وزیر خارجہ شاہ محمود قریشی نے کہا کہ پاکستان افغانستان میں امن  کے لیےخلوص  ،نیک نیتی اور کھلے دل کے ساتھ مصالحتی کردار ادا کرتا رہے گا۔

پاکستان کے دورے پر موجود افغان صدر اشرف غنی نے وزیر خارجہ شاہ محمود قریشی سے اسلام آباد میں ملاقات کی۔

دوران ملاقات دو طرفہ تعلقات،افغان امن عمل سمیت باہمی دلچسپی کے امور پر تبادلہ خیال ہوا۔

وزیر خارجہ مخدوم شاہ محمود قریشی نے وزیر اعظم عمران خان اور پاکستانی عوام کی طرف سے افغان صدر کو پاکستان آنے پر خوش آمدید کہا۔

انہوں نے کہاکہ افغانستان اور پاکستان کے مابین دیرینہ جغرافیائی، تاریخی، تعلقات ہیں۔ پاکستان افغان نتیجہ خیز مذاکرات کی ضرورت پر ہمیشہ زوردیتا چلا آ رہا ہے کیونکہ افغانستان میں پائیدار امن اور استحکام کا یہی ایک واحد راستہ ہے۔

مخدوم شاہ محمود قریشی نے کہا کہ دہائیوں پر محیط جنگوں اور عدم استحکام کے نتیجے میں افغان عوام نے بے پناہ مصائب اورمشکلات کا سامنا کیا ہے۔

دوران ملاقات ،دونوں ممالک کے مابین تجارت میں اضافے، معیشت، سرمایہ کاری کے فروغ، مواصلات، توانائی، ثقافت اور عوامی سطح پر روابط کو بہتر بنانے کے حوالے سے خصوصی تبادلہ خیال ہوا جبکہ امن واخوت کے لئے افغانستان اور پاکستان کی وضع کردہ حکمت عملی (اے پی اے پی پی ایس) کو عوام کی بہتری اور بہبود کے لئے بروئے کار لانے پر اتفاق کیا گیا۔

 شاہ محمود قریشی نے کہاکہ صدر اشرف غنی کے دورہ پاکستان سے دونوں ممالک کو مزید قریب آنے اور دو طرفہ تعلقات کے استحکام میں مدد ملے گی۔

اس موقع پر افغان صدر اشرف غنی نے افغان امن عمل میں پاکستان کی کاوشوں کو سراہا۔