۔

دریں اثنا، ادارہ برائے شماریات (پی بی ایس) کے جاری کردہ اعداد و شمار کے مطابق، دسمبر 2022ء کا درآمدی بل 5 اعشاریہ 16 ارب ڈالر ریکارڈ کیا گیا۔

عارف حبیب لمیٹڈ کی ایک تحقیقی تجزیہ کار ثنا توفیق نے کہا کہ توسیعی فنڈ سہولت کے تحت، پاکستان نے مارکیٹ کے مطابق شرح مبادلہ کو برقرار رکھنے کا عہد کیا ہے، کیونکہ یہ بیرونی عدم توازن کو کم کرنے اور ذخائر کی تعمیر نو شروع کرنے کے لیے بہت ضروری ہے۔

مزید برآں، اپنے ساتویں اور آٹھ جائزوں میں، اس نے ادائیگیوں کے توازن کے استحکام سے مشروط طور پر درآمدی پابندی اور تبادلے کی پابندیوں کو ختم کرنے کا عہد کیا ہے۔

ڈالر کے مقابلے میں تقریباً 20 فیصد کمی کے ساتھ روپے نے سال 2022ء کے دوران ایک اہم دباؤ دیکھا۔

انہوں نے کہا کہ ’’اسٹیٹ بینک نے اس قدر میں کمی کی اجازت دی تھی تاکہ درآمدات مہنگی ہو جائیں اور برآمدات کو ترغیب دی جائے۔‘‘ انہوں نے مزید کہا کہ روپے کی مسلسل گراوٹ اور درآمدات پر مرکزی بینک کی طرف سے عائد کردہ کنٹرول کے نتیجے میں کرنٹ اکاؤنٹ خسارہ پہلی ششماہی میں نمایاں طور پر نیچے آیا۔ رواں مالی سال میں 60 فیصد کی کمی درج کی گئی ہے۔

ان کے مطابق، ’’مارکیٹ کو شرح مبادلہ کا تعین کرنے کی اجازت دینے سے غیر ملکی زرمبادلہ کے ذخائر کی کم سطح پر مقامی کرنسی پر دباؤ بڑھ سکتا ہے۔‘‘

مزید برآں، ایک ہی دن میں برابری کی آخری بڑی تحریک اکتوبر 2018ء میں دیکھی گئی جب بگڑتے ہوئے بیرونی اکاؤنٹ پر اسی طرح کے خدشات کی وجہ سے ڈالر کے مقابلے روپیہ 7 اعشاریہ 01 فیصد گر کر 133 روپے  64پیسے پر آ گیا۔

دریں اثنا، جمعرات کو اوپن مارکیٹ بھی اسی طرح آگے بڑھی، کیونکہ ڈالر کی خرید و فروخت 260 روپے اور 260 روپے 60 پیسے پر ختم ہوئی۔