کمرشل بینکوں کی جانب سے بیرونی لین دین کے لیے اوپن مارکیٹ سے ڈالر خریدنے کے اعلان کے بعد متعدد پاکستانیوں کے کریڈٹ اور ڈیبٹ کارڈز سے دستبردارہونے کا امکان ہے۔

گزشتہ سال 30 دسمبر کو میزان بینک نے اپنے آفیشل ٹویٹر ہینڈل کے ذریعے غیر ملکی فروخت کنندگان کو ڈیبٹ اور کریڈٹ کارڈ کی ادائیگیوں کے بارے میں معلومات کوعام کیا۔

دیگرتمام بینکوں کی جانب سے اس نے کہا کہ ہم آپ کو مطلع کرنا چاہتے ہیں کہ بینک صرف اوپن مارکیٹ سے ڈالر خرید کر بین الاقوامی تاجروں اور ویب سائٹس پر ڈیبٹ اور کریڈٹ کارڈ کے لین دین کو طے کر سکتے ہیں۔ لہذا، ان ٹرانزیکشنز پر تبادلوں کی شرح موجودہ اوپن مارکیٹ ریٹ کے مطابق لاگو ہوتی ہے، جو بین الاقوامی مرچنٹ کی ویب سائٹ پر دکھائے جانے والے ریٹ سے مختلف ہو سکتی ہے۔

بینک حکام نے بیان کی تصدیق کرتے ہوئے کہا کہ وہ اسٹیٹ بینک آف پاکستان کی ہدایت پر اوپن مارکیٹ سے ڈالر کا بندوبست کر رہے ہیں۔ اس وقت انٹربینک اوراوپن مارکیٹ کے ایکسچینج ریٹ میں 25 سے 40 روپے کا بڑا فرق ہے۔ لیکن یہ فرق غیر سرکاری ہے کیونکہ امریکی ڈالراوپن مارکیٹ میں دستیاب نہیں ہے اورشہری بلیک مارکیٹ سے ڈالر خریدنے پر مجبور ہیں۔

ایک بینکر نے نام افشاء نہ کرنے کی شرط پرکہا کہ بینک مرکزی بینک کی ہدایت پر ایسا کرنے پرمجبور ہیں، تاہم انہوں نے اسٹیٹ بینک کے ضابطے کے ثبوت فراہم نہیں کیے۔

انہوں نے کہا کہ کمرشل بینکوں کے پاس ڈالر نہیں ہیں اور وہ اوپن مارکیٹ سے ان کا بندوبست کر رہے ہیں تاکہ وہ کریڈٹ اور ڈیبٹ کارڈز کے ذریعے کیے جانے والے غیر ملکی لین دین کو پورا کرسکیں۔ انہوں نے مزید کہا کہ بینک برآمدی رسیدوں اور غیرملکی ترسیلات زر کے تحت موصول ہونے والی رقم کے مساوی درآمدی پیداوار کے لیے لیٹر آف کریڈٹ (LCs) کھول رہے تھے۔ تاہم، ایل سیز انٹربینک ریٹ پر کھولی جاتی ہیں۔

جب ان سے پوچھا گیا کہ اوپن مارکیٹ کا سرکاری ریٹ کیا ہے اور کیا بینک اوپن مارکیٹ سے ڈالر کی خریداری کی رسیدیں فراہم کر رہے ہیں تو ان کا کہنا تھا کہ انٹربینک فارن ایکسچینج مارکیٹ میں بینکوں کے پاس ڈالر نہیں ہیں۔

انہوں نے مزید کہا کہ کمرشل بینکوں کے زرمبادلہ کے ذخائر میں کمی کو روکنے کے لیے اوپن مارکیٹ سے ڈالر کی خریداری صرف کریڈٹ اور ڈیبٹ کارڈز کے لیے کی جا رہی ہے۔

بینکر نے اعتراف کیا کہ ان کے ڈیبٹ اور کریڈٹ کارڈز کے صارفین اوپن مارکیٹ سے بینکوں کی جانب سے ڈالر کے انتظام کی صورت میں غیر ملکی خریداری کے لیے بھاری رقم ادا کرنے پر مجبورہوں گے۔

بینکر نے مزید کہا کہ بینکوں کو خدشہ ہے کہ اس کی وجہ سے کریڈٹ اور ڈیبٹ کارڈز کے بڑے پیمانے پر سرنڈر ہونے کی توقع ہے۔

اسٹیٹ بینک کے مطابق 30 جون 2022ء تک پاکستان کے بینکاری نظام میں 42اعشاریہ4 ملین پے منٹ کارڈز تھے، جن میں سے 71 فیصد ڈیبٹ کارڈز، 24اعشاریہ4 فیصد سوشل ویلفیئر کارڈز، 4اعشاریہ2 فیصد کریڈٹ کارڈز، 0اعشاریہ3 فیصد پری پیڈ کارڈز اور 0اعشاریہ1 فیصد آٹومیٹڈ ٹیلر مشین (اے ٹی ایم) کارڈ تھے۔

2021ء/22ء میں ان کارڈز کے ذریعے کارروائی کی گئی ٹرانزیکشنز کی تعداد 880اعشاریہ7 ملین تھی، اس کے مقابلے میں گزشتہ مالی سال میں 708اعشاریہ7 ملین ٹرانزیکشنز ہوئی تھیں، جو 24اعشاریہ3 فیصد کی نمو کو ظاہرکرتی ہے۔

موجودہ مالی سال میں لین دین کی مالیت بھی 22اعشاریہ9 فیصد بڑھ کر 10اعشاریہ3 ٹریلین روپے تک پہنچ گئی جو کہ مالی سال 2020ء/21ء میں 8اعشاریہ4 ٹریلین روپے تھی۔

اسٹیٹ بینک کے چیف ترجمان عابد قمر نے میزان بینک کے مؤقف کی واضح تردید کرتے ہوئے پوچھا کہ کیا ان کے پاس تحریری طور پر ایسی ہدایات موجودہیں؟

انہوں نے کہا کہ مرکزی بینک نے کبھی بھی ایسی ہدایات جاری نہیں کیں اورایسی سرگرمیاں ضوابط کے خلاف ہیں۔

یہ ساری صورتحال بینکوں کے حوالے سے اسٹیٹ بینک کی کمزوری کو عیاں کرتی ہے، کیونکہ میزان بینک کی جانب سے دی جانے والی عوامی معلومات پرمرکزی بینک خاموش رہا۔ ماضی قریب میں روپے کی قدر میں زبردست گراوٹ کی وجہ سے بینکوں کو بہت زیادہ فائدہ ہوا۔ ماضی میں درآمد کنندگان نے دعویٰ کیا کہ بینک لیٹر آف کریڈٹ (LCs) کھولنے کے وقت ڈالر کی قدر سے زائد رقم وصول کررہے تھے۔

اس وقت بھی مرکزی بینک خاموش رہا تاہم،یہ معاملہ قومی اسمبلی کی قائمہ کمیٹی برائے خزانہ میں اٹھایا گیا۔

گزشتہ برس اکتوبر میں قائمہ کمیٹی نے اسٹیٹ بینک کو ہدایت کی کہ وہ تمام بینکوں اور ایکسچینج کمپنیوں کے خلاف مناسب کارروائی کرے جوزرمبادلہ کی شرح کے اتار چڑھاؤ میں ملوث ہیں۔ کمیٹی نے مرکزی بینک کو یہ بھی ہدایت کی کہ شرح مبادلہ میں ہیرا پھیری میں ملوث عناصر کے خلاف مناسب کارروائی کی جائے تاکہ کسی کو ملکی معیشت سے کھیلنے کی جرأت نہ ہو۔

کمیٹی کا مؤقف تھا کہ شرح تبادلہ میں حالیہ اتارچڑھاؤ اورانٹربینک اور ایکسچینج کمپنیوں کی جانب سے پیش کردہ شرح کے درمیان فرق کے دوران چند بینکوں نے بے تحاشا منافع کمایا۔ کمیٹی کو بتایا گیا کہ چند بینکوں اور فاریکس ایکسچینج کمپنیوں پرشرح تبادلہ میں اتارچڑھاؤ کا شبہ ہے۔

اس کا نوٹس لیتے ہوئے مرکزی بینک نے بینکوں اور ایکسچینج کمپنیوں کے فارن ایکسچینج آپریشنزکی کڑی نگرانی شروع کی اوراسٹیٹ بینک کے ضوابط کی خلاف ورزیوں پر انکوائری شروع کی۔ تاہم، اس کے بعد سے مرکزی بینک کی طرف سے کسی کارروائی کے بارے میں کوئی اطلاع سامنے نہیں آئی ہے۔

اکثرماہرین کا خیال ہے کہ بینک اپنے صارفین کو لوٹ رہے ہیں لیکن اسٹیٹ بینک مناسب اقدامات نہیں کررہا۔

پاکستان ایسوسی ایشن آف لارج اسٹیل پروڈیوسرز (پی اے ایل ایس پی) کے سیکرٹری جنرل واجد بخاری نے اسٹیٹ بینک کے گورنر کو لکھے گئے خط میں کہا کہ بینکوں کو ایل سی جاری کرنے کا اختیارحاصل ہے۔

انہوں نے کہا کہ لیکن اسٹیٹ بینک ان کو تبادلے کی شرح کا تعین کرنے کے لیے ریگولیٹ کرتا ہے جس پرایل سیز کام کرتی ہیں۔

انہوں نے مزید کہا کہ ایس بی پی نے مارکیٹ میں ہیرا پھیری کرنے اور ہماری مشکلات کا شکارصنعتوں کی قیمت پرمنافع کمانے کے لیے مبینہ بینکوں کے خلاف ریگولیٹری کارروائی کی۔

انہوں نے کہا کہ غیراخلاقی طریقوں پربینکوں پر بھاری مالی جرمانے عائد کرنے کی بجائے حکومت بینک کی غیرملکی زرمبادلہ کی آمدنی پر ٹیکس لگانے کا منصوبہ بنا رہی ہے۔

حکومت اور مرکزی بینک نے حال ہی میں کرنسی کے اتارچڑھاؤ کی وجہ سے بینکوں کی طرف سے کیے گئے حد سے زیادہ فائدہ پرکافی تنقید کی ہے۔

حال ہی میں اسٹیٹ بینک کے گورنرجمیل احمد نے قومی قائمہ کمیٹی برائے خزانہ اور محصولات کو بتایا کہ شرح مبادلہ میں بینکوں کے کردار کے حوالے سے سرکردہ بینکوں کے خلاف تحقیقات شروع کردی گئی ہیں۔

ٹاپ لائن سیکیورٹیز لمیٹڈ میں عمیر نصیر نے کہا کہ اسٹیٹ بینک نے ابھی تک کسی بھی بینک کو ضرورت سے زیادہ منافع کے لیے جرمانہ نہیں کیا۔

انہوں نے کہا کہ تاہم، بینک کی غیر ملکی زرمبادلہ کی آمدنی پر زیادہ ٹیکس زیر غور ہے ۔

انہوں نے مزید کہا کہ نو ماہ (جنوری تا ستمبر 2022) کے دوران لسٹڈ بینکوں کی زرمبادلہ کی آمدنی میں 89 ارب روپے تک اضافہ ہوا، جو گزشتہ سال کے اسی دورانیے میں 32 ارب روپے سے بڑھ گئی اوراس کی تاریخی اوسط سے بہت زیادہ ہے۔

انہوں نے کہا کہ گرتے ہوئے زرمبادلہ کے ذخائر کی وجہ سے روپیہ شدید دباؤ کا شکار رہا اور 2022ء کے نوماہ میں ڈالر کے مقابلے میں 23 فیصد کمزور ہوا۔گزشتہ برس جولائی میں 227 سے 228 روپے کے قریب ٹھہرنے سے قبل انٹربینک مارکیٹ میں ڈالر240 روپے تک پہنچ گیا ۔ انہوں نے مزید کہا کہ اس انتہائی اتارچڑھاؤ کے نتیجے میں بینکوں کی طرف سے زیادہ اسپریڈ چارج کیے گئے ہیں۔

انہوں نے کہا کہ اس اقدام کے ذریعے حکومت اپنے ٹیکس ریونیو کی کمی کو جزوی طور پر پورا کرنے اور بین الاقوامی مالیاتی فنڈ (آئی ایم ایف) کو مطمئن کرنے کی بھی کوشش کرے گی، جو ٹیکسوں میں اضافے کے اقدامات کے لیے دباؤ ڈال رہا ہے۔

واضح رہے کہ فیڈرل بورڈ آف ریونیو (ایف بی آر) نے دسمبر میں 965 ارب روپے کے ہدف کے مقابلے میں 740 ارب روپے ٹیکس جمع کیا۔ اگر حکومت بینکوں کی زرمبادلہ کی آمدنی پر 10 سے 30 فیصد اضافی ٹیکس عائد کرتی ہے تو وہ بینکوں سے تخمینہ شدہ زرمبادلہ کی آمدنی کے طور پر 12 سے 36 ارب روپے اضافی اکٹھا کر سکتی ہے جس سے 2022ء میں یہ وصولی تقریباً 120 ارب روپے ہو جائے گی۔