مشرف دور سے پہلے سیاسی مفادات نے کان کنی کے اس منصوبے کو نقصان پہنچایا

ایم سی سی ریسورسز ڈیولپمنٹ کمپنی لمیٹڈ (ایم آر ڈی ایل)، ایک چینی کمپنی جو مشہور سینڈیک کاپر اور گولڈ پراجیکٹ پر کام کر رہی ہے، نے پاکستان میں اپنے آپریشنز کے بیس سال مکمل کر لیے ہیں۔

اس موقع پر گزشتہ ہفتے پراجیکٹ کے مقام پر ایک جشن کا اہتمام کیا گیا، جہاں پراجیکٹ کے 44 نمایاں ملازمین بشمول باورچی، ڈرائیور، منیجر اور انجینئرز کو میڈلز اور سرٹیفکیٹس سے نوازا گیا۔

کمپنی کی کارکردگی کو دیکھتے ہوئے، پاکستان نے اپنی کان کی لیز میں مزید 15 سال کی توسیع کر دی ہے۔

تقریب میں ایم آر ڈی ایل کے چیئرمین، ہی زوپھینگ، صدر جانگ زیون، اور کمپنی کی مقامی انتظامیہ بشمول سینئر نائب صدر محمد نواز خان، نائب صدر ہمایوں محمود، اور سینڈیک میٹلز لمیٹڈ کے منیجنگ ڈائریکٹر محمد رازق سنجرانی نے شرکت کی۔

اس موقع پر ضلعی انتظامیہ کے افسران، علاقے میں تعینات فوجی حکام اور علاقے کے قبائلی عمائدین بھی موجود تھے۔

اجتماع سے خطاب کرتے ہوئے، ہی زوپھینگ نے کہا کہ منصوبے کی کامیابیاں چینی اور پاکستانی حکومتوں کی پرعزم دیکھ بھال اور پشت پناہی کے ساتھ ساتھ معاشرے کی جانب سے وسیع تعاون سے ممکن ہوئی ہیں، جس میں چینی اہل کاروں کی حفاظت کے لیے اہم تعاون بھی شامل ہے۔ یہ منصوبہ بذات خود شرپسندوں کی دھمکیوں کے خلاف ایک عملی جواب ہے۔

پیداوار کے اعداد و شمار پیش کرتے ہوئے، مسٹر زوپنگ نے کہا کہ گزشتہ دو دہائیوں کے دوران، کمپنی نے 278 اعشاریہ 8 ہزار ٹن تانبہ تیار کرنے اور برآمد کرنے کے لیے 278 اعشاریہ 9407 ملین ٹن چٹان کی کان کنی کی ہے، جس میں 84 اعشاریہ 9 ٹن خام دھات بھی شامل ہے۔

اس برآمدات سے پاکستان کو 2ہزار557 ملین امریکی ڈالر کا زرمبادلہ حاصل ہوا۔ اس کے علاوہ، کمپنی نے ٹیکس ریونیو میں 520 ملین ڈالر اور سماجی بہبود کے اخراجات میں 20 ملین ڈالر کا حصہ ڈالا اس کے علاوہ تین ہزار پاکستانیوں کو نان فیرس انڈسٹریل ٹیکنالوجی میں تربیت فراہم کی۔

کمپنی اس منصوبے پر 300 چینی اور 1870 پاکستانی انجینئرز، ٹیکنیشنز اور نان ٹیکنیکل اسٹاف کا روزگار وابستہ ہے۔ ابتدائی طور پر اسے دس سال (2002ء تا 2012ء) کے لیے کان کنی کی لیز دی گئی تھی جسے بعد میں 2022ء تک پانچ سال کی دو مدتوں کے لیے بڑھا دیا گیا تھا۔ اب اس لیز کو مزید 15 سال، یعنی2037ء تک بڑھا دیا گیا ہے۔

پروجیکٹ کی تاریخ

سینڈیک کانیں کوئٹہ کے جنوب مغرب میں تقریباً 700 کلومیٹر کے فاصلے پر سرحدی شہر تفتان کے قریب ایک ایسے علاقے میں واقع ہیں جہاں سڑک کا کوئی نظام ، کوئی صنعت نہیں اور موسم اکثر خراب رہتا ہے۔

سینڈیک میں چھپا ہوا ’سونا‘، جس کا بلوچی زبان میں مطلب سیاہ خشک مٹی ہے، پہلی بار برطانوی جیولوجیکل سروے کرنے والوں نے 1906ء میں اس کے حوالے سے پیش گوئی کی تھی۔ وہاں تانبے اور سونے کے ذخائر کی موجودگی کی تصدیق جیولوجیکل سروے آف پاکستان نے 1975ء اور 1976ء کے درمیان کی تھی۔

1976ء سے 1989ء کے درمیان 13 سالوں تک، کسی بھی بین الاقوامی کمپنی نے کان کنی کے منصوبے کے قیام کے لیے پاکستانی پیش کش کا جواب نہیں دیا، یہاں تک کہ چینی فرم، میٹالرجیکل کنسٹرکشن کمپنی نے آگے آکر آزمائشی بنیادوں پر پروجیکٹ شروع کرنے پر رضامندی ظاہر کی۔

ایم سی سی نے 1990ء میں سالانہ 1800 ٹن تانبہ نکالنے کی پیش گوئی کے ساتھ سائٹ پر تعمیر شروع کی، اگلے پانچ سالوں میں آزمائشی بنیادوں پر 1500 ٹن چھالا کاپر نکالا گیا۔

کان کنی کے کامیاب آپریشن کے بعد، یہ منصوبہ حکومت پاکستان کے حوالے کر دیا گیا، لیکن جمہوریت کی دہائی کہلانے والے دور کی حکومتوں میں سے کوئی بھی اسے سیاسی عدم استحکام سمیت مختلف وجوہات کی بنا پر فعال نہیں کر سکی۔

اس کے بعد جنرل پرویز مشرف کی فوجی حکومت آئی، جنہوں نے 2002ء میں اس منصوبے کے لیے ٹینڈر جاری کیا، اور اس حقیقت کے باوجود کہ اس کی بولی دوسری سب سے کم تھی، اسے ایم سی سی کو دے دیا۔ کمپنی نے مشینری کی مکمل اوور ہالنگ کی اور اسے بحال کیا۔

سیاسی مفادات جو مشرف کے بعد کے دور میں عمل میں آئے اس نے پاکستانی حکام کی طرف سے اس منصوبے کی نگرانی کو کسی حد تک نقصان پہنچایا۔

اسے وزارت پٹرولیم کے ذیلی ادارے سینڈیک میٹل لمیٹڈ کی نگرانی میں رکھا گیا تھا۔ ایس ایم ایل کے منیجنگ ڈائریکٹر رازق سنجرانی جو کہ سینیٹ کے موجودہ چیئرمین صادق سنجرانی کے بھائی ہیں، کی تقرری تمام اصول و ضوابط کو بالائے طاق رکھتے ہوئے خالصتاً سیاسی بنیادوں پر کی گئی۔

رازق سنجرانی، جو دیگر مراعات کے علاوہ ماہانہ تنخواہ کی مد میں 20 لاکھ روپے کماتے ہیں، کے پاس متعلقہ شعبے میں ماسٹرز کی ڈگری بھی نہیں ہے، اور ان کی عمر 30 سے 40 سال کے درمیان ہے، حالانکہ کمپنی کے قوانین کے مطابق، ایک منیجنگ ڈائریکٹر کا کان کنی اور انتظام میں 20 سے 30 سال کا تجربہ ہونا ضروری ہے۔

انہیں کوئٹہ میں ایس ایم ایل کے ایک چھوٹے سے دفتر کو چلانے کے لیے دستیاب 50 ملازمتوں کے مقابلے میں 150 سے زائد افراد کو بھرتی کروا کر بدعنوانی اور اختیارات کے غلط استعمال کے الزامات کا بھی سامنا ہے۔ اس کے علاوہ ان پر یہ بھی الزام ہے کہ انہوں نے سینڈیک پراجیکٹ میں کروڑوں کے ٹھیکے اپنے من پسند افراد کو دیے۔

بلوچستان کا حصہ

2010ء تک، بلوچستان کو اس کی مصنوعات کی برآمدی قیمت پر 2 فیصد رائلٹی کے علاوہ سینڈیک کے خالص منافع سے کچھ خاص نہیں مل رہا تھا۔ اس وقت وفاقی حکومت اور چینی کمپنی دونوں منافع سے 50 فیصد وصول کر رہے تھے۔

2010ء میں ساتویں قومی مالیاتی کمیشن ایوارڈ کے بعد، وفاقی حکومت نے اپنے منافع کا 30 فیصد حصہ بلوچستان کو منتقل کرنا شروع کیا۔ اس کے علاوہ بلوچستان کی رائلٹی کو 2 فیصد سے بڑھا کر 5 فیصد کر دیا گیا، جب کہ مزید 5 فیصد کارپوریٹ سوشل ریسپانسبلٹی کی ضروریات کو پورا کرنے کے لیے مختص کیا گیا۔

کوئٹہ میں ایم آر ڈی ایل کے دفتر کے سربراہ ہمایوں مولوی نے بول نیوز کو بتایا، ’’2017ء تک بلوچستان حکومت کو 6 اعشاریہ 6 ارب روپے ادا کیے جا رہے تھے۔ عدالتی حکم کے بعد، ایم آر ڈی ایل نے صوبے کے ذہین طلباء کو اسکالرشپ دینے کے لیے بلوچستان ایجوکیشن انڈومنٹ فنڈ میں سالانہ 10 ملین روپے کا عطیہ دینا شروع کیا۔ کمپنی قریبی دیہاتوں کے اٹھارہ سے بیس ہزار لوگوں کو مفت بجلی اور پینے کا صاف پانی بھی فراہم کرتی ہے۔‘‘

انہوں نے کہا کہ پراجیکٹ ایریا کے ساتھ قائم 50 بستروں پر مشتمل ہسپتال میں مقامی لوگوں کو مفت طبی سہولیات فراہم کی جاتی ہیں جب کہ 550 طلباء پر مشتمل ایک ہائی اسکول قائم کیا گیا ہے جہاں کتابوں اور اسٹیشنری کے ساتھ مفت تعلیم بھی دی جاتی ہے۔

دریں اثنا، پراجیکٹ ایریا اور چینی شہریوں کی پراجیکٹ ایریا سے باہر نقل و حرکت کے دوران ان کی سیکیورٹی فرنٹیئر کور بلوچستان کو سونپی گئی ہے۔

اگست 2018ء میں دالبندین کے علاقے میں چینی انجینئرز کو لے جانے والی بس پر خودکش حملے کی کوشش کے بعد، کراچی کے بین الاقوامی ہوائی اڈے پر آنے یا جانے والے چینی شہریوں کے لیے پراجیکٹ سائٹ سے تقریباً چھ کلومیٹر کے فاصلے پر ہوائی جہاز کی لینڈنگ کے لیے ایک رن وے بنایا گیا ہے۔

اس سے پہلے، انہیں کراچی یا کسی اور جگہ کی پرواز کے حصول کے لیے دالبندین ہوائی اڈے تک 200 کلومیٹر کا فاصلہ طے کرنا پڑتا تھا۔