ناقص کارکردگی کے باوجود بلدیاتی انتخابات میں حکمران جماعت کی کامیابی پر سندھ کے دانشوروں کی رائے

صوبہ سندھ کی حکمراں جماعت پاکستان پیپلز پارٹی نے حال ہی میں ہونے والے بلدیاتی انتخابات میں حیران کن کارکردگی کا مظاہرہ کیا اور کراچی اور حیدرآباد میں سب سے بڑی جماعت بن کر ابھری جہاں وہ ماضی میں اپنے قدم جمانے میں ناکام رہی تھی۔

متحدہ قومی موومنٹ، جو گزشتہ تین دہائیوں سے سندھ کے شہری علاقوں کی سرکردہ جماعت رہی ہے، بلدیاتی حلقوں کی ’جعلی‘ حد بندی کے خلاف احتجاجاً انتخابات کا بائیکاٹ کر چکی تھی۔

تاہم، پیپلز پارٹی نے، پاکستان تحریک انصاف کے بجائے جو گزشتہ سال اپریل میں عمران خان کی حکومت کے خاتمے کے بعد سے مقبولیت کی عروج پرہے اور جس نے عملی طور پر 2018ء کے انتخابات میں شہری سندھ میں ایم کیو ایم کی جگہ لے لی تھی، کراچی اور حیدرآباد دونوں میں سب سے زیادہ نشستیں جیتیں۔

پی ٹی آئی اور جماعت اسلامی نے حکمراں جماعت پر بڑے پیمانے پر دھاندلی کا الزام لگایا اور احتجاج کے لیے سڑکوں پر نکلے جب کہ دیگر متعلقہ فورمز کو منتقل کرنے کے منصوبوں کا بھی اعلان کیا۔

عام تاثر ہے کہ سندھ میں اپنے 15 سالہ دور حکومت میں پیپلز پارٹی نے صوبے اور دارالحکومت کراچی کی ترقی کے لیے بہت کم کام کیا۔ لہٰذا بلدیاتی انتخابات میں پیپلز پارٹی کی کامیابی نے سوالات کو جنم دیا ہے کہ پیپلز پارٹی کی کامیابی کا راز کیا ہے۔

پیپلز پارٹی کی جیت کے حوالے سے بات کرتے ہوئے نامور ڈرامہ نگار نور الہدیٰ شاہ نے کہا کہ یہ سندھ کے شہری اور دیہی دونوں علاقوں کے لوگوں کا فطری رجحان ہے۔

انہوں نے کہا، ’’وہ مٹی کے بیٹے ہونے پر فخر کرتے ہیں اور کسی پارٹی کی حمایت کرنے یا ووٹ دینے سے پہلے وہ اس پارٹی کی قیادت کے شناختی کارڈ، ان کی مادری زبان اور قائد کو پرکھتے ہیں کہ وہ ان کی زبان سمجھ سکتے ہیں یا نہیں۔

یہ ایک بنیادی وجہ ہے جس کی وجہ سے پی ٹی آئی، پاکستان مسلم لیگ (ن) اور پاکستان مسلم لیگ (ق) سندھ میں ناکام رہے ہیں۔‘‘

انہوں نے مزید کہا، ’’تاہم، انتہا پسند اور علیحدگی پسند بھی سندھ کے لوگوں کی پسند نہیں ہیں۔‘‘

انہوں نے تجربہ کار قوم پرست جی ایم سید کے تصور کے مطابق سندھیوں کے لیے الگ ریاست کے تصور کے حوالے سے کہا، ’’قوم پرست جماعتیں یہاں کبھی بھی الیکشن جیتنے میں کامیاب نہیں ہوسکی ہیں کیونکہ سندھودیش کا نعرہ سندھ کے لوگوں کے لیے کوئی خاص کشش نہیں رکھتا۔‘‘

انہوں نے اعتراف کیا کہ جی ایم سید سندھ کی سیاست دو غالب سیاسی مکاتب فکر میں سے ایک ہے، دوسرا سیاسی مکتبہ فکر وہ ہے جس کی بنیاد پیپلز پارٹی کے بانی ذوالفقار علی بھٹو نے رکھی تھی۔

انہوں نے کہا کہ سندھ کا سیاسی شعور ان دو نظریات کا مجموعہ ہے۔

’’یہ دونوں مکاتب فکر قدرتی طور پر اپنے اختلافات کے باوجود سندھ میں ایک ساتھ رہتے ہیں۔ اگر عام لوگ سندھودیش کا نعرہ نہیں لگاتے تو یہ ذوالفقار علی بھٹو کی وجہ سے ہے۔‘‘

انہوں نے کہا کہ پیپلز پارٹی اس وقت تک سندھ میں مقبول جماعت رہے گی جب تک اس کے پاس ذوالفقار علی بھٹو اور ان کی بیٹی بے نظیر بھٹو جیسے لوگ موجود ہیں جو اپنی جانیں قربان کرنے کو تیار ہیں۔

انہوں نے واضح کیا کہ وہ پیپلز پارٹی کا دفاع نہیں کرتی ہیں اور انہیں عمومی طور پر اس کی کارکردگی اور پچھلے سال کے سیلاب کے ردعمل پر شدید تحفظات ہیں جس نے سندھ میں تباہی مچا دی تھی۔

’’سیلاب زدہ علاقوں کے دوروں کے دوران میں نے لوگوں سے پوچھا کہ وہ اس آفت کے لیے کس کو ذمہ دار ٹھہراتے ہیں۔ دلچسپ بات یہ ہے کہ بہت سے لوگوں نے کہا کہ ان کی حالت زار کی ذمہ دار اسٹیبلشمنٹ ہے۔‘‘

انہوں نے کہا کہ سول سوسائٹی کی رکن کے طور پر ان کی یہ خواہش بھی تھی کہ کوئی اور جماعت پیپلز پارٹی کو چیلنج کرنے کے لیے ابھرے لیکن دیگر تمام جماعتیں مقبولیت حاصل کرنے میں ناکام رہیں کیونکہ پیپلز پارٹی کی جڑیں مضبوط ہیں۔انہوں نے کہا کہ پیپلز پارٹی کی طرح ایم کیو ایم کی بھی جڑیں شہری علاقوں میں ہیں۔

’’ایم کیو ایم نے ’ہم مٹی کے بیٹے ہیں‘ کے نعرے لگا کر مقامی یا دیہی آبادی سے تعلقات استوار کرنے کی کوشش کی۔ وہ مٹی کے بیٹے ہیں کیونکہ وہ یہیں پیدا ہوئے ہیں اور ان کے آباؤ اجداد یہیں دفن ہیں۔

ایم کیو ایم کو اپنے بانی الطاف حسین سے علیحدگی کے بعد تنزلی کا سامنا کرنا پڑا۔ ایم کیو ایم کے تمام اسٹیبلشمنٹ نواز دھڑے اس مقصد کو پورا نہیں کریں گے۔‘‘

پروفیسر ڈاکٹر فتح محمد برفت نے کہا کہ بلدیاتی انتخابات میں پیپلز پارٹی کی کامیابی کی متعدد وجوہات تھیں، جن میں الیکٹیبلز کا استعمال اور سندھ کے لوگوں کے لیے امیدواروں کی محدود تعداد شامل ہے۔

’’پیپلز پارٹی اپنے ٹکٹ ان منتخب جاگیرداروں کو دیتی ہے جو لاڑکانہ، سکھر، جامشورو، ٹھٹھہ اور باقی سندھ سمیت تقریباً تمام علاقوں میں قابل رحم اور مخدوش حالات کے باوجود ہمیشہ الیکشن جیتتے ہیں۔‘‘

انہوں نے کہا کہ دیہی علاقوں کے زیادہ تر لوگ جہالت اور ناخواندگی کی وجہ سے سیاسی شعور سے محروم ہیں، انہوں نے مزید کہا کہ پیپلز پارٹی نے ان میں یہ خوف پیدا کر دیا ہے کہ اگر انہوں نے اسے ووٹ نہ دیا تو ایم کیو ایم سندھ کی حکمران جماعت بن کر ابھرے گی۔

ڈاکٹر برفت نے کہا کہ بدقسمتی سے کوئی بھی جماعت عوام کی بھر پور حمایت حاصل کرنے میں کامیاب نہیں ہوسکی جب کہ پیپلز پارٹی بھی کسی جماعت کو اپنا متبادل بن کر ابھرنے نہیں دیتی۔

انہوں نے کہا، ’’پیپلز پارٹی 15 سال سے سندھ پر حکومت کر رہی ہے اور وہ اسٹیشن ہاؤس آفیسر (ایس ایچ اوز)، سینئر سپرنٹنڈنٹس آف پولیس (ایس ایس پیز) اور ڈپٹی کمشنرز (ڈی سی) کا غلط استعمال کرنا جانتی ہے جو پیپلز پارٹی کی انتخابی کامیابی میں اہم کردار ادا کرتے ہیں۔ ‘‘

انہوں نے کہا کہ انہوں نے پیپلز پارٹی کے بہت سے ایم پی اے سے پوچھا کہ وہ الیکشن جیتنے کے بعد کیا کریں گے۔

’’انہوں نے جواب دیا کہ وہ اپنے دشمنوں سے بدلہ لینے کے لیے اپنے مطلوبہ تھانوں میں اپنے پسندیدہ ایس ایچ اوز کو تعینات کرائیں گے۔ سندھ کے سیاسی رہنما اپنے علاقوں کی ترقی کے منصوبوں پر بات کرنے کے بجائے اپنی تقریروں میں مخالفین کو دھمکیاں دیتے ہیں۔‘‘

انہوںنے مزید کہا، ’’سندھ کے لوگ بٹے ہوئے ہیں۔ سندھ اب بھی پانی میں ڈوبا ہوا ہے لیکن پیپلز پارٹی الیکشن جیت گئی۔ میں کیا کہوں؟ پیپلز پارٹی کو مبارک باد پیش کرتا ہوں۔‘‘

دانشور مدد علی سندھی نے نورالہدیٰ شاہ کی اس بات سے اتفاق کیا کہ پیپلز پارٹی کی جڑیں لوگوں میں ہیں۔

انہوں نے کہا، ’’پارٹی کی کارکردگی عوامی توقعات کے برعکس ہے لیکن اس نے سندھ کے اندرونی علاقوں میں ترقیاتی کام بھی کیے ہیں۔ دلچسپ بات یہ ہے کہ ایم کیو ایم (پی) کے بائیکاٹ نے پیپلز پارٹی کے ووٹ بینک کو بالکل متاثر نہیں کیا۔‘‘

بلدیاتی انتخابات کے تنازع کے حوالے سے بات کرتے ہوئے انہوں نے کہا کہ اگر بلدیاتی نظام کو ہنگامی بنیادوں پر بہتر نہ کیا گیا تو مستقبل میں بھی یہی صورتحال پیدا ہوگی۔

انہوں نے کہا کہ سندھ کے مسائل اس وقت تک حل نہیں ہوسکتے جب تک پختون آبادی کی بڑی تعداد میں آمد کو روکا نہیں جاتا۔ انہوں نے مزید کہا کہ پیپلز پارٹی اور ایم کیو ایم دونوں مل بیٹھ کر اس مسئلے کو حل کریں۔

’’خیبر پختونخوا کے مقابلے کراچی اور باقی سندھ میں زیادہ پٹھان رہ رہے ہیں۔ ملک کے کسی اور صوبے میں سندھ جیسی بے مثال صورتحال نہیں ہے۔‘‘

مصنف نواز کنبھر نے کہا کہ پیپلز پارٹی کی اپوزیشن جماعتیں کمزور ہیں اور سندھ کے جاگیردار اور ووٹر بھی موقع پرست ہیں۔ ’’حارث (ایک کسان) جو مکمل طور پر اپنے زمینداروں پر انحصار کرتے ہیں کیونکہ ان کے پاس زمین، مکان اور رہائش نہیں ہے۔ وہ اپنے جاگیرداروں کے رحم و کرم پر ہیں اور جو کچھ یہ زمیندار ان سے چاہتے ہیں وہ کرتے ہیں۔‘‘

انہوں نے کہا کہ پیپلز پارٹی ووٹرز کو راغب کرنے کے لیے کوئی نتیجہ خیز حکمت عملی تیار نہیں کر سکی لیکن اس نے سڑکوں کے انفراسٹرکچر کی تعمیر اور جدید ترین ہسپتالوں کی تعمیر جیسے اچھے کام ضرور کیے ہیں۔

انہوں نے کہا، ’’پیپلز پارٹی کے پاس کچھ جمہوری اور سیاسی اقدار ہیں جن کی دیگر جماعتوں میں کمی ہے۔ آپ کم از کم انتقامی کارروائی کے خوف کے بغیر پیپلز پارٹی کی خراب کارکردگی پر تنقید ضرور کرسکتے ہیں۔

پیپلز پارٹی نے سیلاب کے دوران کام نہیں کیا لیکن دیگر مقامی جماعتوں اور فلاحی این جی اوز نے بھی متاثرین کی مناسب مدد نہیں کی۔ لوگوں کی حمایت حاصل کرنے کا یہ ایک اچھا موقع تھا۔‘‘