آئی ایس پی آر کے مطابق بزدل بھارتی فوج نے ایک بار پھرایل او سی پر تتہ پانی سیکٹرمیں شہری آبادی پر گولہ باری شروع کردی۔

آئی ایس پی آر کے مطابق بلااشتعال گولہ باری میں پچھہتر سال کا لعل محمد اور اکسٹھ سالہ حسن شہید ہوگئے، جبکہ پاک فوج کی جوابی کارروائی میں دو بھارتی فوجیوں کی ہلاکت کی بھی اطلاع ہے۔

آئی ایس پی آر کے مطابق بھارتی فوج نے مارٹر اور راکٹ سے شہری آبادی کو نشانہ بنایا، کئی بھارتی فوجی زخمی ہوگئے جبکہ ان کی چیک پوسٹوں کو نقصان پہنچا۔

خیال رہے کہ بھارتی فوج کی جانب سے لائن آف کنٹرول اور ورکنگ باؤنڈری پر مسلسل جنگ بندی معاہدے کی خلاف ورزی کا سلسلہ جاری ہے اور خاص طور پر مقبوضہ کشمیر میں یکطرفہ بھارتی اقدام کے بعد ایل او سی پر بھارتی خلاف ورزیوں میں اضافہ ہوگیا ہے۔

اس سے قبل پاک فوج کے ڈائریکٹر جنرل میجر جنرل آصف غفور نے ایک ٹوئٹ میں بتایا تھا کہ مقبوضہ کشمیر کی نازک صورتحال سے توجہ ہٹانے کے لیے بھارتی فوج نے ایل او سی پر فائرنگ کی ، جس کے نتیجے میں  پاک فوج کے تین جوان شہید ہوگئے تھے ۔

پاک فوج کے شعبہ تعلقات عامہ (آئی ایس پی آر) کے مطابق بھارتی فوج نے لائن آف کنٹرول پر بلا اشتعال فائرنگ اور گولہ باری کی تھی۔

ڈی جی آئی ایس پی آر کا کہنا تھا کہ بھارتی فوج کی فائرنگ سے نائیک تنویر، لانس نائیک تیمور اور سپاہی رمضان شہید ہوئے جبکہ پاک فوج نے موثر جواب دیتے ہوئے 5 بھارتی فوجیوں کو ہلاک کردیا تھا۔