وزیرخارجہ شاہ محمود قریشی کا بیلجیم کے وزیرخارجہ ڈیڈیئررائنڈرزسے ٹیلیفونک رابطہ ہوا۔

تفصیلات کے مطابق وزیر خارجہ شاہ محمود قریشی نے بیلجیم کے ہم منصب سے ٹیلی فونک رابطے میں مقبوضہ کشمیر کی تشویش ناک صورت حال پرتبادلۂ خیال کیا۔

وزیرخارجہ نے بیلجیم کے وزیرخارجہ کومقبوضہ جموں وکشمیر میں گزشتہ تئیس یوم سے جاری کرفیواورانسانی حقوق کی سنگین خلاف ورزیوں سےآگاہ کیا۔

شاہ محمود قریشی کا کہنا تھا کہ ہندوستان کی طرف سےمقبوضہ جموں وکشمیر میں اٹھائے گئے یکطرفہ اقدامات بین الاقوامی قوانین اوراقوام متحدہ سیکورٹی کونسل کی قراردادوں کےمنافی ہیں۔

شاہ محمود قریشی کا یہ بھی کہنا تھا کہ ہندوستان نے ان یکطرفہ اقدامات سے پورے خطے کا امن داؤ پر لگا دیا ہے

وزیر خارجہ نے کہا کہ مقبوضہ جموں و کشمیر میں امن و امان کی مخدوش صورتحال سے ہمیں ایک نیا انسانی المیہ جنم لیتا دکھائی دیتا ہے۔

شاہ محمود قریشی نے بیلجیم کے وزیرخارجہ کو مزید بتایا کہ پاکستان شروع دن بھارت کے ساتھ تمام تصفیہ طلب امور کو دوطرفہ مذاکرات کے ذریعے حل کرنے کا حامی رہا ہے لیکن بھارت نے اس حوالے سے ہمیشہ منفی طرز عمل کا مظاہرہ کیا

بیلجیم کے وزیرخارجہ ڈیڈیئررائنڈرز نےاس سلسلے میں فریقین سے بات کرنے اور اپنا سہولت کارانہ کردار ادا کرنے پر آمادگی کا اظہار کیا۔

بیلجیم کے وزیرخارجہ کا اس ساری صورتحال پر تشویش کا اظہار کرتے ہوئے کہنا تھا کہ اس مسئلے کو جلد از جلد دو طرفہ مذاکرات کے ذریعے حل کرنے کی ضرورت پر زور دیا۔

یاد رہے گزشتہ روز شاہ محمود قریشی نے ترکی کے وزیر خارجہ میولود چاوش اوغلو سے بھی ٹیلی فونک رابطہ کیا تھا، جس میں انھوں نے مقبوضہ کشمیر میں انسانی حقوق کی سنگین خلاف ورزیوں سے متعلق تبادلہ خیال کیا۔

شاہ محمود نے مقبوضہ کشمیر کے لیے آواز بلند کرنے پر ترک صدر کا شکریہ ادا کرتے ہوئے کہا کہ ترکی نے ہمیشہ اہم امور پر پاکستان کے نقطۂ نظر کی حمایت کی، پاکستان نے بھی ہر مشکل گھڑی میں ترکی کا ساتھ دیا، مسلم امہ کو متحد کرنے کے لیے ترکی کی کاوشیں قابل تحسین ہیں۔