وزیرخارجہ شاہ محمود قریشی نے کہا ہے کہ پاکستان ایک پرامن اورمستحکم افغانستان کی حمایت کرتا ہے ۔ افغانستان اور پاکستان اپنی سرزمین ایک دوسرے کے خلاف استعمال نہ ہونے دیں۔

بھوربن ، مری میں افغانستان کے بارے میں لاہور پراسیس کے موضوع پر کانفرنس کی افتتاحی نشست سے خطاب کرتے ہوئے وزیر خارجہ شاہ محمود قریشی نے کہاکہ پرامن اورخوشحال افغانستان خطے کے مفاد میں ہے ۔ پاکستان افغان تنازع کے حل  کے لیےاپنا کردارادا کررہا ہے۔

وزیرخارجہ نے کہاکہ پاکستان باہمی احترام اور عدم مداخلت کے اصولوں پرعمل پیرا ہوکر افغان امن عمل کی حمایت کررہا ہے ۔

شاہ محمود قریشی نے کہاکہ افغان مسئلے کا کوئی فوجی حل نہیں ، یہ مسئلہ صرف سیاسی عمل کے ذریعے ہی حل کیاجاسکتا ہے۔

انہوں نے کہاکہ پاکستان اورافغانستان کے مشترکہ دشمنوں نے دوطرفہ تعلقات کو نقصان پہنچایا ہے ،دونوں ملکوں کو باہمی اعتماد کی بحالی  کے لیےاقدامات کرنے اور ایک دوسرے پر الزام تراشی کے ماحول سے باہر نکلنے کی ضرورت ہے۔

وزیر خارجہ نے کہاکہ پاکستان اور افغانستان کو اپنی سرزمین ایک دوسرے کے خلاف استعمال کرنے کی اجازت نہیں دینی چاہیے، پاکستان چارعشروں سے لاکھوں افغان پناہ گزینوں کی میزبانی کررہاہے۔

واضح رہے کہ افغانستان کی تمام سیاسی جماعتوں کے سربراہ اور افغان صدر کے سیاسی مشیر کانفرنس میں شریک ہیں ۔ان میں حزب اسلامی کے سربراہ گلبدین حکمت یار ، سینیٹرز اور افغان پارلیمنٹ کے ارکان بھی شامل ہیں۔

لاہور پراسیس کے موضوع پر کانفرنس میں رابطوں، تجارت، معیشت اور صحت سمیت مختلف شعبوں پرغورکیا جارہاہے۔

کانفرنس میں افغان پناہ گزینوں کی اپنے ملک واپسی کا بھی جائزہ لیا جارہاہےجو گزشتہ چالیس سال سے پاکستان میں مقیم ہیں۔