کراچی کے علاقے گلستان جوہر کے نجی اسپتال میں مبینہ غلط انجکشن سے جاں بحق ہونے والی شیر خوار نشوا کے والد کو انکے اپنے ہی وکیل منیر احمد نے ہرجانہ کا نوٹس بھیج دیا ہے۔

 نشوا کے والد کے وکیل منیر احمد کا کہنا ہے کہ قیصر علی نے ہسپتال کی انتظامیہ سے عدالت کے باہر معاہدہ کرکے پورے معاشرے کو مایوس کیا اور قیصر علی نے ملزمان کو رہائی دلانے کے لئے نجی اسپتال انتظامیہ کا ساتھ دیا۔

منیر احمد نے کہا کہ قیصر علی نے جب کوئی خفیہ ڈیل نہیں کی تو بات چیت کو خفیہ کیوں رکھا گیا جبکہ نشواء کے والد کی جانب سے نجی اسپتال انتظامیہ سے ملاقاتوں اور بات چیت کو وکلاء سے خفیہ رکھا گیا۔

وکیل کا کہنا تھا کہ قیصر احمد کے زور دینے پر ہی پولیس نے قتل کی دفعات درج کی تھیں اور قتل کی دفعات ختم کرانے کے لئے نشوہ کے والد کی جانب سے وکلاء پر دباو ڈالا گیاتھا۔

نشواء کیس کے وکیل منیر احمد نے مایوسی کا اظہار کرتے ہوئے کہا کہ قیصر علی نے پوری پاکستانی قوم کے جذبات سے کھلواڑ کیا، نجی اسپتال کو موت بیچنے کا لائسنس قیصر علی مدد سے دوبارہ جاری ہوگیا اور اب آئندہ کوئی نشوہ جیسے کیس میں حمایت کے لئے باہر نہیں نکلے گا۔

تفصیلات کے مطابق قیصر علی نے تفتیش میں پولیس سے تعاون نہ کرکے کیس کو خراب کیا جبکہ نشوہ کے والد کیس کی اہم سماعتوں میں حاضر نہیں ہوتے تھے۔