میدان جنگ میں روسیوں کو شکست دینے کے جنونی خیال کے تعاقب میں واشنگٹن، کیف کی حمایت کر رہا ہے

ماسکو

امریکا میں روس کے سفیر اناتولی انتونوف نے واشنگٹن پر ماسکو کے خلاف ’پراکسی جنگ‘ چھیڑنے کا الزام عائد کرتے ہوئے کہا ہے کہ یوکرین کے صدر ولادیمیر زیلنسکی کے دورے کے دوران دیے گئے تمام بیانات اور کیے گئے اعلانات سے یہ ثابت ہوتا ہے کہ بائیڈن انتظامیہ پرامن تصفیے میں دلچسپی نہیں رکھتی۔

اناتولی انتونوف نے ایک صحافی کے سوال کے جواب میں کہا،”کیف حکومت کے سربراہ کے ہالی ووڈ طرز کے واشنگٹن کے دورے نے اس بات کی تصدیق کردی ہے کہ روس کے ساتھ تصادم شروع کرنے کا ارادہ نہ رکھنے کے بارے میں انتظامیہ کے مفاہمتی بیانات محض کھوکھلے الفاظ ہیں۔ انتونوف کا مذکورہ بالا جواب 21 دسمبر کی رات واشنگٹن میں روسی سفارت خانے کی طرف سے شائع کیا گیا۔

انتونوف نے کہا کہ واشنگٹن ’’میدان جنگ میں روسیوں کو شکست دینے کے احمقانہ خیال‘‘ کے تعاقب میں اپنے تمام تر وسائل، ہتھیار، اور انٹیلی جنس صلاحیتوں کو کیف پر نچھاور کررہا ہے۔

روسی سفیر نے خاص طور پر کیف کو پیٹریاٹ ایئر ڈیفنس میزائل فراہم کرنے کے امریکی وعدے کا ذکر کرتے ہوئے خبردار کیا کہ ایسے ہتھیار اور ان کا عملہ روسی فوج کے لیے جائز اہداف ہوں گے۔ انہوں نے اے ٹی اے سی ایم ایس میزائلوں اور طویل فاصلے تک مار کرنے والے ڈرونز کی فراہمی کے بارے میں بڑھتی ہوئی قیاس آرائیوں پر بھی تنقید کی۔

انہوں نے کہا،’’جس چیز کا بنیادی طور پر تالیوں کی گونج میں اور طنزیہ مسکراہٹوں کے ساتھ اعلان کیا گیا، وہ ہمارے ملک کے خلاف ‘پراکسی وار’ جاری رکھنے کی ضرورت تھی۔ جب تک کہ ہم پر مکمل فتح حاصل نہیں کرلی جاتی۔‘‘

اناتولی انتونوف نے کہا کہ ماسکو نے بار بار ’’ہر سطح پر عقل و شعور رکھنے والوں سے اپیل‘‘ کرنے کی کوشش کی ہے۔ روسی سفارت کار نے اس بات پر زور دیا کہ امریکہ اور اس کے اتحادیوں کی طرف سے تیزی سے جدید اور طویل فاصلے تک مار کرنے والے ہتھیاروں کی ترسیل اور دیگر اشتعال انگیز کارروائیاں اس )پراکسی وار( میں اضافے کا باعث بن رہی ہیں اور ان )کارروائیوں( کے نتائج کا تصور کرنا بھی ’’ناممکن‘‘ ہے۔

بشکریہ: ٹی آر ٹی