کراچی سپریم کورٹ رجسٹری میں سی بریز پلازہ گرانے کے خلاف درخواست کی سماعت ہوئی ۔

ڈی جی سندھ بلڈنگ کنٹرول اٹھارتی کی کارکردگی پر شدید برہمی کا اظہار کرتے ہوئے سی بریز پلازہ کیس میں چیئرمین نیسپاک اور پاکستان انجنیئرنگ کونسل کو 9 اگست کو طلب کرلیا۔

جسٹس گلزار احمد  نے ڈی جی سندھ بلڈنگ کنٹرول اٹھارتی کی کارکردگی پر شدید برہمی کا اظہار کرتے ہوئے کہا کہ آپ کے افسران اور ملازمین صرف مفت کی تنخواہ لے رہے ہیں۔

 بتائیں کراچی میں کتنی بلڈنگز زیر تعمیر ہیں؟ جس پر ڈی جی ایس بی سی اے نے جواب دیا کہ چار سو پانچ سو عمارتیں ہوں گی۔ جسٹس گلزار احمد نے استفسار کیا کہ آپ ہمیں بے وقوف سمجھتے ہیں ؟؟ ہمیں نہیں معلوم یہاں کیا ہورہا ہے ؟ آپ کو شرم نہیں آتی کراچی کے ساتھ کیا سلوک کیا ہے ؟؟ بے شرمی اور بے غیرتی کی انتہا ہے آپ کے عزت بیچی، ضمیر بیچ دیا۔ آپ زندہ کیسے ہیں ایسے لوگ ہارٹ اٹیک سے مرجاتے ہیں جو ہر وقت نشے میں رہتے ہیں۔

کراچی میں 7 ریکٹر کا زلزلہ آگیا تو پچاس لاکھ سے ایک کروڑ کی آبادی ختم ہوجاۓ گی۔ سی بریز پلازہ بھی خطرناک ہے کسی وقت بھی گر سکتا ہے۔ جسٹس سجاد علی شاہ نے ریمارکس دیے کہ آپ نےدہلی کالونی میں 30 گز پر گیارہ منزلہ عمارت کی تعمیر کی اجازت دی۔

 ہائیکورٹ نے گرانے کا حکم دیا تو کنٹونمنٹ نے کہا ہمارے پاس اختیار نہیں ہے۔

وکیل نے عدالت کو بتایا کہ سی بریز پلازہ خالی ہے وہاں کوئی آبادی نہیں۔  جس پر جسٹس گلزار احمد نے ریمارکس دیے کہ یہ کیسے ہوسکتا ہے کوئی عمارت کراچی میں چالیس سال تک خالی رہے اور قبضہ نہ ہو۔