اعدادوشمار ایڈز کے حقیقی پھیلاؤ کو جھٹلاتے ہیں، جسم فروش

 خواتین کے ذہن میں حفاظت آخری چیز ہے

کراچی، ساحلی شہر اور پاکستان کا مالیاتی مرکز زندگی سے لبریز ہے۔ کبھی روشنیوں کا شہر کہلانے والا یہ شہر اپنی مصروف سڑکوں پر سورج غروب ہوتے ہی روشنی سے خالی نظر آتا ہے۔ غروب آفتاب اور فضائی آلودگی اسے ایک ایسی جگہ کی شکل دیتی ہے جو کبھی بہت اچھی ہوا کرتی تھی، لیکن اب اس کی سابقہ شان کا سایہ ہی رہ گئی ہے۔ بارش سے ٹوٹی ہوئی سڑکوں میں سنانے کے لیے بہت سی کہانیاں ہیں۔ کہانیاں صرف ان کو سنائی جاتی ہیں جو قریب سے دیکھتے ہیں۔ مالیاتی مرکز حقیقی دلچسپی کے استثنا کے ساتھ ہر چیز کو دیکھتا ہے۔ عروس البلاد میں لوگ ادھر سے ادھر بھاگتے ہوئے، روزگار کی تلاش میں، یا اپنے کام کی جگہ سے جانے یا واپسی میں مصروف دیکھے جاسکتے ہیں۔ رات اپنے ساتھ مزید کہانیاں لے کر آتی ہے، گرد آلود گلیاں ایک اور صنعت کی گواہ ہیں جو سائے میں کام کرتی ہے۔ یہ صنعت اتنی ہی پرانی ہے جتنی خود تہذیب۔ اس میں ’رات کی خواتین‘ کا ظہور نظر آتا ہے، انہیں مافوق الفطرت وجود سمجنے سے گریز کریں، یہ خواتین اپنے گاہکوں کی تلاش میں مصروف گلیوں کے کونوں پر کھڑی ہوتی ہیں۔

 شہر المیوں کا شکار ہوا، بارشوں نے تباہی مچا دی، مالی بحران اور منشیات کے عادی افراد سڑکوں کے فٹ پاتھوں پر پھیلے ہوئے ہیں۔ تاہم، ’رات کی خواتین‘ کے پیشے میں پچھلے کچھ سالوں میں تیزی سے اضافہ دیکھنے میں آیا ہے۔ خواتین کو اپنے ’کام‘ کے لیے اپنی بائیک پر سوار ہونے سے پہلے اپنے گاہکوں سے جھگڑتے ہوئے دیکھا جا سکتا ہے۔ ہر عمر کے مردوں کو ان کی خدمات حاصل کرتے ہوئے دیکھا جا سکتا ہے۔

پاکستان جیسے قدامت پسند ملک میں اس نظارے کی اجازت نہیں ہونی چاہیے، تاہم حکام سڑکوں پر ہونے والے واقعات سے آنکھیں چراتے ہیں۔ حکام پرتشدد اسٹریٹ کرائمز کی طرف سے بھی آنکھیں بند کر لیتے ہیں، لہٰذا اس میں کوئی تعجب کی بات نہیں ہونی چاہیے۔ گاہکوں کو، زیادہ تر پست سماجی و اقتصادی طبقے سے خواتین کے پاس آتے دیکھا جا سکتا ہے۔ زیادہ تر خواتین اشتعال انگیز یا بھرکیلا لباس نہیں پہنتیں، وہ عام طور پر عاجزانہ ’برقع‘ میں ملبوس ہوتی ہیں۔ پھر گاہک ’رات کی خواتین‘ اور اپنی بس کا انتظار کرن والی دوسری عام خواتین میں فرق کیسے کرتے ہیں؟ یہ وہ سوال ہے جو ذہن میں ابھرتا ہے۔

جسم فروشی کرنے والی ایک خاتون ثمرہ کہتی ہیں کہ یہ آسان ہے۔ اس کی عمر 22 سال ہے اور وہ پچھلے 6 سالوں سے اس پیشے سے وابستہ ہے، یعنی اس نے 16 سال کی کم عمر میں اس کی شروعات کی تھی۔ وہ ایک خستہ حال کوارٹر میں رہتی ہے جس کی دیواروں سے رنگ جھڑ رہا ہے۔ پڑوسیوں کو جھگڑتے ہوئے صاف سنا جا سکتا ہے۔ کاغذات میں ثمرہ شہر کے ایک متمول حصے میں رہتی ہے، حقیقت میں وہ ایک کالونی کی رہائشی ہے اور وہ اپنے گاہکوں کو اپنی جگہ پر لے آتی ہے۔ وہ کہتی ہے، ’’ہم اپنے چہرے ڈھانپ لیتے ہیں کیونکہ دوسری صورت میں، پولیس ہمیں ہراساں کرتی ہے، گاہک روکتے ہیں، ہم اشارہ کرتی ہیں جس سے وہ واقف ہوتے ہیں۔ اگر ہمارے اطراف میں لوگوں کی بھیڑ ہوں تو پھر ہم اپنی آنکھوں سے اشارہ کرتے ہیں۔‘‘

اس کی کہانی المناک ہے، اسے اس کی اپنی ماں نے زبردستی اس پیشے میں ڈال دیا تھا۔ ماں گھریلو ملازمہ تھی اور ثمرہ کے مطابق بھرنے کے لیے کئی پیٹ تھے۔ اس کی ماں اسے ایک ایسی جگہ لے گئی جہاں اسے مجبور کیا گیا۔ اس کے پاس کوئی راستہ نہیں تھا۔ وہ اپنے خاندان کو سپورٹ کرتی ہے۔

 تولیدی صحت اور محفوظ جنسی طریقوں کے بارے میں پوچھے جانے پر وہ خالی نگاہوں سے دیکھنے لگی۔ اس نے جواب دیا، ’’کوئی بیماریوں سے بچا ؤ کی دوا یا احتیاطی تدابیر کیوں استعمال کرے گا؟ کوئی نہیں کرتا، کچھ نہیں ہوتا۔‘‘ وہ بجلی کی رفتار سے اپنے قریب آنے والے خطرے سے بے خبر ہے۔

ایڈز کا سبب بننے والے ایچ آئی وی وائرس زیادہ تر جنسی طور پر ایک سے دوسرے میں منتقل ہوتا ہے۔ یہ (استعمال شدہ انجیکشن) کے استعمال سے بھی پھیل سکتا ہے، عام طور پر منشیات کے عادی افراد میں دیکھا جاتا ہے، خون کی منتقلی (بغیر اسکریننگ) سے بھی یہ جان لیوا مرض ہوا ہے۔ تاہم، ایسا لگتا ہے کہ سب سے زیادہ توجہ سرنج استعمال کرنے والوں پر مرکوز ہے، اور حکومتوں اور غیر سرکاری تنظیموں کی طرف سے  پھیلا ؤ کے سب سے واضح ذریعے کو اکثر نظر انداز کیا جاتا ہے۔

غیر محفوظ جنسی تعلقات تباہ کن نتائج کا باعث بنتے ہیں، پھر بھی ایسا لگتا ہے کہ اس علاقے میں کوئی آگاہی نہیں ہے، خاص طور پر کم آمدنی والے گروہوں میں، جو زیادہ خطرے میں ہیں۔ ایڈز کا کوئی معروف علاج نہیں ہے۔ یہ ہمیشہ جان لیوا ثابت ہوتا ہے۔ اگرچہ اینٹی ریٹروائرلز (اے آر ٹی) کو وائرس کے بڑھنے سے روکنے کے لیے استعمال کیا جا سکتا ہے، لیکن علاج مہنگا ہے اور اسے درآمد کرنا پڑتا ہے۔ معیشت آج جس سطح پر ہے، اس کے پیش نظر اے آر ٹی حکومت کی سرفہرست فہرست میں نہیں ہے۔

بشریٰ بھی اسی پیشے سے وابستہ ہے۔ اس کی عمر تیس برس کی ہے، اسے اپنی صحیح عمر یاد نہیں ہے لیکن اس کا پا ؤڈر سے ڈھکا ہوا چہرہ عمر کا اظہار کرتا ہے۔ وہ بات کرنے کے لیے بے چین نظر آتی ہے ، اور اس کے مطابق، وہ ’ماہر مشورہ‘ دے سکتی ہے ۔ جب اس سے اس کے پیشے کے حفاظتی طریقوں کے بارے میں پوچھا گیا تو اس نے جواب دیا، ’’ہاں، متوسط طبقے کے کچھ احمق کہتے ہیں کہ وہ احتیاطی تدابیر استعمال کریں گے، مجھے نہیں معلوم کیوں۔ میرا مطلب ہے کہ ان کی بیویاں گھر میں ہیں، لیکن وہ ہر چیز سے بہت خوفزدہ ہوتے ہیں۔ زیادہ تر گاہکوں کے یہ عجیب و غریب مطالبات نہیں ہوتے۔ لیکن متوسط طبقے کے لوگ اچھے پیسے دیتے ہیں، تو کیا کریں، ہمیں بھی گھر والوں کا پیٹ پالنا ہے۔ ‘‘

بشریٰ نے جسے ’ احمق‘ کہا تھا، وہ مرد تھے، جنہیں محفوظ جنسی تعلقات کے بارے میں کچھ علم تھا۔ چاہے وہ جس چیز میں ملوث ہیں وہ اخلاقی ہے یا غیر اخلاقی یہ مسئلہ نہیں ہے، کم از کم، وہ اپنی بیویوں کو خوفناک ایچ آئی وی سے متاثر نہیں کریں گے۔ حیرت انگیز طور پر ایک تجربہ کار جنسی کارکن محفوظ جنسی تعلقات کو ’عجیب‘ سمجھتا ہے۔ اس سے اس سنگین حقیقت کا اندازہ ہوتا ہے کہ ایڈز کے کیسز میں کس طرح اضافہ ہو رہا ہے۔

ڈاکٹر فرزانہ باری، جو ایک سماجی کارکن ہیں ان کا کہنا ہے ، ’’ریاست مسلسل اس بات سے انکار کر رہی ہے کہ پاکستان میں بیداری کی ضرورت ہے۔ بنیاد یہ ہے کہ یہ ایک مسلم ملک میں غیر قانونی ہے۔ جسم فروش خواتین کے علاوہ منشیات کے عادی افراد بھی زیادہ خطرے میں ہیں۔ جسم فروش خواتین بہت کمزور حالت میں ہیں، ان کے لیے کوئی ’قانونی‘ احاطہ نہیں ہے۔ اگر ان کے ساتھ زیادتی ہوتی ہے تو وہ پولیس کے پاس نہیں جا سکتیں، کیوں کہ زیادتی کرنے والے کے بجائے ان کے خلاف مقدمہ درج کیا جاتا ہے، آپ نے غور کیا؟ یہ مسئلہ ہے۔ یہ ایک پدرانہ معاشرہ ہے، جہاں مرد کنٹرول کرتا ہے۔ وہ نہ تو ’کارکن‘ یا اپنے قریبی ساتھیوں کے ساتھ محفوظ جنسی تعلقات قائم کرنا چاہتے ہیں، جس سے وائرس پھیلتا ہے، اور لوگ اس خطرے سے بے خبر ہیں۔‘‘

نیشنل لائبریری آف پاکستان کے مطابق، ایچ آئی وی کے ساتھ رہنے والے لوگوں کی تخمینہ تعداد تقریباً 1 لاکھ 65ہزار ہے۔ ایچ آئی وی کی وبا کا خطرہ 38اعشاریہ4 فیصد ہے جو منشیات کا انجیکشن لگاتے ہیں، 7اعشاریہ5 فیصد خواجہ سرا جسم فروش، 5اعشاریہ6 فیصد مرد جسم فروش اور 2اعشاریہ2 فیصد خواتین جسم فروش ہیں۔ ایچ آئی وی کے زیادہ تر کیسز پنجاب (75ہزار) اور سندھ (60ہزار) میں ہیں۔

پاکستان نے گزشتہ برسوں میں کئی وبائیں دیکھی ہیں، جیسے 2019 ء میں لاڑکانہ کی وبا، جسے عالمی ادارہ برائےصحت نے گریڈ 2 کی ایمرجنسی قرار دیا تھا۔

پاکستان میں ایچ آئی وی کے خلاف روک تھام کی کوششیں کووڈ 19 کی وبا کی وجہ سے ماند پڑ گئیں۔ لینسیٹ گلوبل ہیلتھ ماڈلنگ اسٹڈی سے پتا چلا ہے کہ وبائی امراض کی وجہ سے کم اور درمیانی آمدنی والے ممالک میں ایچ آئی وی سے ہونے والی اموات میں پانچ سالوں میں 10 فیصد اضافہ متوقع ہے۔

خیال کیا جاتا ہے کہ پاکستان کی عام آبادی میں ایچ آئی وی کا پھیلاؤ 1 فیصد سے بھی کم ہے۔ ورلڈ میٹر کے مطابق پاکستان کی آبادی 231 ملین سے زیادہ ہے۔ اتنی بڑی آبادی کے ساتھ، رجسٹرڈ لوگوں کے اعداد و شمار بہت کم ہیں، جن میں صرف 0اعشاریہ21 ملین کے ایچ آئی وی سے متاثر ہونے کا تخمینہ لگایا گیا ہے اور 53ہزار سے زیادہ رجسٹرڈ لوگ ہیں جو جون 2022 تک 51 اے آر ٹی مراکز میں اپنے اسٹیٹس کے متعلق جانتے ہیں۔ یہ اعدادوشمار نیشنل ایڈز کنٹرول پروگرام کی آفیشل ویب سائٹ پر دستیاب ہیں، جو کہ بیماری کی زمینی حقیقت کی بہترین عکاسی ہے۔

ایک سماجی کارکن عمر آفتاب نے اعدادوشمار پر اپنی ناراضگی کا اظہار کیا، جو ایک مختلف تصویر پیش کرتے ہیں، “مجھے شک ہے کہ اعدادوشممار جزوی طور پر بھی درست ہیں، مجھے زمین پر کچھ ہوتا ہوا نظر نہیں آرہا، یہ ترجیحی فہرست میں نہیں ہے، یہ سماجی یا حتیٰ کہ حکومتی شعبوں میں بھی کبھی بحث نہیں کی گئی۔ کووڈ 19نے کینسر کے مریضوں کے جاری علاج میں بھی خلل ڈالا، کیونکہ اسپتالوں کو کووڈ مراکز میں تبدیل کر دیا گیا تھا۔ نہ کوئی حکمت عملی ہے اور نہ ہی مناسب رپورٹنگ، نہ ڈیٹا اکٹھا کرنا۔ غیر محفوظ جنسی تعلقات اور ایچ آئی وی کے درمیان براہ راست تعلق ہے، بالکل، لیکن پہلے، یہ کووڈ، پھر سیلاب، سیاسی منظرنامہ اور اب معاشی بحران تھا۔ اس مسئلے کو سامنے نہیں لایا گیا ہے۔”

اس سے بیماری کی حقیقت کی ایک سیاہ تصویر سامنے آتی ہے جو CD4 خلیوں پر حملہ آور ہوتی ہے۔ بعد میں، اگر علاج نہ کیا جائے تو یہ ایڈز تک پہنچ جاتی ہے جو جان لیوا ہے۔ یہ دو دھاری تلوار ہے، کیونکہ مہلک بیماری کے گرد بدنما داغ موت سے بھی بدتر ہے۔ بیماری کا انکشاف کرنے والوں کو قطع تعلق کا سامنا کرنا پڑتا ہے، یہاں تک کہ ڈاکٹر بھی مریضوں کا فیصلہ کرتے ہیں، اور وہ اپنی جان گنوانے سے پہلے اپنی ساکھ اور سماجی حیثیت کھو دیتے ہیں۔

چاہے وہ سرنج سے ہو، یا جنسی طور پر منتقلی سے ، ایچ آئی وی ایک خطرناک دشمن ہے۔ آگاہی کی کمی اسے اور بھی مہلک بنا دیتی ہے کیونکہ لوگ انجانے میں وائرس کا شکار ہو جاتے ہیں۔ کیا اس موضوع کے حوالے سے مزید آگاہی ہونی چاہیے؟ اس کا جواب ‘ہاں’ میں ہے اور جتنی جلدی یہ ہو جائے گا، اتنے ہی زیادہ لوگوں کو بچایا جا سکتا ہے۔