چین نے تائیوان کو ہتھیار فراہم کرنے پرامریکی فوجی کنٹریکٹرلاک ہیڈ مارٹن اورریتھیون پر تجارتی اورسرمایہ کاری کی پابندیاں عائد کردی ہیں، چین کا دعویٰ ہے کہ تائیوان اس کا حصہ ہے۔

چین کی وزارت تجارت نے جمعرات 16 فروری کواعلان کیا کہ امریکی اسلحہ ساز کمپنیوں کو چین میں سامان درآمد کرنے یا ملک میں نئی سرمایہ کاری کرنے سے روک دیا گیا ہے۔

وزارت تجارت نے کہا کہ فرموں کو تائیوان کو ہتھیاروں کی فروخت پر’’ناقابل اعتماد اداروں کی فہرست‘‘ میں شامل کیا گیا ہے۔

امریکہ تائیوان کو فوجی سازوسامان کا سب سے بڑا سپلائرہے۔

 ریتھیون ٹیکنالوجیز کارپوریشن کا حصہ ریتھیون میزائل اینڈ ڈیفنس کو جزیرے پرامریکی ہتھیاروں کی فروخت کے 1اعشاریہ1 ارب ڈالر کے پیکیج کے حصے کے طور پرستمبرمیں تائیوان کے فوجی ریڈار کو اپ گریڈ کرنے کے لیے 412 ملین ڈالر کا معاہدہ دیا گیا تھا ۔ لاک ہیڈ مارٹن کارپوریشن نے تائیوان کی فوج کو ریڈار، ہیلی کاپٹر اورہوائی ٹریفک کنٹرول کے آلات فراہم کیے ہیں۔

چین میں لاک ہیڈ مارٹن کارپوریشن نے شہری ہوائی اڈوں کے لیے ہوائی ٹریفک کنٹرول کے آلات اور تجارتی استعمال کے لیے ہیلی کاپٹر فروخت کیے ہیں۔

امریکی کمپنیوں پر پابندیوں کا اعلان ایک ہفتے سے بھی کم وقت میں ہوا ہے جب امریکہ نے مبینہ طورپرچینی جاسوس غبارے کے امریکی فضائی حدود میں داخل ہونے پرجوابی کارروائی میں چھ چینی اداروں کو بلیک لسٹ کیا تھا۔

بشکریہ: الجزیرہ