برطانیہ کے شہزادہ ہیری نے اپنی نئی کتاب میں بتایا ہے کہ کس طرح ان کے بڑے بھائی شہزادہ ولیم نے 2019ء میں ایک بحث کے دوران ان پر جسمانی طور پر ’’حملہ‘‘ کیا تھا ۔ دی گارجیئن اخبار کی 4 جنوری کی اشاعت میں شامل رپورٹ کے مطابق اس واقعے کی تفصیلات ہیری کی یادداشتوں پر مبنی نئی کتاب ’’اسپیئر‘‘ میں شامل ہیں، جو اس ماہ کے آخر میں برطانوی شاہی خاندان میں جاری تنازع کے درمیان ریلیز ہونے والی ہے۔

دی گارجیئن کے مطابق 38 سالہ شہزادہ ہیری اپنی یادداشت میں لکھتے ہیں کہ اپنے گھر کے باورچی خانے میں اختلاف رائے کے دوران، ولیم نے انہیں ) ہیری کو ( زمین پر گرانے سے پہلے ان کی میگھن مارکل کو ’’مشکل‘‘، ’’بدتمیز‘‘ اور ’’کھرچنے والی‘‘ کہا کیونکہ یہ جوڑا مسلسل بحث کررہا تھا۔ گارجیئن نے ہیری کی کتاب کا حوالہ دیتے ہوئے کہا کہ ’’اس نے مجھے کالر سے پکڑا، میرا ہار توڑ دیا اور مجھے فرش پر گرا دیا۔ میں کتے کے کھانے کے پیالے پر گرا، جو میری پیٹھ کے نیچے آ کر ٹوٹ گیا، اس کے ٹکڑے میرے جسم میں چبھ رہے تھے۔‘‘

پھر ہیری نے اپنے بڑے بھائی کو وہاں سے جانے کو کہا۔ اخبار کے مطابق ہیری نے یاد کیا کہ ولیم ’’افسردہ اور معذرت خواہ‘‘ نظر آئے۔

اخبار نے کتاب سے دونوں شہزادوں کے درمیان ہونے والے لفظی تبادلے کا حوالہ دیا: ولیم ’’مڑے اور کہا: ’تم اس بارے میں میگ کو کچھ نہیں بتاؤ گے۔‘’تمہارا مطلب ہے کہ اس بارے میں کہ تم نے مجھ پر حملہ کیا؟‘’’میں نے تم پر حملہ نہیں کیا، ہیرالڈ،‘‘ ولیم نے جواب دیا، ایسا لگتا ہے کہ وہ ہیری کے لیے کوئی عرفی نام استعمال کرتا ہے۔

کتاب کی ریلیز سے قبل اس ہفتے برطانیہ میں آئی ٹی وی اور امریکی ٹی وی چینل سی بی ایس کو انٹرویو کے دوران ہیری نے کہا کہ وہ ’’ایک خاندان چاہتے ہیں، ایک ادارہ نہیں۔‘‘

ہیری نے کہا ’’میں اپنے والد کو واپس لانا چاہوں گا۔ میں اپنے بھائی کو واپس لانا چاہوں گا۔‘‘