وفاقی ٹیکس محتسب (ایف ٹی او )نے لارج ٹیکس پیئرز آفس (کراچی )کو ہدایت کی ہے کہ وہ سوزوکی کاروں کی خریداری پر ادا کیے گئے زائد سیلز ٹیکس کو واپس کریں۔ایف ٹی او کے مطابق یہ ہدایت بینک آف پنجاب کی جانب سے اپنے مؤکلوں کی دائر کی گئی شکایات کے بعد جاری کی گئی ہے۔بینک نے خریداروں کی جانب سے شکایات درج کرائیں، جس میں شکایت کنندگان نے پاک سوزوکی موٹر کمپنی لمیٹڈ سے خریدی گئی گاڑیوں پر سیلز ٹیکس کی زائد شرح کے خلاف ریلیف کی درخواست کی تھی ۔

بینک نے ان کاروں کی بکنگ اس وقت کی تھی جب سیلز ٹیکس کی شرح 17 فیصد تھی۔اس کے ساتھ ہی ہزار سی سی تک کی گاڑیوں پر سیلز ٹیکس کی شرح کو کم کر کے12 اعشاریہ 5 فیصد تک کر دیا گیا، جب کہ فیڈرل ایکسائز ڈیوٹی یکم جولائی 2021 سے نافذ ہونے والے فنانس ایکٹ 2021ء کے ذریعے ختم کر دیا گیا

اگرچہ پاک سوزوکی کمپنی لمیٹڈ نے فیڈرل ایکسائز ڈیوٹی کو ختم کر دیا، لیکن اس نے انوائس اور ڈیلیوری کی تاریخ کے بجائے بکنگ کے وقت لاگو شرح (17 فیصد) پر سیلز ٹیکس وصول کیا، جس سے شکایت کنندگان ٹیکس کی کم شرح سے مستفید ہونے سے محروم رہے۔

بینک نے خریداروں کی جانب سے گاڑی کی ڈیلیوری کی تاریخ پر لاگو شرح کے مطابق سیلز ٹیکس متفرق رقم کی واپسی کے لیے درخواست دائر کی۔

محتسب نے مشاہدہ کیا ہےکہ یہ گاڑیاں شکایت کنندگان کو بینک آف پنجاب نے لیز پر دی ہیں، جنہوں نے کٹوائے گئے زائد سیلز ٹیکس کی رقم کی واپسی کے لیے شکایات درج کرائی ہیں۔

اس بات کو یقینی بنانے کے لیے کہ اضافی رقم صحیح طریقے سے صارفین تک پہنچائی جائے، بینک آف پنجاب سے کہا گیا کہ وہ ایک حلف نامہ پیش کرے کہ سیلز ٹیکس کی واپسی کافائدہ صارفین تک پہنچایا جائے گا۔ بینک آف پنجاب نے 12 دسمبر 2022ء کو اپنے جوابی خط  میں اس کے مطابق عمل کرنے کی توثیق کی۔

دفتر برائے وفاقی ٹیکس محتسب آفس کی جانب سےیہ بھی کہا گیا کہ ماضی میں بھی کئی بار اسی طرح کے کیس ٹیکس محتسب کے سامنے دائر کیے گئے اور ان کیسز کو ریلیف بھی فراہم کیا جاچکا ہے اور لارج ٹیکس پیئرز آفس( کراچی )میں اس پر عمل درآمد ہورہا ہے ۔کراچی میں ایف ٹی او کے مقامی دفتر نے ایل ٹی او کراچی اور پاک سوزوکی موٹر کمپنی لمیٹڈ کے ساتھ رابطے کے دوران ایک موثر نفاذ کی حکمت عملی تیار کی ۔

وفاقی ٹیکس محتسب نے مشاہدہ کیا ہےکہ 100 فیصد متوازی کیس (ایسی صورت حال جس میں زیر غور حالات دوسرے کیس کے حالات سے ملتے جلتےہوں)ہونے کی وجہ سے مزید تفتیش کی ضرورت باقی نہیں رہی ، کیونکہ درخواست گزار اس ریلیف کا حقدار ہے جو اس کی طرف سے مانگی جاچکی ہے اور اسی طرح کے دیگر معاملات میں مجاز اتھارٹی کی جانب سے دی گئی ہے۔اوپر بیان کی گئی صورتحال کے پیش نظر لارج ٹیکس دہندگان کے دفتر کراچی کو ریلیف بڑھانے کی ہدایت کی گئی ہے،اس کے ساتھ ہی بینک آف پنجاب کو بڑے ٹیکس دہندگان کے کراچی آفس میں ایک حلف نامہ جمع کرانے پر اضافی ادا شدہ سیلز ٹیکس کی واپسی کا فائدہ آخر میں بچ جانے والے صارفین اور کلائنٹس کے ساتھ شیئر کیا جائے گا۔