پاک سرزمین پارٹی کے چیئرمین سید مصطفیٰ کمال کا کہنا ہےکہ پی ایس پی 25 جولائی کا الیکشن ہارنے کے بعد اور زیادہ مضبوط ہوئی ہے۔

تفصیلات کے مطا بق مصطفیٰ کمال نےمیڈیا سے بات کرتے ہوئے کہا کہ21 جولائی 2019 بروز اتوار کو باغ جناح میں پاک سرزمین پارٹی عظیم الشان جلسہ کرے گی۔

باغ جناح کراچی میں مصطفی کمال نے ایک بار پھر عوام سے حقوق کے حصول کے لیے ان کا ساتھ دینے کی اپیل کرتے ہوئے کہا کہ اکیس جولائی کا جلسہ حکومت گرانے کے لیے نہیں ہےبلکہ کراچی کی عوام کے حقوق کے لیے ہے۔

مصطفی کمال نے کہا کہ کراچی کچرے کا ڈھیر بن چکا ہے،عوام کب تک اپنے اوپر ظلم برداشت کریں گے۔

انھوں نے کہا میں کراچی والوں سے پوچھتا ہوں کب تک دیکھو گے کہ ان کا شہر کچرے کا ڈھیر بن رہا ہے، کب تک دیکھو گے کہ نوجوان ڈگریاں لے کر بے روزگار گھوم رہے ہیں، کب تک دیکھو گے کہ مایوسی نسلوں میں پھیل رہی ہے۔

مصطفیٰ کمال نے یہ بھی کہا کہ ظلم سہہ کر اپنے بچوں کو خاموشی سے دفنانے والا خود بھی ظالم ہیں، اللہ تعالیٰ نے کہہ دیا ہے کہ جو حق بات نہیں کہتا وہ خسارے میں ہے۔

مصطفی کمال نے مزید کہا کہ کراچی میں ساری زبانیں بولنے والے پاک سرزمین پارٹی کے جھنڈے تلے ایک ہیں، بلا تفریق لوگ پی ایس پی میں شامل ہو سکتے ہیں،کراچی والے فیصلہ کریں کہ انہیں ایک ایک کر کے مرنا ہے یا حقوق کے لیے کھڑا ہونا ہے۔