برطانوی استعمار کا خاتمہ تو ہوچکا،لیکن انگریزی آج  بھی پاکستانی اشرافیہ کی زبان اور امیر و غریب کے درمیان تقسیم کی واضح لکیر ہے

ملک میں سرکاری، عدالتی اور ہدایات کی زبان کے طور پرانگریزی کا استعمال ان متعدد طریقوں میں سے ایک ہے جسے ہماری اشرافیہ نے ملک کے سیاسی اور معاشی وسائل پر اپنی اجارہ داری برقرار رکھنے کے لیے استعمال کیا ہے۔حکمراں اشرافیہ نے انگریزی زبان کو کامیابی کی ضمانت بنا دیا ہے، اس طرح معاشرے کے کم آمدنی والے طبقے، جو اسے سیکھنے کی عیاشی کے متحمل نہیں ہو سکتے، کو اعلیٰ تعلیم اور اچھی تنخواہ والی سرکاری اور غیر سرکاری ملازمتوں کے شعبوں سے باہر رکھا ہے۔

پاکستانی ریاست اورعوام کے درمیان واضح خلیج نظر آتی ہے اور اس وسیع خلیج کی ایک بڑی وجہ انگریزی کو سرکاری اور عدالتی زبان کے طور پر استعمال کرنا ہے۔ پاکستانی عوام کی غالب اکثریت اس مواد کو نہیں سمجھ سکتی جسے وہ زیادہ تر غیر ملکی زبان  میں سرکاری دستاویزات میں دیکھتے ہیں، اور اس لیے وہ عوامی مفادات سے متعلق اطلاعات اور معاملات سے بڑی حد تک بے خبر رہتے ہیں۔ اس طرح وہ اس نظام کے اعلی درجے سے حقیقی طور پر باہر ہیں جو ان کی زندگی اور قسمت کا تعین کرتے ہیں۔ بظاہر یہ صورت حال ایک مقصد کے تحت ملک کے قیام کے بعد سے جاری ہے کہ انگریزی زبان سے نابلد عام افراد میں احساس کمتری پیدا کرنا اور ان کے اعتماد کو متزلزل کرنا، خواہ وہ کتنے ہی قابل کیوں نہ ہوں۔

بابائے قوم قائداعظم محمد علی جناح نے بارہا اعلان کیا تھا کہ اردو پاکستان کی قومی زبان ہوگی، لیکن ان کے بعد اقتدار میں آنے والوں نے یہ دیکھا کہ ان کا وعدہ کبھی بھی حقیقت کا روپ نہ اختیار کرسکا۔ 1958ء میں فوجی حکمران جنرل ایوب خان نے ایک تعلیمی کمیشن قائم کیا جس نے مزید 15 سال تک انگریزی کو سرکاری زبان اوراعلیٰ تعلیم کا ذریعہ رکھنے کی سفارش کی۔ یہ پالیسی 64 سال گزر جانے کے بعد بھی جاری ہے۔

1973ء کے آئین کی شق 251 میں قوم کے بانیان کی اصل وابستگی پرعمل کرتے ہوئے کہا گیا ہے کہ ’’پاکستان کی قومی زبان اردو ہے، اور اس کے سرکاری اوردیگر مقاصد کے لیے استعمال ہونے کے انتظامات آج سے پندرہ سال میں کیے جائیں گے۔‘‘ تاہم، اس شق کو آج تک نافذ نہیں کیا گیا۔ 2006ء میں، تعلیم کے بارے میں ایک قرطاس ابیض میں مادری زبان کو ذریعہ تعلیم کے طور پر استعمال کرنے کی سفارش کی گئی تھی، لیکن اس وقت کے وفاقی وزیر تعلیم نے اس سفارش کو مسترد کر دیا تھا۔ 2015ء میں سپریم کورٹ آف پاکستان کے چیف جسٹس جواد ایس خواجہ نے ایک فیصلہ سناتے ہوئے وفاقی حکومت کو ہدایت کی کہ آئین کے تحت تین ماہ کے اندر اردو زبان کو بطور سرکاری زبان کے نفاذ کو یقینی بنایا جائے۔ انہوں نے عدالتوں کو مفاد عامہ سے متعلق اہم فیصلوں کے اردو ترجمے جاری کرنے کی بھی ہدایت کی۔ فیصلے کے آٹھ سال بعد بھی اس پر نہ تو حکومت اور نہ ہی سپریم کورٹ نے عمل کیا ۔

پاکستانیوں کی بھاری اکثریت، خاص طور پر معاشرے کے کم آمدنی والے طبقوں اور دیہی علاقوں میں رہنے والوں کے لیے انگریزی ایک اجنبی زبان ہے ۔ انگریزی بولنے والی ایک چھوٹی سی اشرافیہ کے علاوہ زیادہ تر پاکستانی بچے ایسے ماحول میں پروان چڑھتے ہیں جہاں اردو یا علاقائی زبان (پنجابی، سندھی، پشتو، بلوچی، کشمیری، بلتی، شینا، واخی وغیرہ)پہلی زبان ہے۔ یہ ایک معروف حقیقت ہے، جسے بین الاقوامی تنظیموں جیسے کہ یونیسکو، یونیسیف اور یورپی یونین (EU) کی حمایت حاصل ہے، کہ بچے اس زبان یعنی ان کی مادری زبان میں بہترین سیکھتے ہیں، جسے وہ اچھی طرح سمجھتے ہیں. بچے اس زبان (زبانوں) میں علم حاصل کرتے ہیں جو ان کے  گھر میں بولی جاتی ہے۔ تجرباتی شواہد بتاتے ہیں کہ جن ممالک نے اپنی مادری زبانوں کو ذریعہ تعلیم کے طور پر استعمال کیا ہے انہوں نے خواندگی اور مجموعی تعلیم کو فروغ دینے میں اچھی کارکردگی کا مظاہرہ کیا ہے۔ پاکستان میں انگریزی کو ذریعہ تعلیم کے طور پر استعمال کرنے سے لاکھوں بچوں کو ہر سال علمی نقصان پہنچتا ہے۔ یہ عمل دنیا بھر میں سائنسی شواہد کے خلاف ہے، لیکن یہ جمود معاشرے کے ایک چھوٹے سے طبقے کے ذاتی مفادات کی وجہ سے برقرار ہے۔

ہمارے ملک میں انگریزی زبان کی تعلیم دینے والے زیادہ تر تعلیمی ادارے مہنگے ہیں اور چند بڑے شہروں میں قائم ہیں۔ ہماری نصف سے زیادہ آبادی انتہائی غربت میں زندگی گزار رہی ہے اور تقریباً 30سے35 فیصد کا تعلق نچلے متوسط طبقے سے ہے۔ پاکستان کی تقریباً 60 فیصد آبادی دیہی یا نیم شہری علاقوں میں رہتی ہے۔ ہماری تعلیم کی ایسی قابل رحم حالت ہے کہ 23 ملین اسکول جانے کی عمر (5-16 سال) کے بچے اسکول سے باہر ہیں۔ لاکھوں ناخواندہ بچے چائلڈ لیبر کے طور پر کام کرتے ہیں۔ اس وقت ایک پاکستانی خاندان کی اوسط آمدنی 30ہزار روپے (110 امریکی ڈالر) ہے۔ ہم ایک غریب خاندان سے یہ توقع کیسے کر سکتے ہیں کہ وہ اپنے بچوں کو انگریزی سیکھنے اور اس پر عبور حاصل کرنے کے لیے کسی بڑے شہر کے اچھے معیار کے اسکول میں بھیجے؟

معاشرے کے کم آمدنی والے طبقے، بشمول ایک وسیع نچلے متوسط طبقے، مہنگی انگریزی میڈیم تعلیم کے متحمل نہیں ہو سکتے۔ 12 سال کی تعلیم مکمل کرنے والے تمام طلبا میں سے صرف ایک معمولی فیصد اسکولنگ کے او اوراے لیول (کیمبرج) سسٹمز کا انتخاب کرتے ہیں جب کہ باقی 99 فیصد مقامی نظام میں تعلیم حاصل کرتے ہیں جہاں انگریزی کی تعلیم کا معیار کافی خراب ہے۔ اور ان بچوں میں سے جو اس حد تک پہنچ جاتے ہیں، ہزاروں طلباء انگریزی سیکھنے اور انگریزی کا پرچہ پاس کرنے میں دشواری کی وجہ سے بی اے کا امتحان پاس کرنے میں ناکام رہتے ہیں۔ زیادہ تر طلباء جنہوں نے 16 سال کی تعلیم مکمل کر لی ہے وہ انگریزی زبان میں مہارت سے پڑھ یا لکھ نہیں سکتے۔ وہ انگریزی زبان کے نصاب کے کچھ حصے سیکھ کر بمشکل اپنے امتحانات پاس کرتے ہیں۔ اس میں کوئی تعجب کی بات نہیں، 2022ء میں انتہائی مسابقتی (CSS) امتحان میں شامل ہونے والے 20ہزار2سو62 امیدواروں میں سے صرف 393 پاس ہوئے، جو مجموعی کامیابی کا 1اعشاریہ9 فیصد تناسب بنتا ہے۔ ہر سال ہزاروں باصلاحیت نوجوان اپنے کیریئر میں ترقی کرنے میں صرف اس وجہ سے ناکام رہتے ہیں کہ وہ غیر ملکی زبان میں مہارت نہیں رکھتے۔

جب تک کوئی ابتداء سے معیاری اسکول میں نہیں جاتا، اس کیلئے انگریزی سیکھنے کے لیے ایک مشکل زبان ہے، اس کے پیچیدہ تلفظ کے ساتھ جس میں 55 سے زیادہ آوازوں کے لیے 26 حروف استعمال کیے جاتے ہیں۔ بعض صورتوں میں ایک آواز کو حروف کے چار سے پانچ مختلف مجموعوں میں ظاہر کیا جاتا ہے۔ مقامی اسکولوں کے وہ طلباء جو کسی نہ کسی طرح انگریزی لکھنا اور پڑھنا سیکھنے میں کامیاب ہوتے ہیں، ان کیلئے اسے روانی سے بولنا مشکل ہوتا ہے۔ وہ عام طور پرتعلیمی مباحثوں میں حصہ نہیں لے سکتے اور ملازمت کے انٹرویوز میں کام یاب ہونے میں ناکام رہتے ہیں۔ انگریزی اور اردو کے ساتھ ساتھ استعمال کرنے کا نتیجہ یہ نکلتا ہے کہ معاشرے کا ایک بڑا طبقہ نہ تو اردو اور نہ انگریزی میں ماہر ہے۔ زیادہ تر تعلیم یافتہ افراد اردو جملے کے ڈھانچے میں انگریزی الفاظ کو شامل کرکے اپنے آپ کو تعلیم یافتہ ظاہر کرتے ہوئے زبان کی گھٹیا شکل استعمال کرتے ہیں۔

اس حقیقت سے انکار نہیں کیا جاسکتا کہ عالمی زبان کی حیثیت سے انگریزی زبان کی اپنی ایک اہمیت ہے، اور اس میں جدید علم کا سب سے بڑا ذخیرہ ہے۔ ہم انگریزی زبان سیکھ کر یا اپنی مقامی زبانوں یا اپنی نام نہاد قومی زبان اردو میں ادب کے تراجم کے ذریعے جدید علم تک رسائی حاصل کر سکتے ہیں۔ نوآبادیاتی نظام سے چھٹکارا پانے کے کافی عرصے بعد بھی پاکستان میں ہم انگریزی کو ذریعہ تعلیم کے طور پر برقرار رکھتے ہوئے برطانوی راج کی میراث پر قائم ہیں۔ بہت سے دوسرے ممالک جیسے جاپان، جنوبی کوریا، روس، ترکی، چین، ایران وغیرہ نے کتابوں، رسالوں اور دیگر دستاویزات کو اپنی مادری زبانوں میں ترجمہ کرنے کا دوسرا آپشن اپنایا ہے۔ وہ ممالک عالمی خواندگی، اعلیٰ تعلیم اور معاشی ترقی میں پاکستان سے بہت آگے ہیں۔ اگر نیت ہو تو ہم ان کے تجربے سے سیکھ سکتے ہیں۔

کوئی یہ دلیل دے سکتا ہے کہ اردو میں ترجمہ خاص طور پر سائنس اور ٹیکنالوجی سے متعلق مضامین کے سیکھنے میں پیچیدگی پیدا کرتا ہے، ، لیکن یہ بہانہ کم از کم سماجی علوم جیسے سماجیات، نفسیات، تاریخ، جغرافیہ وغیرہ کے معاملے میں وزن نہیں رکھتا۔ اردو سائنس بورڈ موجود ہے، جس نے سائنس کی کئی کتابیں اردو زبان میں شائع کی ہیں اور سائنس اور ٹیکنالوجی میں استعمال ہونے والی اصطلاحات کی ایک بڑی انگریزی سے اردو لغت شائع کی ہے۔ ان دنوں، مصنوعی زبان کے تعارف نے، اے آئی (مصنوعی ذہانت) کی پیداوار، نے انگریزی سے اردو یا پاکستان کی دیگر علاقائی زبانوں میں ترجمہ کرنا بہت آسان بنا دیا ہے۔ ترجمہ کو ٹھیک کرنے کے لیے مترجمین کی ضرورت ہے۔ کمپیوٹر سافٹ ویئر دستیاب ہے اور کام کو زیادہ درست طریقے سے کرنے کے لیے مزید تیار کیا جا سکتا ہے۔ عدالتی فیصلوں اور سرکاری دستاویزات کا منٹوں میں ترجمہ کیا جا سکتا ہے اور آسانی سے موافقت کی جا سکتی ہے۔

مصنوعی ذہانت کے وجود میں آنے سے پہلے ہی ایران اور جاپان جیسے ممالک نے سائنس، ٹیکنالوجی اور سماجی علوم و ادب سمیت ہر قسم کے موضوعات پر لاکھوں مقالوں کا اپنی اپنی زبانوں میں ترجمہ کیا۔ مقامی زبانوں کے فروغ کے لیے سیاسی عزم تھا جس کا پاکستان میں فقدان پایا جاتا ہے۔ ستم ظریفی یہ ہے کہ 1970 ءکی دہائی کے اوائل میں نیشنل عوامی پارٹی کی ذیلی قوم پرست حکومت نے خیبر پختونخواہ (اس وقت سرحد) اور بلوچستان میں جے یو آئی نے اردو کو سرکاری زبان کے طور پر فروغ دینے کے لیے کچھ اقدامات کیے، لیکن ایک بار جب وہ حکومت سے باہر ہوئے تو یہ منصوبہ رک گیا۔

انگریزی کو سرکاری زبان اور ذریعہ تعلیم کے طور پر اپنانا اشرافیہ کی جانب سے غریبوں کو امیروں کے بچوں کے ساتھ مقابلوں میں حصہ لینے سے محروم کرنے کے لیے جان بوجھ کر وضع کیا گیا ہے۔ خدشہ یہ ہے کہ اگر تمام بچے ایک ہی قومی یا مقامی زبان میں تعلیم حاصل کر لیں تو مقابلہ سخت ہو جائے گا اور معمولی پس منظر کے بہت سے ہونہار طلباء اوپر آنے کے قابل ہو جائیں گے۔ اس سے سرکاری اور غیر سرکاری شعبوں میں اعلیٰ تنخواہ والی ملازمتوں کے مقابلے ایک مخصوص طبقے کا تسلط ختم ہو جائے گا۔ ایک ایسے منظر نامے کا تصور کریں جہاں مسابقتی (CSS) کے امتحانات اردو زبان میں منعقد کیے جاتے ہیں۔ کامیاب امیدواروں کی تعداد اس سے کہیں زیادہ ہوگی، جس سے اس مخصوص طبقے کی آہنی گرفت ٹوٹ جائے گی جنہوں نے اشرافیہ کے تعلیمی اداروں میں تعلیم حاصل کی تھی۔

انگریزی کو ذریعہ تعلیم بنا کر اپنے خود غرض اور تنگ نظر مفادات کا تحفظ کرتے ہوئے پاکستان کی اشرافیہ ملک کے بنیادی وسائل یعنی بچوں کو ضائع کر رہی ہے۔ جدید دنیا میں کوئی بھی معاشرہ اور اس کی معیشت ایک بڑی ناخواندہ آبادی کے ساتھ قابل عمل نہیں ہو سکتی۔ اور یہی ہمارے پاس ہے۔