بلاول بھٹو نے کہا کہ تحریک انصاف کا ہر وعدہ اور ہر نعرا جھوٹانکلا ہے، عمران خان نے یوٹرن لیا ہے۔

سکھر کے پریس کلب میں پریس کانفرنس کرتے ہوئے پیپلز پارٹی کے چیئرمین بلاول بھٹو کا کہنا تھا کہ اپوزیشن بننے پر چئیرمین سینٹ کا انتخاب کیا گیا تھا، اب اپوزیشن کی تبدیلی پر چیئرمین سینٹ بھی تبدیل ہونا چاہیئے اور ہم امید کرتے ہیں کہ چیئرمیں سینٹ
حکومت کی طرح سلیکٹڈ نہیں ہوگا۔

بلاول بھٹو زرداری کا صحافی جاوید میمن کے انتقال پر ان کے بیٹوں اور صحافیوں سے تعزیت کرتے ہوئے کہنا تھا کہ مہنگائی کا سونامی آگیا ہے، غریب پس رہے ہیں، صحافت کی آزادی پر ہر طرف سے حملے ہورہے ہیں اور میڈیا ہاؤسز پر ریاست کی گرفت کو مضبوط کیا جارہا ہے۔

چیئرمین پیپلز پارٹی نے کہا کہ جس نے خود کشی کرنے کو ترجیح دیتے ہوئے عوام سے  آئی ایم ایف کے پاس نہ جانے کا وعدہ کیا اس عمران خان نے اس نے آئی ایم ایف کی تمام شرائط مان لیں ہیں اور عوام پر ٹیکس کا پہاڑ توڑ دیا ہے، جن اداروں کا فرض غریب کی جھونپڑی کا تحفظ کرنا ہے وہ ہی غریب کی جھونپڑی گرا رہے ہیں۔

میڈیا سے بات کرتے ہوئے بلاول نے مزید کہا کہ جب تک ہم غلطیوں کا ازالہ نہیں کرینگے تب تک غلطیاں دہراتے رہینگے۔

اس سے قبل بلاول بھٹو نے سکھر میں ایک تقریب سے خطاب کر تے ہوئے کہا کہ بینظیر انکم سپورٹ پروگرام کو ختم کرنے کی کوشش کی گئی لیکن اس پروگرام کو کسی صورت ختم نہیں کرنے دیں گے، بےنظیر انکم سپورٹ پروگرام کی وجہ سے لوگ پاؤں پر کھڑے ہوئے۔