امیر جماعت اسلامی پاکستان سینیٹر سراج الحق نے کہا ہے کہ کشمیر کے موجودہ صورتحال میں پاکستانی حکمرانوں کے رویے پر افسوس ہورہا ہے۔

تفصیلات کے مطابق کشمیری بھائیوں سے اظہار یکجہتی کیلئے پشاور میں جماعت اسلامی کے زیراہتمام ایک بڑی ریلی نکالی گئی۔

کشمیر بچاؤ مارچ میں امیر جماعت اسلامی سراج الحق نے ریلی سے خطاب کرتے ہوئے کہا کہ حکمرانوں نے اگر سستی کا مظاہرہ کیا تو جماعت اسلامی کا مارچ سری نگر میں نظر آئے گا۔

سراج الحق کا کہنا تھا کہ سری نگر میں ہر کشمیری کے گھر پربھارتی فوج اور آر ایس ایس کے غنڈے کھڑے ہیں جبکہ ہمارے حکمران صرف زبانی کلامی پریس کانفرنس کر رہے ہیں۔

سراج الحق نے یہ بھی کہنا کہ اسلام آباد اس وقت سنگ مرمر کا قبرستان بنا ہوا ہے، اذان دیکر انہیں جگانے کی کوشش کی لیکن یہ جاگتے نہیں۔

سراج الحق نے کہا کہ وزیراعظم ٹرمپ اور مودی کے دھوکے میں نہ آئے،ٹرمپ سے ثالثی کرانا اپنے سینے میں خود چھرا گھونپنے کے مترادف ہے،انھوں نے کہا کہ حکومت کو کسی حادثے کا انتظار ہے لیکن کشمیر کا مسئلہ بارڈر کا نہیں یہ مسلمانانوں کی زندگی و موت کا مسئلہ ہے۔

سراج الحق نے یہ بھی کہا کہ حکومت کو وقت دیتا ہوں اور تجاویز دیتا ہوں لیکن اگر حکومت ٹھس سے مس نہ ہوئی تو ہم خود فیصلہ کرینگے۔

سراج الحق کا کہنا تھا کہ حکومت نے اگر کچھ نہ کیا تو ہم ان کا جنازہ پڑھ کر آگے بڑھے گے۔

امیر جماعت اسلامی کا مزید کہنا تھا کہ ہم کشمیر کے لئے ایک ہزار سال تک لڑیں گے اور پیچھے نہیں ہٹیں گے۔

جلسے کے اختتام پر امیر جماعت اسلامی پاکستان سینیٹر سراج الحق نے کشمیریوں کیلئے خصوصی دعا بھی کی۔