پختونخوا ملی عوامی پارٹی میں دراڑیں گہری ہوتی جارہی ہیں کیونکہ دونوں دھڑے سمجھوتے کے لیے تیار نہیں

پختونخوا ملی عوامی پارٹی کا اندرونی بحران شدت اختیار کرتا جا رہا ہے کیونکہ پارٹی کے دونوں دھڑے ایک اور پشتون قوم پرست جماعت (جو بلوچستان میں ان کی جگہ لے سکتے ہیں) عوامی نیشنل پارٹی کی طرف سے لاحق خطرے کے باوجود کسی بھی بات چیت یا مذاکرات میں شامل ہونے سے انکاری ہیں۔

مختیار یوسف زئی کی قیادت میں باغی ارکان، پارٹی کے چیئرمین محمود خان اچکزئی کے آمرانہ رویے کے خلاف اٹھ کھڑے ہوئے ہیں۔ پارٹی سربراہ نے بھی ان کی بات سننے سے انکار کر دیا ہے اور ان کی جانب سے پارٹی آئین اور نظم و ضبط کی سراسر خلاف ورزی پر سخت کارروائی کی ہے۔

محمود خان اچکزئی نے حال ہی میں پارٹی سیکرٹریٹ میں ایک پریس کانفرنس کے دوران میڈیا کو بتایا، ’’اس دور میں مجھے پارٹی کے مفاد میں ایسے سخت فیصلے کرنے پڑ رہے ہیں جو ماضی میں کرنے سے مجھے نفرت تھی کیونکہ مرکزی سیکرٹری جنرل مختیار یوسف زئی اور ان کے گروپ نے پارٹی کو اس مقام پر پہنچا دیا ہے کہ میرے پاس سخت فیصلے کرنے کے سوا اور کوئی چارہ نہیں بچا۔‘‘

صوبہ خیبر پختونخوا سے تعلق رکھنے والے مختیار یوسف زئی پارٹی آفس میں مرکزی مجلس عاملہ کا اجلاس منعقد کرنا چاہتے تھے لیکن دفتر کی عمارت پارٹی سربراہ کے قبضے میں ہونے کی وجہ سے انہیں اجازت نہیں ملی۔

باغیوں نے بعد میں ایک سینئر رہنما محمد یوسف کاکڑ کی رہائش گاہ پر میٹنگ کی۔

محمود خان اچکزئی نے اجلاس کے فیصلے کو ماننے سے انکار کرتے ہوئے دعویٰ کیا کہ نام نہاد مرکزی کمیٹی کے پاس کوئی اختیار نہیں ہے کیونکہ یہ پہلے ہی تحلیل ہو چکی ہے۔ باغی گروپ نے اصرار کیا کہ کمیٹی برقرار ہے اور پارٹی کے لیے فیصلے کرنے کی مجاز ہے۔

اگرچہ دونوں دھڑے ایک دوسرے کے ساتھ کام کرنے سے انکاری ہیں، اے این پی (جو کہ صوبہ خیبر پختونخوا میں روایتی طور پر مقبول رہی ہے) کے بلوچستان میں اپنی جگہ بنانے کا امکان ہے۔

پختونخوا ملی عوامی پارٹی کے نظریاتی حامی جو کسی بھی پارٹی کے ساتھ اتحاد نہیں کرنا چاہتے ان کے اے این پی میں شامل ہونے یا اس کی حمایت کا امکان ہے، جو پختونخوا ملی عوامی پارٹی کی بلوچ پالیسی پر عمل پیرا نہیں۔

پختونخوا ملی عوامی پارٹی ایک علیحدہ صوبہ (پشتونستان یا پشتونخوا) کے قیام کے لیے جدوجہد کر رہی ہے جو خیبر پختونخوا اور بلوچستان، دونوں کے پشتون علاقوں پر مشتمل ہے۔ تاہم، صوبہ سرحد کا نام بدل کر خیبر پختونخواہ رکھنے کے بعد اس کی جدوجہد کچھ کمزور ہوگئی ہے۔

اب پارٹی بلوچستان کے پشتون علاقوں کو خیبر پختونخوا میں ضم کرنے کا مطالبہ نہیں کرتی بلکہ وسائل میں مساوی حصہ چاہتی ہے۔ بلوچ، جو صوبے میں اکثریت میں ہیں، اس مطالبے کو مسترد کرتے ہیں کیونکہ وہ سمجھتے ہیں کہ پشتونوں کو ان کے تناسب کے مطابق حصے کا دعویٰ کرنا چاہیے۔

دلچسپ بات یہ ہے کہ محمود خان اچکزئی کے والد عبدالصمد خان اچکزئی کو بلوچ گاندھی کے نام سے جانا جاتا تھا کیونکہ انہوں نے بلوچ عوام کے حقوق کی وکالت کی اور 1930ء کی دہائی میں بلوچ رہنما نواب سیف اللہ مگسی کے ساتھ پہلی بلوچ کانگریس کی صدارت کی۔ یہ کانگریس جیکب آباد میں منعقد ہوئی تھی۔

دسمبر 1973ء میں اپنی رہائش گاہ پر دستی بم حملے میں جاں بحق ہونے والے عبدالصمد نے بلوچ اور پشتونوں کے حقوق کے لیے آواز اٹھانے کے لیے 1930ء میں انجمن وطن پارٹی بھی بنائی تھی۔

انہوں نے برطانوی راج کے خلاف جدوجہد کی اور اپنی زندگی کے 33 سال جیل کی سلاخوں کے پیچھے گزارے۔ ون یونٹ کے خاتمے تک وہ نیشنل عوامی پارٹی کے سرکردہ رہنماؤں میں سے ایک تھے۔

بعد ازاں انہوں نے پشتونخوا نیشنل عوامی پارٹی کی بنیاد رکھی۔ پارٹی کا نام ان کے بیٹے محمود خان اچکزئی نے 1989ء میں پختونخوا ملی عوامی پارٹی رکھ دیا۔

ایک عظیم بغاوت

لوگ ماضی میں پختونخوا ملی عوامی پارتی کا ساتھ چھوڑ کر جاتے رہے ہیں لیکن حال ہی میں بہت سارے سینئر نظریاتی اور وفادار رہنماؤں کی بے دخلی ایک بے مثال پیشرفت ہے۔

خیبر پختونخوا اور سندھ کے تقریباً تمام عہدیداروں کو مرکزی کمیٹی کے متنازعہ اجلاس میں شرکت پر چیئرمین کے حکم پر نکال دیا گیا ہے۔

باغی گروپ نے پارٹی سربراہ کو بھی اجلاس میں مدعو کیا تھا اور فیصلہ کیا تھا کہ کوئٹہ میں پارٹی کانگریس منعقد کی جائے گی، جس کا اجلاس دسمبر کے آخری ہفتے میں ہر پانچ سال بعد ہوتا ہے۔

محمود خان اچکزئی نے اپنے والد کی 49 ویں برسی کے موقع پر کوئٹہ میں ایک جلسہ عام بھی کیا۔ انہوں نے اجلاس میں باغیوں کے خلاف اپنے موقف کو دہرایا۔ پارٹی نے 2013ء کے عام انتخابات میں بلوچستان اسمبلی میں 10 نشستیں حاصل کی تھیں لیکن 2018ء کے انتخابات میں صرف ایک نشست حاصل کر سکی۔

تاہم اچکزئی نے پارٹی کے اس واحد ایم پی اے نصراللہ زیرے کو باغی گروپ میں شامل ہونے پر نکال دیا ہے۔ پارٹی نے زیرے کو ڈی سیٹ کرنے کے لیے الیکشن کمیشن آف پاکستان کو ریفرنس بھیجنے کا بھی اعلان کیا۔

نیشنل پارٹی جس نے 2013ء کے انتخابات کے بعد پختونخوا ملی عوامی پارٹی اور پاکستان مسلم لیگ (ن) کی مدد سے مخلوط حکومت بنائی تھی، نے بھی پختونخوا ملی عوامی پارٹی کے دو دھڑوں کے درمیان ثالث کے طور پر کام کرنے کی پیشکش کی تھی لیکن دونوں میں سے کسی نے بھی مثبت انداز میں جواب نہیں دیا۔

این پی کے سیکرٹری جنرل جان محمد بلیدی نے کہا، ’’ہمیں افسوس ہے کہ ہمارا اتحادی تقسیم کا شکار ہے اور میں نے دونوں اطراف کے ذمہ دار رہنماؤں سے رابطہ کیا تاکہ انہیں دوبارہ متحد کیا جاسکے، لیکن ان کا ردعمل حوصلہ افزا نہیں تھا،‘‘

تقسیم کے اسباب

چونکہ پارٹی انتخابات کافی عرصے سے نہیں ہوئے تھے اور مرکزی کمیٹی وجود میں آچکی تھی اور پارٹی فیصلے پارٹی قیادت کے قریبی مٹھی بھر اراکین کی مشاورت سے کیے جاتے تھے۔

پارٹی ٹکٹ محمود خان اچکزئی کے اہل خانہ اور رشتہ داروں یا ان کے وفادار لوگوں میں بھی تقسیم کیے گئے۔

2013ء کے انتخابات کے تناظر میں، قیادت نے محمود کے بھائی محمد اچکزئی (جو ایک ریٹائرڈ سرکاری ملازم ہیں) کو بھی گورنر کے لیے نامزد کیا، جب کہ پارٹی کی اس سفارش کو مسترد کرتے ہوئے، جو ایک سینئر رہنما سید اکرم شاہ کو بڑے پیمانے پر رسمی عہدے پر مقرر کرنا چاہتی تھی۔

محمود خان اچکزئی کے پاس اس کے سوا کچھ نہیں تھا کہ وہ پارٹی کے بانی کے بیٹے تھے۔

تاہم پارٹی میں سب سے بڑی دراڑ اس وقت نمودار ہوئی جب محمود خان اچکزئی نے پاکستانی اسٹیبلشمنٹ کے ساتھ ساتھ افغان طالبان کے حوالے سے بھی پارٹی پالیسی تبدیل کی۔

اس سے قبل جماعت نے حامد کرزئی اور اشرف غنی کی مغربی حمایت یافتہ افغان حکومت کی حمایت کی تھی اور طالبان کو دہشت گرد قرار دیا تھا۔

تاہم پچھلی دہائی کے دوران اچکزئی مولانا فضل الرحمان کے قریب آگئے اور حال ہی میں انہوں نے عوامی سطح پر خود کو افغان طالبان کا نمائندہ بتایا ہے۔

منظور پشتین کی قیادت میں پختون تحفظ موومنٹ کی سرگرمیوں نے بھی پختونخوا میں تقسیم پیدا کر دی۔ پارٹی کارکنان اور رہنما بلوچستان میں پی ڈی ایم کے جلسوں میں قیادت کی منظوری کے بغیر شرکت کر رہے ہیں جن کا خیال ہے کہ تحریک پارٹی کے لیے خطرہ بن سکتی ہے۔