کراچی میں میئر کے انتخابات کے کوئی آثار نہیں ہیں کیونکہ الیکشن کمیشن لوکل گورنمنٹ کے ضمنی انتخابات کو پہلے کرانے پر غور کر رہا ہے

سندھ کے کراچی اور حیدر آباد ڈویژن میں بلدیاتی انتخابات ہوئے تین ہفتے گزر چکے ہیں اور ان شہروں کے عوام اب شہر کے نگرانوں کے چارج سنبھالنے اور ان شہری مراکز کے دیرینہ مسائل کے حل کا بے صبری سے انتظار کر رہے ہیں۔

تاہم، کم از کم پاکستان کے معاشی حب کراچی میں میئر کے انتخابات کے کوئی آثار نظر نہیں آتے کیونکہ الیکشن کمیشن آف پاکستان (ای سی پی) پہلے ان گیارہ نشستوں پر ضمنی انتخابات کرانے کا ارادہ رکھتا ہے جہاں امیدواروں کے انتقال کی وجہ سے پولنگ نہیں ہوسکی تھی۔

ماہرین کا خیال ہے کہ اگر بلدیاتی انتخابات میئر کے انتخابات سے پہلے کرائے گئے تو یہ آئندہ عام انتخابات کے بعد ای سی پی کے لیے شدید مشکلات پیدا کر سکتے ہیں۔

ان کا کہنا تھا کہ یہ ایک معمول کی بات ہے کہ پارلیمنٹ کی جانب سے قائد ایوان یعنی وزیراعظم کا انتخاب کرنے کے بعد ضمنی انتخابات کرائے جاتے ہیں۔ ان کا اصرار تھا کہ یہی اصول بلدیاتی حکومت پر بھی لاگو ہوتا ہے، جہاں ضمنی انتخابات سے پہلے میئر کا انتخاب ہونا چاہیے۔

ای سی پی نے ابھی تک میئر کے انتخابات سے قبل ضمنی انتخابات کے انعقاد کے حوالے سے اپنی پالیسی کا اعلان نہیں کیا لیکن جماعت اسلامی (جے آئی) جس نے کراچی میں بلدیاتی انتخابات میں دوسری سب سے زیادہ نشستیں حاصل کیں، نے مطالبہ کیا ہے کہ ضمنی انتخابات فوری طور پر منعقد ہونے چاہئیں۔

8 فروری کو، جماعت اسلامی نے ای سی پی کو دو دن کا الٹی میٹم دیتے ہوئے کہا کہ وہ ان گیارہ نشستوں پر ضمنی انتخابات کے شیڈول کا اعلان کرے جہاں انتخابات نہیں ہوسکے۔ بصورت دیگر پارٹی کراچی میں الیکشن کمیشن پاکستان آفس کے باہر احتجاج کرے گی۔

تاہم، پاکستان پیپلز پارٹی (پی پی پی) جس نے کراچی میں سب سے زیادہ نشستیں حاصل کر کے سب کو حیران کر دیا، نے اس ممکنہ اقدام پر اپنی تشویش کا اظہار کرتے ہوئے کہا کہ اس سے نہ صرف میئر کے انتخابات میں تاخیر ہو گی بلکہ عام انتخابات کے وقت ای سی پی کے لیے سنگین مسائل بھی پیدا ہو سکتے ہیں۔

اگر میئر کے انتخابات سے پہلے ضمنی انتخابات کرائے جائیں تو جماعت اسلامی کو کوئی ایشو نظر نہیں آتا۔

جماعت اسلامی کراچی چیپٹر کے نائب سربراہ راجہ آصف سلطان نے کہا کہ ’’ہم صرف ضمنی انتخابات کے شیڈول کے اجراء کے لیے اپنا مطالبہ پیش کر سکتے ہیں اور ہم نے وہ کر دیا ہے۔‘‘

یہ پوچھے جانے پر کہ کیا ضمنی انتخاب میئر کے انتخابات میں مزید تاخیر نہیں کرے گا، انہوں نے کہا کہ 2016ء کے میئر کے انتخابات ساڑھے سات ماہ کی تاخیر کے بعد ہوئے۔ انہوں نے مزید کہا کہ ’’یہ بہتر ہوگا کہ تمام رسمی کارروائیوں کے بعد میئر کے انتخابات کرائے جائیں۔‘‘

دریں اثنا، 7 فروری کو اسلام آباد میں ای سی پی میں انتخابی تنازعات پر ہونے والی سماعت بے نتیجہ رہی۔ تنازعات پر اگلی سماعت 22 فروری کو ہوگی۔

انہوں نے کہا کہ ’’پچھلی سماعت پر، ہم نے ای سی پی کے کچھ سوالات کے جوابات دیے۔ کچھ معاملات پر مزید وضاحت کی ضرورت ہے اور ای سی پی نے اگلی سماعت پر ریٹرننگ افسران (آر اوز) اور پریزائیڈنگ افسران کو طلب کیا ہے۔‘‘

ان انتخابی تنازعات کا تعلق سندھ کے جنوبی اضلاع میں 15 جنوری کو ہونے والے بلدیاتی انتخابات کے دوسرے مرحلے سے ہے۔ ای سی پی نے دو ہفتے قبل حتمی نتائج جاری کیے، جس کے مطابق پیپلز پارٹی نے کل 246 میں سے 91 نشستیں حاصل کیں، جب کہ جماعت اسلامی 85 نشستوں کے ساتھ قریبی مدمقابل کے طور پر سامنے آئی۔

جماعت اسلامی نے کراچی کے سات اضلاع میں اپنی تقریباً تمام نشستیں جیت لیں، جہاں کل 246 یوسی نشستوں میں سے 235 سیٹیں ہیں۔ امیدواروں کے انتقال کے باعث 11 حلقوں پر ووٹنگ ملتوی کردی گئی، جب کہ پیپلز پارٹی کا ایک امیدوار بلا مقابلہ منتخب ہوگیا۔

پی پی پی کا حیدرآباد میں ہموار سفر تھا جہاں وہ اپنا میئر منتخب کرنے کے لیے آرام دہ پوزیشن میں ہے۔ لیکن پارٹی کو کراچی میں ایک مشکل صورتحال کا سامنا ہے، جہاں اس نے بہت کم فرق سے کامیابی حاصل کی جس کے نتیجے میں انتخابی تنازعات پیدا ہوئے۔

پاکستان تحریک انصاف (پی ٹی آئی) جو کراچی کے بلدیاتی انتخابات میں تقریباً 40 نشستیں حاصل کر کے تیسری پوزیشن پر آئی تھی، نے بھی ای سی پی میں 7 فروری کو ہونے والی سماعت میں شرکت کی۔

ای سی پی آفس کے باہر میڈیا سے گفتگو کرتے ہوئے پی ٹی آئی رہنما علی حیدر زیدی نے دعویٰ کیا کہ بلدیاتی الیکشن کا سارا انتظام آر اوز نے کیا۔

ان کا کہنا تھا کہ ’’میں نے یہ بات سماعت کے دوران کہی ہے۔ آر او مقامی حکومت کا ملازم ہے۔ سندھ کے وزیر بلدیات [سماعت میں] موجود تھے۔ آپ کسی آر او سے وزیر کے سامنے بولنے کی امید کیسے کر سکتے ہیں؟‘‘

انہوں نے کہا کہ ای سی پی نے آر اوز سے کہا ہے کہ وہ 22 فروری کو دستاویزات لے کر آئیں، ہمیں امید ہے کہ ای سی پی یونین کونسل کے انتخابات میں انصاف کرے گا۔15 جنوری کو پولنگ کے فوراً بعد انتخابی نتائج متنازعہ ہو گئے۔

جماعت اسلامی نے الیکشن کمیشن میں شکایت کی کہ جہاں جے آئی آر اوز کے جاری کردہ فارم 11 کے مطابق چھ نشستوں پر جیتنے والی جماعت دکھائی دے رہی تھی، حتمی نتائج میں پی پی پی کو ان نشستوں پر فاتح کے طور پر دکھایا گیا تھا۔

بعد ازاں ای سی پی نے جے آئی کی شکایت پر انکوائری مکمل ہونے تک نتائج کو یکجا کرنے کے عمل کو معطل کردیا۔ ای سی پی نے اب تک دونوں فریقوں کو سننے اور دستاویزات کی جانچ کے لیے کئی سیشنز منعقد کیے ہیں۔ پچھلی سماعت کے بعد، جماعت اسلامی نے ای سی پی سے رجوع کرتے ہوئے یہ دعویٰ کیا کہ مزید تین یوسیزکے نتائج میں ردوبدل کیا گیا ہے۔7 فروری کو پیپلز پارٹی کی نو کے قریب شکایات کی بھی سماعت ہوئی۔

سندھ کے وزیر بلدیات سعید غنی نے الیکشن کمیشن پاکستان ہیڈ کوارٹر کے باہر میڈیا کو بتایا کہ انہوں نے دوبارہ گنتی کے لیے درخواست دی، لیکن آر اوز نے رسمی درخواست مسترد کردی۔

ان میں سے کچھ شکایات پی پی پی کے امیدواروں کی طرف سے درج کروائی گئی تھیں جو تھوڑے مارجن سے ہار گئے تھے۔انہوں نے مزید کہا کہ “دوبارہ گنتی کے لیے ہماری کئی جائز درخواستیں آر اوز نے مسترد کر دی تھیں۔”

کراچی میں پیپلز پارٹی کی جیت پر کچھ لوگوں کی حیرت پر تبصرہ کرتے ہوئے غنی نے کہا کہ شہر میں پیپلز پارٹی کا ووٹ بینک ہے اور وہ روایتی طور پر ان علاقوں سے جیت رہی ہے۔ ’’ہم نے اضافی کوشش کی اور ہمارے امیدواروں نے اس بار زیادہ محنت کی۔‘‘